ශ්‍රී ලංකාවේ ඇසුරුම් පෙට්ටි නිෂ්පාදන කර්මාන්තයේ ප්‍රමුඛතම නාමයක් සහ ඇබර්ඩීන් හෝල්ඩින්ග්ස් පුද්ගලික සමාගමේ අනුබද්ධිත ආයතනයක් වන Ex-Pack Corrugated Cartons PLC සමාගම, අඛණ්ඩව තෙවැනි වසරටත් ජාතික පිවිතුරු නිෂ්පාදන මධ්‍යස්ථානය (National Cleaner Production Center) මඟින් පිරිනැමෙන කාබන් ශූන්‍යකරණතා සහතිකය හිමිකර ගැනීමට සමත් විය. දේශගුණික විපර්යාස මැඬලීම වෙනුවෙන් සමාගම ගෙන යන තිරසර වැඩපිළිවෙළට ලැබුණු ගෞරව බුහුමනක් ලෙස මෙම සහතිකය හැඳින්විය හැකිය.
“අධික කාර්මික භාවිතාවන් සහිත කර්මාන්තයක නියැළී සිටින අපගේ ව්‍යාපාරය තෙවැනි වසරටත් කාබන් ශූන්‍යතා සහතිකය හිමිකර ගැනීම අපට විශාල සතුටක්. සමස්තයක් ලෙස පරිසරයටත්, සමාජයටත් මෙම කර්මාන්තය නිසා සිදුවිය හැකි අහිතකර තත්ත්වයන් අවම කිරීම සහ වළක්වා ගැනීම වෙනුවෙන් අපි දිගින් දිගටම කැපවුණු පසුබිමක මෙම සහතිකය අපට බෙහෙවින් වැදගත්. අපි ඉදිරියටත් විශේෂඥ දැනුම සහ තිරසර භාවිතාවන් සමඟින් කාබන් ශූන්‍යතා අරමුණ ජයගැනීමට කටයුතු කරනවා”, යනුවෙන් Ex- Pack සමාගමේ සභාපති සත්තාර් කාසිම් මහතා පැවසුවේය.
