ජය සංකේත ගැන දැන ගන්න මෙවර ජන්ම අංක 4 හිමියන්
ඔබ උපන්නේ ඕනෑම මාසයක 4, 13, 22, 31 යන දිනයක නම් ඔබගේ ජන්ම අංකය වන්නේ අංක 4 යි. මේ ලිපියෙන් බලාපොරොත්තු වන්නේ ජන්ම අංක 4 හිමි ඔබගේ උපන් දිනයට අදාළ ජය සංකේත පිළිබඳව ඔබ දැනුම්වත් කිරීමටයි.
ඔබගේ උපන් දිනයට අදාළ ‘ජය සංකේත’ භාවිත කිරීමෙන් ඔබේ සාර්ථකත්වයත් ජයග්‍රහණයත් ඔබට අත්පත් කර ගැනීමට පහසුවෙන්ම හැකියාවක් පවතිනවා. මේ පිළිබඳව ඔබ උනන්දු වන කෙනෙක් නම් ඔබට මේ ලිපිය ඉතා වැදගත් වන අතර මෙහි සඳහන් කරුණු කාරණා අනුගමනය කිරීමෙන් ඔබේ කටයුතු සාර්ථකත්වයට පත්කර ගන්නට පහසුවක් සැලසේවි.
ජන්ම අංක හතරෙන් උපන් ඔබට ඔක්තෝබර් මුල සිට දෙසැම්බර් අවසානය දක්වා කාලය එතරම් යහපත් නැත. බාධා කරදර ඇති කළ හැකි බැවින් ප්‍රවේශම් විය යුතු කාලයකි. එමෙන්ම රුධිරගත රෝග, උදරය සහ පපුව ආශ්‍රිත රෝග තත්ත්ව, දණිස්, හන්දිපත්, ආදී ආබාධ, වකුගඩු සහ මුත්‍රා පද්ධතිය ආශ්‍රිත රෝග, මානසික ආතතිය, ස්වසන ආබාධ ආදිය පහසුවෙන් වැලඳිය හැකි අතර මේ පිළිබඳ කල් ඇතිව නිසි වෛද්‍ය උපදෙස් ගෙන ප්‍රවේශම්වීම ඉතා වැදගත් වෙයි.
ආදරය සහ ප්‍රේමය සම්බන්ධ කටයුතුවලදී හෝ ඔබට විවාහයට සහකරුවෙක් හෝ සහකාරියක් බලාපොරොත්තු වෙනවා නම් ජන්ම අංක 1, 4, 8 යන අංකවලින් උපන් අය ඔබට වඩාත් යහපත් වන අතර හොඳ, විශ්වසනීය, ශක්තිමත් සම්බන්ධතාවක් පවත්වාගෙන යාමට එය උපකාරී වෙයි. එමෙන්ම ඕනෑම මාසයක 13, 17, 22, 26, 28, 31 යන දිනයන් වල උපන් අයද ජූනි 10 සිට අගෝස්තු 30 දක්වා කාලය තුළ උපන් අය ද ඉතා ගැළපෙයි. යහපත් ව්‍යාපාරික සම්බන්ධතාවකට හෝ මිත්‍ර සම්බන්ධතාවයන් සඳහා ඕනෑම මාසයක 1,2,4,7,10,11,13,16,19,20,22,25,28,29,31 යන දිනයන්වල උපන් අය ඉතාමත් යහපත් ලෙස ඔබට ගැළපෙයි. මෙමගින් ඔබට විශ්වසනීයව කටයුතු කළ හැකි අතර ඔවුන්ගේ සහයෝගය වඩාත් හොඳින් ලබා ගැනීමට හැකියාව ලැබෙයි.
ඕනෑම මාසයක 1, 2, 4, 13, 22, 31 යන දින ඔබට වාසනාවන්ත දින වන අතර සඳුදා සහ සෙනසුරාදා වාසනාවන්ත දවස් වේ. මෙම දින සහ දවස් එක විට යෙදේ නම් වඩාත් සුබ පල ඇති කරයි. ඔබට හදිසියේ කිරීමට සිද්ධවෙන කටයුතු ගමන් බිමන් ආදිය මෙම දින සහ දවස්වල යොදා ගැනීම තුළ වඩා හොඳ ප්‍රතිඵල ලබා ගැනීමට හැකියාව ලැබෙයි.
ඔබට වාසනාව ගෙන දෙන වර්ණ වන්නේ කහ, නිල්, අළු සහ සුදු වර්ණයයි. මෙම වර්ණ ලේන්සු ජනෙල් දොර තිර ඇඳ ඇතිරිලි කොට්ට උර මේස රෙදි කාමරවල බිත්ති කෘත්‍රිම ආභරණ ආදී හැකි සෑම අවස්ථාවකදීම යොදා ගැනීම තුළින් සෞඛ්‍යයත් මානසික සුවයත් ආරක්ෂාවත් සලසා ගත හැකිය.
4, 13, 22, 31, 40, 49, 58, 67 යන වර්ෂ ඔබේ ජීවිතේ ඉතා සුවිශේෂී වැදගත් වර්ෂ බවට පත්වේ. ජීවිතයේ වැදගත් සැලසුම් මේ වර්ෂවල යොදා ගැනීම ඉතා සාර්ථක වේ. ඕනෑම වර්ෂයක ජූලි මාසය සහ අගෝස්තු මාසය ඔබට සමෘද්ධිමත් මාස වේ.
ඔබ වාහනයක් මිලදී ගන්නේ නම් වාහන අංකය තනි අංකයක් ලෙස එකතු කළ පසු 1, 4, සහ 8 වේනම් යහපත් වෙන අතර ගමන් බිමන් සාර්ථකත්වය සහ ආරක්ෂාව සැලසේ. එමෙන්ම වාහනයේ වර්ණය සඳහා ඔබට සුබ වර්ණයක් ද තෝරා ගැනීම වඩාත් යහපත් පල ඇති කරයි. ඔබට සුබ පල දෙන ලෝහය තඹ වන අතර තඹ වළල්ලක් කාන්තාවක් නම් වම් අතේ ද පිරිමියෙක් නම් දකුණු අතේ ද පැලඳීම සුබයි. හැකි සෑම විටම මේ දේවල් අනුගමනය කර ඔබේ සාර්ථකත්වයත් ජයග්‍රහණයත් මානසික සුවයත් උදාකර ගන්න.
ජන්ම අංක පහෙන් උපන් ඔබගේ ජය සංකේත ලබන කලාපයෙන් බලාපොරොත්තු වන්න.
