විදේශ සේවා නියුක්ති කාර්යාංශය විසින් විදේශ රැකියා ඒජන්සි ආයතන නියාමනය කළ යුතු වුවත් එසේ නොකර එම ආයතන හරහා සංචාරක වීසා මඟින් විදෙස්ගත වන අයට අනුමැතිය දීමෙන් මිනිස් ජාවාරමට අනුබල දී ඇති බව කෝප් කමිටුවේදී හෙළි වී ඇත. 2022 හා 2023 වසරවල සංචාරක වීසා මඟින් විදේශගත වීමට එසේ අවසර දෙන අතරම එතෙර තානාපති කාර්යාලවලට කාර්යාංශය විසින් දැනුම් දී ඇත්තේ සංචාරක වීසා මඟින් විදේශගතව රැකියා පිණිස එන අයට රැකවරණ නිවාසවල ආරක්ෂාව සැපයීමට කටයුතු නොකරන ලෙසයි.
මේ තත්ත්වය මෙරට විගමනිකයන්ගේ ජීවිතවලට බරපතළ තර්ජනයක් බව කෝප් කමිටුවේදී අනාවරණය වී තිබේ. ඒ සම්බන්ධයෙන් කඩිනම් පියවර ගැනීම වෙනුවෙන් විදේශ සේවා නියුක්ති කාර්යාංශ පනත වහා සංශෝධනයට ලක් කළ යුතු බවට කෝප් කමිටුව විසින් නිර්දේශ ඉදිරිපත් කර ඇත.
විදේශ සේවා නියුක්ති කාර්යාංශ පනතට අනුව එහි අධ්‍යක්ෂ මණ්ඩලය 12 දෙනකුගෙන් සමන්විත අතර, ඊට විදේශ සේවා නියුක්ති කාර්යාංශයේ අධ්‍යක්ෂ මණ්ඩලයට අමතරව මුදල් අමාත්‍යාංශයේ එක් නිලධාරියෙක්, කාන්තා හා ළමා කාර්යාංශය, විදේශ අමාත්‍යාංශයේ නිලධාරීන් මෙන්ම විදේශ රැකියා ඒජන්සි ආයතන 4ක නියෝජිතයෝද ඇතුළත් වෙති. එබැවින් ඒජන්සිවලට යම් හෝ අගතියට පත් වන කිසිදු තීරණයක් වෙනුවෙන් එළඹීමට හැකියාවක් නැති බවද අනාවරණය වී ඇත.
මේ හේතුවෙන් නව පනතට අනුව ඒජන්සිවල නියෝජිතයන් ඉවත් කිරීමට කටයුතු කිරීමට උපදෙස් දී ඇත. එමෙන්ම අදාළ ඒජන්සිකරුවන් පත් කිරීමේ බලයද ඇමැතිවරයා සතුව ඇති අතර, ඇමැතිවරයාට හිමි අසීමිත බලතලද ඉවත් කිරීමට කෝප් කමිටුව විසින් නිර්දේශ කරනු ලැබ තිබේ.
එමෙන්ම විදේශ රැකියා පිණිස යන අය සම්බන්ධ දත්ත ගබඩා කිරීම පවා නිසි ලෙස සිදුව නැති බවද අනාවරණය වී තිබේ. විශාල දූෂණ හා අවභාවිතයන් රැසක් කාර්යාංශය හරහා සිදුව ඇති බැවින් පසුගිය කාලයේ එම සිදුවීම්වලට සම්බන්ධ වූ නිලධාරීන්ට නිසි දඬුවම් පැනවීමට පියවර ගන්නා ලෙසද කෝප් කමිටුවේ සභාපති පාර්ලිමේන්තු මන්ත්‍රී වෛද්‍ය නිශාන්ත සමරවීර විසින් නිර්දේශ කරනු ලැබ තිබේ.
