නවසීලන්ත පිතිකරු මාර්ටින් ගප්ටිල් ජාත්‍යන්තර ක්‍රිකට් පිටියෙන් සමු ගැනීම නිල වශයෙන් තහවුරු කරයි. නිවේදනයක් නිකුත් කරමින් ඔහු සිය විශ්‍රාම ගැනීමේ නිවේදනය දැනුම් දී ඇත.
ඒ, ඔහු අවසන් වරට 2022 වසරේ ඔක්තෝබර් මාසයේදී ජාත්‍යන්තර තරගයක් ක්‍රීඩා කර ඇති පසුබිමකය.
38 හැවිරිදි ඔහු ජාත්‍යන්තර පිටියට සමු දුන්න ද ඉදිරියටත් ෆ්‍රැන්චයිස් T20 ලීග් තරගාවලි ක්‍රීඩා කිරීමට සූදානමින් පසුවේ.
ගප්ටිල් නවසීලන්තය වෙනුවෙන් ටෙස්ට් තරග 47 ක්, එක්දින තරග 198 ක් හා විස්සයි 20 තරග 122 ක් ක්‍රීඩා කර ඇති අතර, එහිදී පිළිවෙලින් ලකුණු 2,586, 7,346 හා 3,531 රැස් කර තිබේ.
2009 වසරේදී ජාත්‍යන්තර ක්‍රිකට් පිටියට පිවිසි ගප්ටිල් 2015 හා 2019 ලෝක කුසලාන තරගාවලියන්හීදී නවසීලන්තයේ ප්‍රධාන ක්‍රීඩකයෙකු ලෙස ද කටයුතු කළේය.
2015 ලෝක කුසලාන තරගාවලියේදී ඔහු කොදෙව්වන්ට එරෙහිව වාර්තා කළ ලකුණු 237 එක්දින ජාත්‍යන්තර තරගයකදී පිතිකරුවෙකු වාර්තා කළ දෙවැනි ඉහළම ලකුණු සංඛ්‍යාවයි.
2019 ලෝක කුසලාන තරගාවලියේ සුපිරි පන්දුවාරයේ අවසන් පන්දුවට මුහුණ දීමට සිදු වූ ඔහුට ජයග්‍රහනය සදහා එම පන්දුවට අවශ්‍ය වූ ලකුණු දෙක රැස් කිරීමට නොහැකි වුණේ නවසීලන්තයට පිට පිට දෙවැනි වරටත් අනුශූරතාවය හිමි කර දෙමින්ය.
