ජාත්‍යන්තර මූල්‍ය අරමුදලේ අරමුණු සමඟ තමන් එකඟ වන බවත් ඒ අතරම ජනතාවට සහන සැලසීම තම රජයේ අපේක්ෂාව බවත් ජනාධිපති අනුර කුමාර දිසානායක මහතා ජාත්‍යන්තර මූල්‍ය අරමුදලේ නියෝජිතයන් හමුවේ පැවසුවේය.
ජනාධිපති අනුර කුමාර දිසානායක මහතා, ජාත්‍යන්තර මූල්‍ය අරමුදල (IMF) සමඟ පසුගිය 4 වෙනිදා ජනාධිපති කාර්යාලයේ දී පවත්වන ලද දෙවන සාකච්ඡාවේදී මේ බව පැවසුවේය.
ජාත්‍යන්තර මූල්‍ය අරමුදල සමඟ වන වැඩසටහනේ තුන්වන සමාලෝචනයට අදාළ ඉදිරි කටයුතු සහ එහිදී ඇති විය හැකි ප්‍රමාදයන් මඟහරවා ගැනීමට ගතයුතු ක්‍රියාමාර්ග පිළිබඳව දෙපාර්ශ්වය විසින් එහිදී සාකච්ඡා කරන ලදි.
එබැවින් ජාත්‍යන්තර මූල්‍ය අරමුදල සමඟ වන වැඩසටහනේ ඉලක්ක සපුරා ගන්නා අතරම ජනතාව මත පැටවෙන පීඩනය ඉවත් කෙරෙන විකල්ප ප්‍රවේශයන් පිළිබඳව සැලකිලිමත් වෙමින් එම ඉලක්ක වෙත ළඟා වීම ජනාධිපතිවරයාගේ අරමුණ වී ඇත.
ජාත්‍යන්තර මූල්‍ය අරමුදලේ ආසියා පැසිෆික් දෙපාර්තමේන්තුවේ අධ්‍යක්ෂ ක්‍රිෂ්ණා ශ්‍රීනිවාසන්, ජ්‍යෙෂ්ඨ දූත මණ්ඩල ප්‍රධානී ආචාර්ය පීටර් බෲවර් යන මහත්වරු ඇතුළු ජාත්‍යන්තර මූල්‍ය අරමුදලේ ජ්‍යෙෂ්ඨ නියෝජිතයෝ සහ ශ්‍රී ලංකා නියෝජිත පිරිස මෙම සාකච්ඡාව සඳහා සහභාගි වූහ.
