පසුගිය කාලයේදී නීති විරෝධීව මෙරටට රැගෙන ඒමට තැත් කිරීමේදී ශ්‍රී ලංකා රේගු නිලධාරීන් විසින් අත්අඩංගුවට ගත් රු.බි. 1.2කට අධික වටිනාකමින් යුත් විදෙස් දුම්වැටි මිලියන 8.7ක් පසුගිය 4 දා රේගු නිලධාරීන්ගේ අධීක්‍ෂණය යටතේ විනාශ කිරීම ආරම්භ කරනු ලැබීය. ඩුබායි, පකිස්තානය හා චීනය යන රටවල්වලින් ආනයනය කරන ලද, 2024 2022 හා 2018 වසරවල රේගුව විසින් අත්අඩංගුවට ගනු ලැබූ විදෙස් දුම්වැටි තොගයක් විමර්ශනවලින් අනතුරුව රාජසන්තක කිරීමෙන් පසු මෙලෙස විනාශ කිරීම ඇරඹූ බවත්, මේ දුම්වැටි රේගුවෙන් පිට වූවා නම් රජයට අහිමි වීමට තිබූ තීරුබදු මුදල රු.බි. 1.8කට අධික බවත්, පසුගිය වසරේදී ලංකාවේ නිෂ්පාදිත දුම්වැටි සඳහා නිෂ්පාදිත බදු වශයෙන් රු.බි. 141ක් රජයට එකතු කර දී තිබෙන බවත් රේගු මාධ්‍ය ප්‍රකාශක අතිරේක රේගු අධ්‍යක්‍ෂ ජනරාල් සීවලී අරුක්ගොඩ පැවසීය. රේගු අධ්‍යක්‍ෂ ජනරාල් සංජීව නෝනිස්, රේගු මාධ්‍ය ප්‍රකාශක අතිරේක රේගු අධ්‍යක්‍ෂ ජනරාල් සීවලී අරුක්ගොඩ මහතා ඇතුළු රේගු නිලධාරීහු හා ලංකා දුම්කොළ සමාගමේ ජ්‍යෙෂ්ඨ කළමනාකාරිත්වය මේ අවස්ථාවට එක්ව සිටියහ.
ඡායාරූප – සුලෝචන ගමගේ
