වාරියපොළ, කොළඹගම ශ්‍රී මියුගුණාරාම රාජමහා විහාරාධිපති නේපාලයේ ලුම්බිණි නුවර නේපාල
ශ්‍රී ලංකා මහා විහාරයේ භාරකාර විහාරාධිපති සම්මානිත ආචාර්ය පූජ්‍යපාද ගල්ලැහැපිටියේ පේමරතන හිමි
(කොළඹගම පොඩි හාමුදුරුවෝ)
ළුමිණ ‘ඉසිවර’ පාඨක පින්වත් ඔබ වෙත මම අද ඉදිරිපත් කරනු ලබන මෙම උතුම් “මිත්තානිසංස සූත්‍ර දේශනාව’ යමෙක් නිතිපතා ඉතා ගෞරවයෙන් සහ විශ්වාසයෙන් යුතුව භාවිතා කිරීමේ දී එදිනෙදා ජීවිතයට සත්‍ය වශයෙන්ම ජීවමානව ලැබෙන ගුණ සමුදාය අපමණ දේශනාව තුළ පුනපුනා ප්‍රකාශ වන්නේ මෙහි ඇති අසීමිත ආශිර්වාදයයි.
මෙම දේශනාව අයත් වන්නේ ජාතක පාලි දේශනාවටයි ජාතක කතාවේ එන තේමිය කුමරුන් වදයට පැමිණවීමට සූදානම් වන මොහොතේ රාජපුරුෂයන් අමතා තේමිය කුමරුන් මිත්‍රදෝහී වීම බරපතළ වරදක් බව පවසා මිත්‍රද්‍රෝහී නොවීමෙන් මේ ජීවිතයේ ඒ මොහොතේ පටන් ලැබෙන විපාක ප්‍රතිඵල මෙම පිරිත් ගාථා පෙළින් දක්වා ඇත යමෙක් මෙම ගාථාවන් නිතර නිතර සජ්ඣායනා කිරීමෙන් සහ ඒ පිළිබඳව විශ්වාසයෙන් මිත්‍රද්‍රෝහී නොවී ක්‍රියා කිරීම තුළ මෙම ගාථාවන්ගෙන් ප්‍රකට වන සියලුම ප්‍රතිඵලය අත්විඳින බව දේශනාවේ සඳහන් වන අතර බුදුරජාණන් වහන්සේගේ බුද්ධ දේශනාවක් හා සමානවම බල සම්පන්න බෝසත් ප්‍රාර්ථනාවකි. ගෞරවයෙන් මෙය පුරුදු පුහුණු කරගන්න, අධ්‍යාපනය ලබන වයසේ දූ දරුවන්ට මෙය නිතර නිතර භාවිතයට හුරු කරවන්න ඒ මොහොතේ සිටම පහත සඳහන් ආශිර්වාද ජීවිතයට ලැබෙනු ඇත.
මිත්තානිසංස සූත්‍රය
පහූතහක් බෝ භවති විප්පවුත්තෝ සකාසරා බහු නං උපජිවන්ති යෝ මිත්තානං න දුභති
යං යං ජනපදං යාති නිගමේ රාජධානියෝ සබ්බත්ථ පුජිතෝ හෝති යෝ මිත්තානං න දුභති
නාස්ස චෝරා පසහන්ති නාති මඤ්ඤිති ඛත්තියෝ සබ්බේ අමිත්තේ තරති යෝ මිත්තානං න දුභති
අක්කුද්ධෝ සඝරං ඒති සහාය පටි නන්දිතෝ ඤාතීනං උත්තමෝ හෝති යෝ මිත්තානං න දුභති
සක්කත්වා සක්කතෝ හෝති ගරූ හෝති සගාරවෝ වණ්ණකිත්තිභතෝ හෝති යෝ මිත්තානං න දුභති
පුජකෝ ලභතේ පූජං වන්දකෝ පටිවන්දනං යසෝ කිත්තිඤ්ච පජ පෝති යො මිත්තානං න දුභති
අග්ගි යථා පජ්ජලති දේවතාව විරෝචති සිරියා අජහිතෝ හෝති යෝ මිත්තානං න දුභති
ගාවෝ තස්ස පජායන්ති ඛෙත්තේ වුත්තං විරූහති පුත්තානං ඵල මස්නාති යෝ මිත්තානං න දුභති
දරිතෝ පබ්බතා තෝ වා රුක්ඛාතෝ පතිතෝ නරෝ චුතෝ පතිට්ඨං ලභති යෝ මිත්තානං න දුභති
විරූළ්හමූලසන්තානං නිග්‍රෝධමිව මාලුතෝ අමිත්තා නප්පසහන්ති යෝ මිත්තානං න දුභ තී
•යමෙක් මිතුරන්ට ද්‍රෝහී නොවේ නම් (යො මිත්තානං නදුහති)
1. ඔහුට ගෙයින් පිට ගිය කල බොහෝ ආහාරපාන ලැබෙයි.
2. ඔහු නිසා බොහෝ දෙනෙක් ජීවත් වෙති.
3. ඔහු යම් නගරයකට, රටකට ගිය කල පුද සත්කාර ලැබෙයි.
4. ඔහුට සොර සතුරු උපද්‍රව නොවෙයි.
5. රජුගෙන් පීඩා නොවෙයි.
6. සියලු සතුරන් ඔහු මැඬපවත්වයි. (සතුරන්ගෙන් ඔහු ඈත් වෙයි.)
7. ඔහු කෝප නොවූ සිතින් සිය ගෙදරට එයි.
8. පිරිසක් මැදට ගිය විට ඔහු සතුටින් පිළිගනියි.
9. ඔහු ඥාතීන් අතර උතුම් වෙයි.
10. ඔහු අනුන්ට සත්කාර කරමින් අනුන්ගෙන් සත්කාර ලබයි.
11. අනුන්ට ගෞරව කරමින් තමන් ද ගෞරව ලබයි.
12. කීර්තියත් ප්‍රසන්නතාවත් ලබයි.
13. පිදිය යුත්තන් පුදමින් තමන් ද පිදුම් ලබයි.
14. වැඳිය යුත්තන් වඳිමින් තමන් ද වැඳුම් ලබයි.
15. යසසටත් කීර්තියටත් පැමිණෙයි.
16. ඔහු ගිනි සිළුවක් සේ දිලිසෙයි.
17. දෙවියෙක් සේ බබළයි.
18. ශ්‍රී සෞභාග්‍යය ඔහුගෙන් කිසි දිනෙක ඉවත් නොවෙයි.
19. ඔහුගේ ගව සම්පත දියණු වෙයි.
20. කුඹුරු කෙත් වත් සශ්‍රීක වෙයි.
21. ඔහුගේ දරුවෝ ද සුවසේ සිටිති.
22. කන්දකින් හෝ ගසකින් හෝ වැටුණහොත් ඔහුට පිහිට රැකවරණ සැලසෙයි.
23. මැනවින් වැඩුණු ගසක් මහ සුළඟකින් වුව ද ඉදිරි නොවැටෙන සේ
කිසිවෙකුටත් ඔහු යටකළ නොහැකි ය.
