හිටපු පොලිස්පති දේශබන්දු තෙන්නකෝන් අත්අඩංගුවට ගෙන අධිකරණයට ඉදිරිපත් කරන ලෙස මාතර මහේස්ත්‍රාත් අධිකරණය ඉකුත් සිකුරාදා (28) නියෝග කර තිබේ. මේ අතර ඔහු එදින රාත්‍රිය වන විට තම පෞද්ගලික ආරක්ෂක නිලධාරියා නිවෙසේ රඳවා, පොලීසිය මඟහැර සැඟව සිටින බවට වාර්තා විය.
දේශබන්දු තෙන්නකෝන්, සහ කොළඹ අපරාධ කොට්ඨාසයේ ස්ථානාධිපති ඇනස්ලම් ද සිල්වා ඇතුළු සැකකරුවන් 6 දෙනකු එසේ අත්අඩංගුවට ගෙන අධිකරණයට ඉදිරිපත් කිරීමට නියෝග කර ඇත්තේ 2023 වසරේ දෙසැම්බර් 31 දින වැලිගම පැලෑන ප්‍රදේශයේ W15 හෝටලය ඉදිරිපිට සිදු වූ වෙඩි තැබීමේ සිද්ධියක් සම්බන්ධයෙන් කෙරෙන විමර්ශනයට අදාළවය. මේ සම්බන්ධයෙන් 6314 / 23 නඩු අංකය යටතේ සිදු කෙරෙන නීතිමය කටයුත්තට අදාළව මාතර මහේස්ත්‍රාත් අධිකරණය විසින් සැකකරුවන් අත්අඩංගුවට ගැනීමේ නියෝගය නිකුත් කර ඇත්තේ මනුෂ්‍ය ඝාතනයක් සඳහා කුමන්ත්‍රණය කිරීමේ චෝදනාව යටතේය.
