වසර 16කට පසු පැවැත්වෙන දළදා දැක්ම සම්බන්ධයෙන් මේ වන විට රට තුළ ඇතිව තිබෙන දැඩි උද්‍යෝගය මත ලක්ෂ 20-25ත් අතර පිරිසක් මහනුවරට පැමිණෙනු ඇතැයි අපේක්ෂිත අතර, ඔවුන් අතුරින් වැඩි පිරිසකට දළදා වහන්සේ දැක වැඳපුදා ගැනීමට අවස්ථාව සලසා දීම සම්බන්ධයෙන් මල්වතු අස්ගිරි උභය මහා විහාරීය මහානායක ස්වාමීන්ද්‍රයන් වහන්සේ ප්‍රමුඛ විංසත් වර්ගික කාරක සංඝ සභාවන්ගේ සහ දියවඩන නිලමේතුමන්ගේ අවධානය යොමුව තිබේ.
පැමිණෙනු ඇතැයි අපේක්ෂිත අධික ජන සංඛ්‍යාව සැලකිල්ලට ගෙන, දළදා දැක්ම තවත් දින කිහිපයකින් දීර්ඝ කළ යුතු බවටද යෝජනා වී තිබෙන අතර, මෙතෙක් ඒ සම්බන්ධයෙන් අවසන් නිගමනයකට එළඹ නැත. මේ වන විට සිදු කර තිබෙන ගණනය කිරීම් අනුව දළදා දැක්ම දෛනිකව පැවැත්වෙන පැය 6කට ආසන්න කාලයේදී තත්ත්පරයකට තිදෙනා බැගින් වන්දනා මාන කරනු ඇතැයි අපේක්ෂා කළද පැය 6 තුළ උපරිම වශයෙන් වන්දනා කිරීමට අවස්ථාව ලැබෙන්නේ 65,000කට ආසන්න පිරිසකටය. ඒ අනුව එක් දිනකදී පෝලීම්වලට එකතු වන ලක්ෂ 2ක පමණ පිරිසෙන් 135,000ක පමණ පිරිසකට දළදා දැක්ම දැක බලා ගැනීමට නොහැකි වීම මේ වන විට සංවිධායකයන්ගේ දැඩි අවධානයට ලක් වී ඇත.
පෝලිම්වල රැඳී සිටිමින් රැය පහන් කරන බැතිමතුන් වෙනුවෙන් දන්සල් රැසක් ක්‍රියාත්මක අතර, ශ්‍රී දළදා මාලිගාව මඟින් එක් ස්ථානයකදී 15,000කට බැගින් ස්ථාන දෙකකදී 30,000කට දෛනිකව රාත්‍රී ආහාරය පිරිනැමීම ඉන් ප්‍රධානය.
බැතිමතුන්ට අපහසුවකින් තොරව දළදා වහන්සේ දැක වැඳ පුදා ගැනීම සඳහා ගතයුතු ක්‍රියාමාර්ග සම්බන්ධයෙන් ජනපති ප්‍රධානත්වයෙන් මහනුවර ජනපති මන්දිරයේදී සාකච්ඡාවක්ද පැවති අතර, ආරක්ෂක රාජකාරි සඳහා ත්‍රිවිධ හමුදාවට අමරතව පොලිස් නිලධාරීන් 10,000ක් යෙදවීමට තීරණය වී තිබේ.
ආරක්ෂක රාජකාරි සඳහා මහනුවරට පැමිණෙන පොලිස් නිලධාරීන්ට නවාතැන් පහසුකම් සැලසීමට පාසල් කිහිපයක් ලබාගැනීමත්, ඒ කාල සීමාවේ ලක්ෂ සංඛ්‍යාත ජනතාවක් මහනුවරට නගරයට පැමිණීමත් සැලකිල්ලට ගෙන, නගර සීමාවේ සියලු පාසල්වලට අප්‍රේල් 28 දින දක්වා නිවාඩු දීමට තීරණය කර තිබෙන බව මධ්‍යම පළාත් ආණ්ඩුකාර සරත් අභයකෝන් මහතා පැවසීය.
