තුන් පරපුරක පොත් එළිදැක්ම පදනම් ආයතනයේදී බදාදා
ප්‍රවීණ සන්නිවේදක සමන් අතාවුද හෙට්ටිගේ ‘සමන් කියයි – 2’, තාරකා අතාවුදහෙට්ටිගේ ‘චෙකොහොලික් හීන’ නවකතාව සහ තරුසර පෙරේරාගේ ‘කළු මකරා’ ළමා කතාව හඳුන්වා දීමේ උලෙළ 12 වැනිදා බදාදා සවස 3.30ට ශ්‍රී ලංකා පදනම් ආයතනයේදී පැවැත්වේ. මහාචාර්ය සරත් විජේසූරිය, මහාචාර්ය ප්‍රණීත් අභයසුන්දර, ස්වාමි විවේකානන්ද සංස්කෘතික මධ්‍යස්ථානයේ අධ්‍යක්ෂ මහාචාර්ය අන්කුර දත්තා, විශේෂඥ වෛද්‍ය හේමන්ත පෙරේරා සහ සූපවේදිනි අනෝමා විජේතුංග මෙහිදී විශේෂ දේශන පවත්වති.
නළුවෙල ආනන්ද නාහිමි
කර්තෘ – රොඩ්නි විදානපතිරණ
මහා මහින්ද ධර්මදූත සංගමය
ඉන්දියාවේ මහාරාෂ්ට්‍ර ප්‍රාන්තයේ වැඩවාසය කරන නළුවෙල ආනන්ද නාහිමියන්ගේ චරිතය අලළා ලියන ලද කෘතියකි. නාහිමියන්ගේ බාල විය, පැවිදි දිවිය හා සසුන් මෙහෙවර ඇතුළු තොරතුරු රැසක් ලේඛකයා මෙහිදී රසවත් ලෙස ඉදිරිපත් කරයි.
සිතක බලය
කර්තෘ – මැල්ලවගෙදර
සමණ ධම්ම හිමි
සමයවර්ධන ප්‍රකාශනයකි
ගිහි පැවිදි දෙපිරිසටම වැදගත් වන කෘතියකි. බුද්ධ දේශනාව අනුව සිත පිළිබඳ විග්‍රහයක් කාටත් තේරුම් ගත හැකි අයුරින් ලියන ලද කෘතියකි. ඒ සඳහා භාවිත කර ගෙන ඇති සරල බස් වහර එහිදී වැදගත් මෙහෙවරක් ඉටු කරයි.
සිරි කහවල
ප්‍රතිභාන්විතය
කර්තෘ – හේමාලි විජේරත්න
නිදහස් කලා සංධානයේ ප්‍රකාශනයකි
ජ්‍යෙෂ්ඨ පුවත්පත්කලාවේදි සිරි කහවලයන්ගේ ජීවන තොරතුරු ඇතුළත්ව ඔහු පිළිබඳ කලා ක්ෂේත්‍රයේ ප්‍රවීණයන්ගේ අදහස් ද එක් කර ලියවුණ මේ කෘතිය සිරි කහවලයන්ගේ 83 වැනි ජන්ම දිනය වෙනුවෙන් පසුගියදා පැවැත්වුණු ‘සිරි අසිරි’ උලෙළේදී නිකුත් කෙරිණි. සිරි කහවලයන් විසින් කලා ක්ෂේත්‍රය වෙනුවෙන් කළ මෙහෙවර මෙන්ම ඔහුගේ ජීවිතේ විවිධ අවධි පිළිබඳ ලියවී ඇති මේ කෘතියේ ජ්‍යෙෂ්ඨ කලාකරුවන් මෙන්ම වර්තමානයේ රංගන ක්ෂේත්‍රයේ නියැළෙන ශීල්පීන් දැක්වූ අදහස්ද ඇතුළත්ය. මෙය ‘සරසවිය’ පුවත්පතේ ජ්‍යෙෂ්ඨ මාධ්‍යවේදීනි හේමාලි විජේරත්නගේ සංස්කරණයකි.
මෙතැන මම අන් තැනක
කර්තෘ – නාමල් ප්‍රසන්න
සරසවි ප්‍රකාශනයකි
මුල්ම කෙටිකතා සංග්‍රහය වූ ‘ගිනියම් සඳ එළිය’ ලියා පළ කර වසර 18කට පසු නාමල් ප්‍රසන්න විසින් ලියන ලද අලුත්ම කෙටිකතා සංග්‍රහයයි. ලේඛකයා විසින් කලින් කල ලියන ලද කෙටිකතා 8ක් මෙහි ඇතුළත්ය. ශ්‍රී ලංකා රූපවාහිනී සංස්ථාවේ ජ්‍යෙෂ්ඨ නිෂ්පාදකයකු වශයෙන් කලක් සේවය කළ නාමල් මේ කෘතිය සඳහා විවිධ අත්දැකීම් එක්කොට ගෙන ඇති සෙයකි. උත්තම පුරුෂ දෘෂ්ටිකෝණයකින් ලියා ඇති කෙටිකතා සංග්‍රහයේ කතා සඳහා සරල බස්වහරක් භාවිත කර ඇත.
අවිචාර සමයක නිරුවත් වෘක්කයන් අතර
කර්තෘ – නිහාල් රණසිංහ
කර්තෘ ප්‍රකාශනයකි
ලේඛකයා මේ කෘතියෙන් අපට කියන්නේ ඔහුගේම ජීවිත කතාවයි. ජනතා විමුක්ති පෙරමුණට සම්බන්ධ වීමත්, ඒ නිසාම විඳින්න සිදු වූ ගැහැටත් මේ කෘතියට පාදක වී ඇත. ඔහු ජීවිතයේ ලැබූ ඒ අත්දැකීම් එකින් එක පාඨකාට කියන්නේ සියලු දුක්ඛ දෝමනස්සයන් එක්තැන් කොටය. මින් පෙරද විවිධ විෂය ක්ෂේත්‍ර පිළිබඳ පොතපත ලියා ඇති නිහාල් ජීවිතයේ සිය අත්දැකීම් ඇසුරු කරගෙන ලියූ පළමු කෘතිය මෙයයි.
දියුණුවේ රහස්
කර්තෘ – ආචාර්ය දිසානාත් පීරිස්
කර්තෘ ප්‍රකාශනයකි
වාස්තු විද්‍යාව තේමා කරගනිමින් ලියවුණ මේ කෘතියේ මිනිසාට තමන් පදිංචි නිවෙස මෙන්ම තමන් නියැළෙන ව්‍යාපාර ආදියෙන් තමන්ගේ දියුණුව සලසා ගන්නා අයුරු විග්‍රහ කර ඇත. නිවෙසේ බුදු පහන දැල්වීම, උත්සව අවස්ථාවලදී ඒ ස්ථානය සකස් විය යුතු ආකාරය ආදි බෝහෝ කරුණු මෙහි ඇතුළත් කර ඇත. එමෙන්ම තමන් විසින්ම තමන් ගැන විමසා දැනගත හැකි පුද්ගල දේහ ලක්ෂණ ආදි තවත් තොරතුරු රැසක් මෙහි අන්තර්ගත වේ.
