කෘතිය – මැද මිදුල
කර්තෘ – නිහාල් ගුණවර්ධන
මිල – රු. 600/=
කර්තෘ ප්රකාශනයකි
කලක් තිස්සේ කවි ලියන නිහාල් ගුණවර්ධන කවි රචනා තරගවලදී බොහෝ ජයග්රහණද හිමි කරගත් අයෙකි. මේ ඔහුගේ ප්‍රථම කාව්‍ය සංග්රහයයයි. නිහාල්ගේ අත්දැකීම් විවිධය. ඒ ඔස්සේ ඔහුගේ නිර්මාණ විවිධ ලෙස ලියවී ඇත. ඇතැම් නිර්මාණවල භාෂාව සැර වැඩිදැයි විටෙක අපට සිතේ. අම්මා නැති කල කුඩම්මාගේ රැකවරණය ලබන දරුවකුට සිය මවගෙන් මෙන් ආදරය කරුණාව දයාව ලැබෙන්නේ නැත. මාතෘකාව – ‘කුඩම්මා’:
‘සඳ ළඟට ගෙන
ඉර පයින් මැඬ
ගෙයි පහන නිවලා
කළුවරේ ලැග හිඳින්නී…
අම්මා නැති මගෙ
කනින් ඇද ඇද
පිලට පැදුරක්
විසි කරන්නී…’
කියා පටන් ගන්නා කවිය ඔහු ලියන්නේ කුඩම්මාගේ තිබෙන නපුරු ගති පැවැතුම්ය. ඇගේ නපුරුකමය. සැමියා මියගිය පසු බිරියකට සිදු වන්නේ ජීවිත කාලයම තනි වන්නය. ඇතැම්විට මිනිසුන් එන්නේ ඇගේ දුක බැලීමට නොව, ඇයට ළං වීමටය. අද සමාජයේ මෙවැනි අත්දැකීම් බහුලය. සැමියා මියගිය කාන්තාවගේ නිවෙසට එන පුද්ගලයා ගැන කවියා ප්‍රශ්න කරන්නේ, ඒ දෙවියෙක් විමට ද පුළුවන් කියාය. මාතෘකාව – ‘පාදඩයා’:
‘සුදු කොඩියවත් ගැලෙව්වේ නෑ තව
ඇස් තියෙනවා නම් බලාපන් දෙවියනේ
ඒ එන්නේ කවුදැයි කඩුල්ල පැන
සුදු කොඩිය යටින්…
තිරිසනෙක් ද?
යක්ෂයෙක් ද?
භූතයෙක් ද?
‘නෑ නෑ ඒ පාදඩයෙක්.’
‘පාදඩයෙක්?’
‘ඔව් පාදඩයෙක්.’
‘පාදඩයෙකුට බැරි ද දෙවියනේ
දෙවියෙක් වෙන්න?’
අලි ඇතුන් නැති පෙරහරක් දැකිය නොහැකිය. එදා මෙදාතුර පෙරහරේ ගිය අලි ඇත්තු බොහෝය. එහෙත් සතකුට වුව නිදහස තිබිය යුතුය. නිදහසක් නැතිවිට සතා වුවත් හිදින්නේ සැනසිල්ලක නොවේ. මාතෘකාව – ‘තවත් කඳුළක්’:
‘ඉරුණු සාඨක ඇඳගෙන
විලංගුවෙන්,
මගේ අතපය බැඳගෙන
හෙණ්ඩුවෙන්,
මගේ නිලයට ඇන ඇන
කොහොම යන්නද මං පෙරහරේ
ධාතු කරඬුව අරගෙන..?’
මෙහි දැක්වූ නිර්මාණවලට අමතරව නිහාල් ගුණවර්ධන කවියා ‘මැදමිදුල’ කාව්‍ය සංග්රහය මඟින් සමාජ අසාධාරණකම්, කාන්තා හිංසනය ගැන මෙන්ම පවුල් ජීවිතයේ විවිධ පැතිකඩ ඔස්සේ තම විග්රහය ඉදිරිපත් කිරීමට සමත්කම් දක්වා ඇත.
ඉසවි
