සියලුම පාපකර්මයන්ගෙන් වැළකීමද කුසල් කිරීමද තම සිත පාලනය කර ගැනීම සියලුම බුදුවරුන්ගේ අනුශාසනයයි. මහා අනුහස් ඇති සුවිශේෂ වු අටවිසි බුද්ධ වන්දනාව ද මෙලොව ඇති ඉතා බලසම්පන්නම පූජාවකි. මනා කොට සිහියෙන් යුතුව සියලුම පවින් මිදී පුණ්‍ය කර්මයන්හිම යෙදෙන සියලුම බොදුනුවන්ට මහඟු වටිනා පින්කමකි. මෙය උතුම් බුද්ධ වන්දනාව සිදු කිරීමට කලින් ඔබ දින 03ක් වත් නිර්මාංශ වන්න. බුද්ධ පූජාවට අවශ්‍ය දේ මෙන්න.
මනාකොට සකස් කරගත් කිරිපිඬු පාත්‍ර 28ක්. පෙරා ගත් පැන් බඳුන් 28ක්, සුදු මල් කහ මල් මිශ්‍රිත මල් වට්ටි 28 ක්, වටපිටාවෙන් සොයා ගත් බෙහෙත් වර්ග ඇතුළත් බෙහෙත් වට්ටි 28 ක්, චතුමධුර බඳුන් 28ක් සුවඳ දුම්, අෂ්ඨ පාන වර්ග සහ සුවඳ හඳුන්කූරු මේවා සියල්ල සුදානම් කර ගන්න. පහන් සඳහා ගිතෙල් මිශ්‍ර පොල්තෙල් පහන් 28ක් සූදානම් කර ගන්න.
පුර පස දිනෙක උතුම් අටවිසි බුදුරජාණන් වහන්සේලා වැඩ සිටින බෝධීන් වහන්සේ නමක් මේ සඳහා යොදා ගන්න.
උදය කාලය වඩා සුදුසුයි. ඉතා පිරිසිදුව කිරිපිඬු තනාගන්න.
බෝ මළුව, අටවිසි බුදුන්ගේ බුදු කුටි ඉතාම පවිත්‍රව තබන්න.
ඒ සඳහා ඔබ බුදුගුණ කියමින් බෝමළුව අතුගා පිරිසිදු තෙත රෙදි කඩකින් දෝවනය කරන්න සුදු වැලි ඉස පිළිවෙළට මලුව අමදින්න. මෙම පින්කම ඔබට මහත් පල මහානිසංස ගෙන දෙන ඉතාම බලගතු එකකි.
නමෝ ශ්‍රී බුද්ධානං ජයතු ජයතු ජය ශ්‍රී යන පාඨය කියා උතුම් අටවිසි බුද්ධ ප්‍රතිමා ඉදිරියේ ඉතාම සර්ධාවෙන් බුද්ධ, ධම්ම, සංඝ යන ත්‍රිවිධ රත්නය නමස්කාරය කර පන්සිල් ගන්න. සුවඳ දුම් පූජාව උතුම් බුදුරජාණන් වහන්සේලා වෙනුවෙන් පවත්වන්න.
අටවිසි බුදු වන්දනාවේ සුවඳ දුම් පිදීම :
වන්දනාදිහි සුකතං
ධුප මේතං මනෝ රමං
අට්ඨ වීසති බුද්ධානං
නත්වා පුජේමි සාදරං
මෙම ගාථව කියමින් හඳුන්කූරු දල්වා අටවිසි බුදුරජාණන් වහන්සේගේ ප්‍රතිමාවලට දුම් අල්ලන්න.
සුවඳ දුම් උන්වහන්සේ වෙනුවෙන් කැප වේවායි සිතන්න.
ඉතා සර්ධාවෙන් සුදු මල් වට්ටි 28 පූජා කරන්න.
මේ මල් මෙන් සිත් පහන් වේවායි සිතන්න.
වර්ණ ගන්ධ ගුණෝපේතං
ඒතේ පුෂ්පේ මනෝරමේ
අට්ඨවීසති බුද්ධානං
නත්වා පූජේමි සාදරං
ලොව උතුම්ම ආනිසංශ ලැබෙන මෙන්ම ඔබ රෝගී දෙනෙත් පවා සුවපත් වෙන ගිතෙල් පොල්තෙල් මිශ්‍ර පහන් පූජාව සිදු කරනුයේ “පජ්ජලන්තේ ඉමෙ – දීපෙ අන්ධකාර අට්ඨවීසතී බුද්ධානං නත්වා පූජේමි සාදාරං” ගාථාව කියමින් පිළිම වහන්සේ අභියසදී පූජාව පවත්වන්න.
එය අපහසු නම් පහන් තබන තැනක එක් එක් අටවිසි උතුම් බුදුන් සිහි කරන ගාථාව කියා පහන් කැප කර පූජා කරන්න.
පෙරා ගත් පැන් බඳුන් පූජාව සඳහා
“නිම්මලං සීතලං ඒතං
මධුරං දක්ඛිනෝද කං”
අට්ඨවීසති බුද්ධානං
දේමි පුජේමි සාදරං
යන ගාථාව කියන්න. ඔබගේ දිවියේ ඇති සියලු දුක්කම්කටොලු දුරුවී සහනය උදාවේවායි සිතා පැන් පූජා කරන්න.
අනතුරුව ඉතා ප්‍රනීත චතු මධුර කුඩා බඳුන්වලට දමා එකින් එක මහත් භක්තියෙන් බුදුන් වහන්සේලා උදෙසා පූජා කරන්න.
මධුරං පරිකප්පිතං
ඒතං චතු මදුරං මනෝරමං
අට්ඨවීසති බුද්ධානං දේමි පූජේමි සාදරං” ගාථාවෙන් පුදන්න.
දැනට රෝගී අය අපල දශාගත කරන අය අනිවාරයෙන් අටවිසි බුදු ප්‍රතිමා උදෙසා ඖෂධ පූජාව සිදු කරන්න.
“මධුරං ආරෝගතං වණ්ණං
භෝසජ්ජං උපනාමිතං
අට්ඨවීසති බුද්ධානාං
දේමි පූජේමි සාදරං
නාගවල්ලී දලං ඒතං
චණ්ණ පුගාදි සංයුතං
අට්ඨ වීසති බුද්ධානං
පූජේමි සාදරං”
යන ගාථාව කියන්න. පිරිසිදුව සෑදු ගිලන් පස පූජාව එකිනෙක බඳුන්වල දමා “මධුරං පරිකප්පිතං ඒතං ගිලාන පච්චයං ඉමං අට්ඨවීසති බුද්ධානං – නත්වා පූජේමි සාදරං යන ගාථාව කියා භක්තිමත්ව පූජා කරන්න.
මහා බලගතු කිරිපිඬු දානය එකිනෙක පාත්‍රවලට දමා
අධිවාසේතු නෝභන්තේ භෝජනං පරිකප්පිතං අට්ඨ වීසති බුද්ධානං අනුකම්පං උපාදාය පතිගන්හාතු මුත්තමං”
යන ගාථාව කියන්න.
මේ පූජාවේ අනුහසින් කිසිම දිනෙක ආහාර පානවලින් අඩුවක් ඔබට නොලැබේවි.
අනතුරුව අටවිසි බුදුන් වඳින ගාථාව 03 වරක් කියා බුද්ධ පූජාව තබා අනතුරුව මෙම ගාථාවෙන් කැප කරන්න.මෙය
බලගතුම අටවිසි බුද්ධ වන්දනා ගාථාවකි.
“තණ්හංකරෝ මේධං කරෝ
ආරෝපි සරණංකරෝ
දීපංකරෝච සම්බුද්ධෝ කොණ්ඩඤ්ඤෝ
දීපදුන් දීපදුප්තමෝ
මංගලෝච සුමනෝච
රේවතෝ සෝභිතෝ මුනි
අනෝම දස්සී පදුමෝ
නාරදෝ පදුමුත්තරෝ
සුමේධෝච සුජාතෝච
පියදස්සී මහා යසෝ
අත්ථදස්සී ධම්මදස්සී සිද්ධත්තෝ ලෝක නායකෝ
තිස්සෝ ථුස්සෝච සම්බුද්ධෝ
විපස්සී සිඛි වෙස්සභූ
කකුසන්ධෝ කෝණාගමනෝ
කස්සපෝ ගෝතමෝ මුනි
අට්ඨ වීසති තේ බුද්ධා
සම්බසත්ත හිතේ රතා
තෙසාහං සිරසා පාදේ
අභිවන්දාමි සාදරං”
මේ උතුම් පූජාවේ මහා අනුහසින් ඔබගේ අපල, පීඩා, කම්කටොලු දුරුවී මෙලොව පරලොව සැනසීම ලැබේවායි” ප්‍රාර්ථනා කරන්න.
මේ පින්කම ඔබට සර්ව සම්පූර්ණයෙන් කර ගැනුමට නොහැකි වුණු වේලාවට අටවිසි බුදුරදුන් උදෙසා පිරිසිදු පැන් බඳුනක් සහ සුදු මල් මිටක් පූජා කිරීමටද මහත්ඵල මහානිශංස දෙන පින් කමකි.
ප්‍රවීණ ජ්‍යොතිර්වේදිනී දේශමාන්‍ය, දේශකීර්ති ගීතාංගනී ගුණසේකර
