පසුගිය 15 වැනිදා පැවැති ශිෂ්‍යත්ව විභාගයේ ප්‍රශ්න පත්‍රයට ලබාදුන් ප්‍රශ්න කිහිපයක් කලින් පිටවීම පිළිබඳව මාපිය විරෝධය හමුවේ විභාග දෙපාර්තමේන්තුව සහ මාපියන් විසින් විමර්ශනයක් සිදුකරන ලෙස අපරාධ පරීක්ෂණ දෙපාර්තමේන්තුවට සිදුකළ පැමිණිලි ඔස්සේ අපරාධ පරීක්ෂණ දෙපාර්තමේන්තුව මේ වන විටත් ඒ පිළිබඳ පුළුල් විමර්ශනයක් සිදු කරමින් පවතින බව පොලිස් මූලස්ථානයෙන් වාර්තා වේ.
මෙතෙක් අපරාධ පරීක්ෂණ දෙපාර්තමේන්තුව සිදු කළ විමර්ශනය අනුව පසුගිය 22 වැනිදා මහරගම ජාතික අධ්‍යාපන ආයතනයේ සැලැසුම් අධ්‍යක්ෂවරයා ලෙස කටයුතු කළ අයි.ජී.එස්. ප්‍රේමතිලක සහ පසුගිය 25 වැනිදා ශිෂ්‍යත්ව පළමු පත්‍රයේ ප්‍රශ්න කීපයක් ආදර්ශ ප්‍රශ්න පත්‍රයකට ඇතුළුකොට වට්ස්ඇප් සමූහ ඔස්සේ බෙදාහැරි රජයේ ගුරුවරයකු මෙන්ම උපකාරක පන්ති ගුරුවරයකු ලෙස කටයුතු කළ අලව්ව, තුල්හිරිය, අරලිය උයනේ පදිංචි එම්.සී. කුමාර ඉලංගසේකර නමැත්තා ද අත්අඩංගුවට ගෙන ලබන මස 7 වැනිදා දක්වා රක්ෂිත බන්ධනාගාරගත කෙරිණි.
විමර්ශන අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති රොහාන් ප්‍රේමරත්න සහ අධ්‍යක්ෂ ජ්‍යෙෂ්ඨ පොලිස් අධිකාරි මංගල දෙහිදෙණියගේ උපදෙස් මත මූල්‍ය විමර්ශන අංශ (iV) ස්ථානාධිපති ප්‍රධාන පොලිස් පරීක්ෂක දිනේෂ් ද සිල්වා ඇතුළු කණ්ඩායමක් මෙහෙයවති.
අමිල මලවිසූරිය