ස්ටාර් ගාමන්ට්ස් ජෛව විවිධත්වය නංවාලීම වේගවත් කරයි

ස්ටාර් ගාමන්ට්ස් සමූහය සිය පාරිසරික ජෛව විවිධත්වය නංවාලීමේ වැඩසටහන ආරම්භ කළේ 2023 වසරේ ලෝක මුහුදු තණ දිනයට සමගාමීව ය. ඒ අනුව සමාගම ඉස්සන් වගාව නිසා හානියට පත් හලාවන, පුත්තලම සහ ආනවිලුන්දාව රැම්සා තෙත්බිම් රක්ෂිතය ආශ්‍රිත හෙක්ටයාර 3ක කඩොලාන නැවත වගා කළේය. මෙම පරිසර සංරක්ෂණ වැඩසටහන වෙනුවෙන් ස්ටාර් ගාමන්ට්ස් සමූහය, වනජීවී සංරක්ෂණ දෙපාර්තමේන්තුව, වන සංරක්ෂණ දෙපාර්තමේන්තුව, ශ්‍රී ලංකා නාවික හමුදාව, වනජීවී හා ස්වභා ආරක්ෂණ සමාජය (WNPS) සහ වයඹ විශ්වවිද්‍යාලය සමඟ අත්වැල් බැඳගෙන තිබේ. මෙම ව්‍යාපෘතිය 2024 වසරේ UN Decade of World Restoration Flagship සම්මානයෙන් ද පිදුම් ලැබීය.ව්‍යාපෘතිය ආරම්භයේදී මුඩුභාවයට පත්ව ඇති භූමිය වෙත ජලය ගෙන ඒම සඳහා මත්ස්‍ය අස්ථි පද්ධතියේ හැඩය ගත් ඇළ මාර්ග නිර්මාණය කිරීම ශ්‍රී ලංකා නාවික හමුදාව සිදු කළේය. දෙවැනි අදියර යටතේ නව පරිසර පද්ධතියේ කඩොලාන පැළ 500ක් වගා කිරීමට ද ස්ටාර් ගාමන්ට්ස් සමූහය කටයුතු කළේය.