හිමිදිරි උදෑසන ඇයගේ මිහිරි හඬින් ‘සෙංකඩගලපුර දළදා බුදු රැස්’ සිතින් දකිමින් පහන් වූ සිතින් දවස ඇරඹූ යුගයක් අපට තිබිණි. ‘පින්න මල් පිපී’, ‘කන්ද උඩින් හඳ පායන ලීලා’, ‘බැද්ද පුරා සුදු රෙද්ද වගෙයි අද’, ‘අනෝතත්ත විල’, ‘සබඳ ඔබේ හද අංජලීකරණීයයි’, ‘විලක නෙළුම් මට කුමටද’, ‘හිරු කුමරුයි සඳ කුමරියි ඉස්සර කාලේ’, ‘ආදර චාරිකා ජීවන චාරිකා’ ආදි ගී රැසක හිමිකාරිනිය වන ඇය අමිතා වැදිසිංහ නම් වන්නීය.
1954 වසරේදී ශ්‍රී ලංකා ගුවන්විදුලි සංස්ථාවේ ශිල්පීය වැඩසටහන් මඟින් සිය සංගීත දිවිය අරඹන ඇය මෙරට සංගීත ක්ෂේත්‍රයේ සුවිශේෂ ලකුණක් තැබූ අයෙකි. නුගේගොඩ අනුලා විද්‍යාලයෙන් ඉගෙනුම ලැබු ඇය පාසල් වියේ සිටම කලාවට සම්බන්ධ වුවාය. ආධුනික ගී වැඩසටහනකට සහභාගි වීමෙන් ප්‍රථම ස්ථානය දිනූ අමිතා ගීත ගායනයට යොමු කරවන්නේ රෝහිත විජේසූරිය නම් වූ සංගීත ශිල්පියාය. ‘රන්මුතුදූව’ චිත්‍රපටයේ සමූහ ගායනට එක් වෙමින් සිය ගමන ආරම්භ කළ ඇය මිය යන විට ගීත 800ක් පමණ ගායනා කර තිබිණි.
වීරකැටිය මහා විද්‍යාලය, අශෝක විද්‍යාලය, පිඹුර මහා විද්‍යාලය, බුලත්සිංහල විද්‍යාලය, පාණදුර පින්වත්ත මහා විද්‍යාලය, පාණදුර රාජකීය විද්‍යාලය සහ සද්ධර්මෝදය විද්‍යාලය යන පාසල්වල ගුරුවරියක ලෙස සේවය කර, පසුව රජයේ පාසල් සංගීත අධ්‍යක්ෂවරියක ලෙසද ඇය කටයුතු කළාය.
අමිතා වැදිසිංහ වික්ටර් දළුගම සංගීතවේදීයා සමඟ යුග දිවියට එළඹි අතර, දරු දෙදෙනකුගේ මව වූවාය. ඇය මියයන විට 82 වැනි වියේ පසු වූවාය
