උඩින් පවතින නීත්‍යනුකූල රජයට යටින් යටිබිම්ගත අපරාධ රාජ්‍යයක් පවතින බවත්, ආණ්ඩුව ඒ යටිබිම්ගත අපරාධ රාජ්‍යය සමඟ හැප්පී එය මුළුමනින් අවසන් කරන බවත්, යළිත් රට තුළ ජාතිවාදය සහ අන්තවාදය හිස එසවීමට කිසි සේත් ඉඩ නොදෙන බවත් ජනාධිපති අනුර කුමාර දිසානායක මහතා පැවසීය. ඔහු මේ බව ප්‍රකාශ කළේ ආරක්ෂක අමාත්‍යාංශය, මහජන ආරක්ෂාව හා පාර්ලිමේන්තු කටයුතු පිළිබඳ අමාත්‍යාංශවල වැය ශීර්ෂ පිළිබඳ ඉකුත් සිකුරාදා පැවති පාර්ලිමේන්තු විවාදයේ පිළිතුරු කතාව කරමිනි.
රට තුළ එකවිට අපරාධ කල්ලි ඒකාබද්ධව ක්‍රියා කිරීම පිටුපස සැලසුම් සහගත කුමන්ත්‍රණයක් ඇති බවද, පාතාල ගැටුම් විසින් සමාජය තුළ යම් භීතියක් නිර්මාණය වුවත් සාමාන්‍ය පුරවැසියන්ට තම දෛනික කටයුතු පවත්වාගෙන යෑම සඳහා බාධාවක් හෝ තර්ජනයක් මතුව නැති බවද ජනාධිපතිවරයා අවධාරණය කළේය. සංවිධානාත්මක අපරාධ කල්ලි යනු හුදු අපරාධකරුවන්ගේ එකතුවක් පමණක් නොවන බවත්, එය කාලාන්තරයක් මුළුල්ලේ ඉතා නිදැල්ලේ දේශපාලන රැකවරණ මත වර්ධනය වූවක් බැවින් එම අපරාධ කල්ලි පිටුපස සිටින්නේ කවර දේශපාලන නායකත්වයද යන්න ජනතාව හොඳින් දන්නා බවත් පැවසූ ජනාධිපතිවරයා අද අපරාධ කල්ලිවල වර්ධනය පිළිබඳ කිඹුල් කඳුළු හෙළන අය එදා ඒ කල්ලි පෝෂණය කරමින් ආරක්ෂා කළ බවද සඳහන් කළේය.
සංවිධානාත්මක අපරාධ සහ අන්තවාදි ප්‍රවණතා පාලනය සඳහා සාමාන්‍ය නීතිය ඉක්මවා අලුත් නීතියක් අවශ්‍ය බැවින් ත්‍රස්තවාදය වැළැක්වීමේ පනත අහෝසි කිරීමට සූදානම් බවත්, ඒ සඳහා කමිටුවත් පත් කර අධ්‍යයනය කරමින් සිටින බවත්, දශක ගණනාවක සිට ජනතාවගේ වුවමනාව වූ එය යථාර්ථයක් බවට පත් කරන්නේ තම ආණ්ඩුව පමණක් බවත් ඔහු මෙහිදී පැවසීය.
