දෙපාවල වේදනාව, කැක්කුම, ඉදිමුම ඇති අයට කදිම ප්‍රතිකාරයක් සම්බන්ධව අද සාකච්ඡා කෙරේ. මේ ප්‍රතිකාර විදිය වඩා උචිත වන්නේ වයස අවුරුදු 35 ඉක්මවූවන්ටය. දියවැඩියා රෝගයෙන් පීඩා නොවිඳිනා රෝගියෙක් නම් ඔහුට හෝ ඇයට ඉක්මන් සුවය ළඟා කිරීමට මෙම ප්‍රතිකාරය සමත් වේ. 
දණහිස් ඉදිමුම, ඇවිදින විට සන්ධිවලින් වේදනාව උපදවන අතර ශබ්දයක් මතුවීම, නිරන්තර උණ ගතිය, අලස බව සහිත මෙම රෝගය ආතරයිටීස් හා සම්බන්ධ රෝගයකි.
නිර්දේශ කරන ප්‍රතිකාර, ආරම්භයට පෙර සහ ප්‍රතිකාරයෙන් අනතුරුව සී.එස්.ආර්. පරීක්ෂණය කිරීමෙන් මෙම ප්‍රතිකාරයේ විපුලත්වය තහවුරු කරගත හැකිය.
1 -කසාය.
ගං ඇපල මුල්, බෙලි මුල්, මිදි මුල්, තොටිල මුල්, පළොල් මුල්, ඇත් දෙමට මුල්, රසකිඳ, එරඬු මුල්, කලං එකකුත් මංචාඩි 12කුත් රැගෙන වතුර පත 08ක් දමා එක පතට සිඳුවා උදේට එඬරු තෙල් සමඟ ද, සවසට සීනි මී පැණි සමඟ ද දෙවේලක් පානය කළ යුතුය. මෙම බෙහෙත දින දෙකක් පානය කළ යුතුය. එම කසාය දෙනු ලබන්නේ විරේක වීම සඳහාය. එම කසාය දින දෙකක් පානය කර බඩ හොඳන් විරේක වූ පසු දෙවැනි කසාය වෙත යා යුතුය.
2- කසාය 
කොල්ලු, සුදු ලූනු, එඬරු මුල්, බෙලි මුල්, සිවිය මුල්, වියළි ඉඟුරු, ගම්මිරිස්, තිප්පිලි කලං එක හමාර බැගින් ගෙන වතුර පත 08ක් ගෙන පත එකකට සිඳුවා යවකාර ලුණු, සහිඳ ලුණු සහ සීනි දමා පත භාගය බැගින් උදේ සවස දෙවේලට කෑමට පෙර පානය කළ යුතුය. මෙම කසාය දින 08ක කාලයක් බීම කළ යුතුය.
තැවිල්ලක්
හීරැස්ස පලු, අබ, සුදුලූනු, වියළි ඉඟුරු සහ කොට්ටපොල් හීනියට කපා වංගෙඩියේ දමා කොටා පොට්ටනි බැඳ වණ්ඩුවේ දමා තම්බා තවන්න. තැවීමෙන් පසු චූලහර තෙල් සන්ධි සහ වේදනාව සහිත පාදවල ආලේප කරන්න.
මෙම ප්‍රතිකාර කරන කාලය තුළ මුං ඇට, මෑ කරල්, වම්බටු, පාන්පිටි ආහාරයෙන් වළකින්න. ශිතල ආහාර අගුණය. ඇල් වතුර ස්නානයෙන් වළකින්න.
