කලාකරුවා කියන්නෙම රස සාගරයක්. ඔවුන්ගේ ඕනෑම අත්දැකීමක් ප්‍රේක්ෂකයාට තුටු පඬුරක් වගේ. නිර්මාණවලට අමතරව ඔවුන් කරන්නේ මොනවද ඔවුන්ගේ පෞද්ගලික තොරතුරු මොනවද? ඔවුන් ආස කරන්නේ මොනවටද මේ වගේ දේවල් දැනගන්න ඔවුන් ගොඩක් කැමැතියි. ඒ නිසාම අපි මේ දිනවල ඔවුන් කරන්නේ මොනවද කියල හොයලා බැලුවා. මේ අපිත් එක්ක එකතු වුණු කලාකරුවන් කිහිප දෙනකුගේ තොරතුරුයි.
මම අපේ මහගෙදර ඇවිත් ඉන්නේ
-රංගන ශිල්පිනී නයෝමි පෙරේරා
මේ දවස් ටික අපේ අලුත්ම වැඩේ ‘පාවී එන්න ආසයි‘ ටෙලි නිර්මාණයත් එක්ක තමයි වැඩිපුරම ගෙවෙන්නේ. ඊට අමතරව ‘බඹරෙක් ඇවිත්‘ සහ ‘සිත නිදි නෑ‘ ෂූටින් වැඩත් තියෙනවා. තව කමර්ෂල් වැඩ ටිකකුත් කෙරෙනවා. ඒත් එක්කම නත්තලත් ළඟ නිසා ඒ දේවල්වලටත් ප්ලෑන් කරමින් ඉන්නවා. මේ දවස් ටිකේ මං අපේ මහගෙදර ඇවිත් ඉන්නේ. එහේ ඉන්න මගේ බල්ලො පූසො ටිකත් එක්ක සතුටින් කාලය ගත කරනවා. ඒ වගේම මගේ අයියගේ බබත් එක්කත් කාලය ගත වෙනවා.
——————
‘ශේෂ’ අරන් මේ දවස්වල ලංකාවට ඇවිත් ඉන්නේ
– චිත්‍රපට අධ්‍යක්ෂ ඉසුරු ගු ණතිලක
දෙරණ චිත්‍රපට සම්මාන සඳහා ශේෂ නිර්දේශ වීමත් එක්ක මේ දවස්වල මං ලංකාවට ඇවිත් ඉන්නේ. පහුගිය 3 වැනිදා ශේෂ චිත්‍රපටය ගැන සාකච්ඡාවක් සහ පළමුවරට ලංකාවේ ප්‍රදර්ශනය වීම සිදු වුණා. ඊට කලින් ඔස්ට්‍රේලියාවේ සහ නවසීලන්තයේ ජාත්‍යන්තර ප්‍රදර්ශනයක් තිබුණා. මෙල්බර්න් සහ සිඩ්නි දර්ශන වාර දෙකට සම්බන්ධ වෙලා පැරිස් යන්නෙ නැතුව මං ලංකාවට ආවේ දෙරණ ෆිල්ම් අවෝඩ් එකට සහභාගි වෙන්නයි.
——————
පළමු සිනමා තිරපිටපත ‘කම්බිලි‘ නව කතාවක් විදිහට ලියනවා
– තිරපිටපත් රචක නිදුක් මධුෂික
මගේ කතා සංකල්පයකට අනුව මගේ අතින් දෙබස් හා තිර රචනය වුණු කම්බිලි මගේ පළමුවැනි සිනමා තිරපිටපත විදිහට පසුගියදා තිරගත වුණා. ඒකට ලැබුණු ප්‍රතිචාරත් එක්ක කම්බිලි නවකතාවක් විදිහට එළිදක්වන්න අදහස් කළා. මේ දවස්වල මම ඒක ලියමින් ඉන්නවා. ඉදිරියේදී ග්‍රන්ථයක් විදිහට එළිදක්වන්න බලාපොරොත්තු වෙනවා. මගේ අනෙක් ටෙලි නාට්‍ය තිරපිටපත් ලියන අතරේම තමයි කම්බිලි නවකතාව ලියැවෙන්නේ.
——————
මගේ මල් පැළවලට සාත්තු කරනවා
– රංගන ශිල්පිනි ප්‍රාර්ථනා සෙව්වන්දි
අලුත් නාට්‍යයක් පටන් ගත්තා ‘සංවරය‘ කියලා. ඒකෙ මං ප්‍රධාන චරිතයක් කරනවා. ‘සංවරය‘ ප්‍රියන්ත ප්‍රනාන්දු අයියගේ අලුත්ම වැඩේ. මං මෙතෙක් කරලම නැති වෙනස්ම චරිතයක්. ඉදිරියේදී ඒක බලාගන්න පුළුවන්. ඊට අමතරව මගේ මල් පැළ ටිකට සාත්තු කරගෙන ගෙදරට වෙලා පොඩ්ඩක් නිදහසේ ඉන්න ඕන කියලා හිතුණා. මම පුංචි කාලේ ඉඳලම මල් වවන්න හරි ආසයි.
