දියවැඩියා මර්දනයට ‘සුව දිවිය’ පදනමෙන් ආරාධනා

‘සුව දිවිය’ දියවැඩියා රෝගය මර්දනය කිරීමේ අරමුණින් පිහිටවනු ලැබූ ලාභ නොලබන සංවිධානයකි. වෛද්‍යවරු, විශේෂඥයින්, පෝෂණවේදීන්, ශාරීරික පුහුණුකරුවන් හා මනෝ විද්‍යාඥයින් ඇතුළු සෞඛ්‍ය ක්ෂේත්‍රයේ විවිධ අංශයන්හි සාමාජිකයින් එහි කටයුතු කරනු ලබයි. දියවැඩියා රෝගය පාලනය කිරීම තනිව සිදු කළ නොහැකිය. එය සාමූහික ප්‍රයත්නයකි. ඒ වෙනුවෙන් ව්‍යාපාර ක්ෂේත්‍රය පෙරමුණ ගෙන කටයුතු කළ යුතු බව සුව දිවිය පදනම අවධාරණය කර සිටියි. එමෙන්ම ඒ වෙනුවෙන් සුවිසල් කාර්ය භාරයක් ඉටු කිරීම සඳහා අධ්‍යාපන ආයතන, සෞඛ්‍ය සේවා සපයන්නන්, ප්‍රතිපත්ති සම්පාදකයින්, රාජ්‍ය ආයතන, ආහාර අංශ සහ මාධ්‍ය ආයතනයන්ට ද එක් වන ලෙස සුව දිවිය පදනම ඉල්ලා සිටියි.