වර්තමානයේ අයිසීසී ශූරයන්ගේ කුසලානයේ අයිතිකරුවන් වන පාකිස්තානු කණ්ඩායමට තම රටේ සත්කාරත්වයෙන් පැවැත්වෙන ශූරයන්ගේ කුසලාන තරගාවලියේදී (ICC Champions Trophy) මූලික වටයෙන්ම ඉවත් වීමට සිදු වී ඇත. නවසීලන්තය හා ඉන්දියාව ඉදිරියේ මූලික වටයේදී මුහුණ දුන් පළමු තරග දෙකෙන්ම පරාජයට පත් වීම ඊට හේතු වී ඇති අතර, සත්කාරක පාකිස්තානයට තරග කාලසටහනට අනුව තව එක් තරගයක් ඉතිරිව ඇත්තේ එම කාණ්ඩයෙන්ම හිස් අතින් ගෙදර යෑමට සිදුව ඇති බංගලාදේශය සමඟය.
මේ ශූරයන්ගේ කුසලාන ක්‍රිකට් තරගාවලියට වසර 8ක නොනගත කාලයක් උදා වීම හේතුවෙන් කුසලානය වසර 8ක්ම තම සන්තකයේ තබාගන්නට පාකිස්තානයට අවස්ථාව ලැබුණද, ඉන් පසු සටනට ආ පළමු මොහොතේදීම නවසීලන්තය ඔවුන්ට හරස් වූ අතර, දෙවැනියට හමු වූයේ ලොව දේශපාලන පරම සතුරා වන ඉන්දියාවයි. එහෙත් මේ සතුරු රටවල් දෙක හමු වන්නේ ක්‍රිකට් ක්‍රීඩාංගණයේදී පමණක් වුවද එම තරගයට හෝ පාකිස්තානයට යන්නට මෙවරත් ඉන්දියාව කැමැති වූයේ නැත. ඒ නිසාම මේ තරගාවලියේදී ඉන්දියාව සහභාගි වන සියලු තරග (අවම වශයෙන් 4ක්) ඩුබායි ක්‍රීඩාංගණයේදී පැවැත්වෙන අතර ‘ඒ’ කාණ්ඩයේ ක්‍රීඩා කරන ඉන්දියාව සහ නවසීලන්තය වේලාසනින්ම අවසන් පූර්ව වටයට සුදුසුකම් ලබා ඇත.
සත්කාරක පාකිස්තානයෙන් ශූරයන්ගේ ක්‍රිකට් කිරුළ ගැලවුණද, 9 වැනි වරටත් පැවැත්වෙන එක් දින පිරිමි ක්‍රිකට් ලෝක කුසලානයට පමණක් දෙවැනි වන මේ තරගාවලියේදී පළමු තරගයේ සිටම ඉතිහාසය වෙනස් කරන්නට ක්‍රීඩකයෙන්ගේ දක්ෂතා ඉදිරියට එන බවක් පෙනේ. එනම් පසුගිය පෙබරවාරි 26 දා එංගලන්තය හා ඇෆ්ගනිස්තානය අතර පැවති තරගයේදී ඇෆ්ගනිස්තාන කණ්ඩායමේ ආරම්භක පිතිකරු ඊබ්‍රහීම් සඩ්රාන් පන්දු 146කින් ලකුණු 177ක් රැස් කරමින් මේ ශූරයන්ගේ කුසලාන තරගාවලි ඉතිහාසයේ පිතිකරුවකු රැස් කළ ඉහළම ලකුණු සංඛ්‍යාව වාර්තා කරන්නට සමත් විය. ඊබ්‍රහීම් එසේ බිඳදැමුවේ ඊට දින 4කට පෙර මේ තරගාවලියේදීම එංගලන්ත කණ්ඩායමේ බෙන් ඩකට් ඔස්ට්‍රේලියාවට එරෙහිව පන්දු 143කදී ලබාගත් ලකුණු 165ක වාර්තාවයි. 
එසේ පෞද්ගලික ඉහළම ලකුණු රැස් කළ පිතිකරුවන් 10 දෙනා අතර 9 වැනියා වන්නේ ශ්‍රී ලංකාවේ කුමාර් සංගක්කාරයි. ඔහු 2013 වසරේදී එංගලන්තයේ ඕවල් ක්‍රීඩාංගණයේදීම නොදැවී ලකුණු 134ක් රැස් කළ අතර, ඒ දක්ෂ පිතිකරුවන්ගේ ලැයිස්තුවේ 10 වැනි ස්ථානය නොදැවී ලකුණු 133 ලබා සිටි කොදෙව් දූපත්හි ක්‍රිස් ගේල්ට හිමි වෙයි. තවද, මේ ශූරයන්ගේ කුසලාන තරග ඉතිහාසයේ කණ්ඩායමක් රැස් කළ ඉහළම ලකුණු සංඛ්‍යාව වාර්තා කිරීමට මෙවර ඔස්ට්‍රේලියාව සමත් විය. ඔවුන් මේ දස්කම කළේ ඒ මඟින් තවත් නව වාර්තාවක්ද පිහිටුවමිනි. එනම්: එංගලන්තයට එරෙහි තරගයේදී එංගලන්තය කඩුලු 8ක් දැවී රැස් කළ ලකුණු 351 පසු කරමින් කඩුලු 5කට ලකුණු 356ක් රැස් කළ ඔස්ට්‍රේලියානු කණ්ඩායම මේ තරගාවලි ඉතිහාසයේ කණ්ඩායමක් හඹා ගොස් ජය ගත් ඉහළම ලකුණු සංඛ්‍යාවේ වාර්තාවටද හිමිකම් කීය.
ඒ අනුව අයිසිසී ශූරයන්ගේ කුසලාන තරගාවලියේ මෙසේ කණ්ඩායමක් ලැබූ ඉහළම ලකුණු ලැයිස්තුවේ ශ්‍රී ලංකාවට 8 වැනි ස්ථානය හිමිවන්නේ 2017 වසරේදී ඉන්දියාවට එරෙහිව එංගලන්තයේ ඕවල් හිදී කඩුලු 3කට ලකුණු 322ක් රැස් කළ නිසාය. ඒ තරගයේදී කුසල් මෙන්ඩිස් වීරයා වූ අතර (පන්දු 93කින් ලකුණු 89ක් ලබා), එවකට ඒ ජයග්‍රහණය මේ තරග ඉතිහාසයේ කණ්ඩායමක් හඹා ගොස් ලද ඉහළම ලකුණු සංඛ්‍යාව ලෙසද එය වාර්තා විය. කෙසේ වෙතත් ඉහළම ලකුණු රැස් කළ කණ්ඩායම් අතර 7 වැනි ස්ථානයට එන්නට මෙවර කෝඩුකාරයන් ලෙස පැමිණි ඇෆ්ගනිස්තානය සමත් වුණේ පසුගිය 26 දා එංගලන්තයට එරෙහිව ලකුණු 325ක් රැස් කිරීම නිසාය. එය එංගලන්තයට එරෙහිව ඇෆ්ගන්ස්ලා එක්දින තරග ඉතිහාසයේ ලබා ගත් 2 වැනි ජයග්‍රහණයද වන අතර, මේ තරග ඉතිහාසයේ වැඩිම ලකුණු රැස් කරගත් පිතිකරුවා වන්නේ ක්‍රිස් ගේල්ය. ඔහු ඉනිම 17කදී (2003–2013) ලකුණු 791ක් (වැඩිම ලකුණු 133 නොදැවී) එකතු කරගෙන ඇති අතර, ඒ වැඩිම ලකුණු සටහනේ දෙවැන්නා වන්නේ මහේල ජයවර්ධනය. මහේල ඉනිම 21 කදී (2000 – 2013) මුළු ලකුණු 742 ක් (වැඩිම ලකුණු නොදැවී 84ක්) ලබාගෙන ඇත.
ඒ ලැයිස්තුවේ ඉන්දියාවේ ශිකර් ධවාන් 3 වැන්නාද කුමාර් සංගක්කාර 4 වැන්නාද (2000-2013 ඉනිම 21කදී ලකුණු 683) වන විට ඉන්දියාවේ සව්රව් ගංගුලි 5 වැනි ස්ථානයේ සිටී. පන්දු යැවීමේ අංශයෙන් ගත හොත් මේ ශූරයන්ගේ කුසලාන තරග ඉතිහාසයේ (2002-2013) වැඩිම කඩුලු දවාගෙන ඇත්තේ නවසීලන්තයේ කයිල් මිල්ස්ය. ඔහු තරග 15කදී කඩුලු 28ක් දවාගෙන ඇති අතර, 2006-2017 කාලවකවානුවේ ක්‍රීඩා කළ ලසිත් මාලිංග තරග 16කදී කඩුලු 25ක් දවාගෙන ඒ ලැයිස්තුවේ දෙවැන්නා වී ඇත. එසේම මුත්තයියා මුරලිදරන් 3 වැනි ස්ථානයට පත් වන්නේ මේ එක් දින තරග 15කදී (1998-2009) කඩුලු 24ක් දවාගෙන ඇති නිසාය.
කෙසේ වෙතත් මෙවර 9 වැනි වරටත් පැවැත්වෙන අයිසීසී චැම්පියන්ස් කුසලාන තරගාවලියෙදී මේ සටහන තබන මොහොත වන විට මූලික වටයේ තරග 12න් තරග 8ක් නිමා වී ඇති අතර, ශතක 11ක් සහ අර්ධ ශතක 15ක් වාර්තා වී ඇත. තවද, සෑම තරගයකදීම ශතක 1ක් හෝ 2ක් සටහන් වූ අතර, එනිසාම පිතිකරුවන්ට යෝග්‍ය තණතීරු ලැබී ඇති මෙවර තරගාවලියේදී පන්දු යවන්නන්ට වඩා පිතිකරුවන් තවත් වාර්තා අතරට යෑමට ඉඩ ඇත. මේ වන විටත් ඉන්දියාවේ විරාත් කෝලි මේ තරගාවලියේදී තවත් ශතකයක් වාර්තා කිරීමත් සමඟ එක්දින ලකුණු 14,000 සීමාව පසු කළේ (ඉනිම 287කදී) ඒ කඩඉම වේගයෙන්ම පසු කළ පළමුවැන්නා ලෙසයි. ඒ 14,000 සීමාව පැන්නූ වේගවත් බව අතින් සචින් තෙන්දුල්කාර් 2 වැන්නා (ඉනිම 350කදී) වන විට, 3 වැන්නා වන්නේ (ඉනිම 378කදී) කුමාර් සංගක්කාරයි.
