ඉතිහාසයේ රාජ්‍ය අංශයේ සහ පෞද්ගලික අංශයේ වැඩිම වැටුප් වැඩි කළ ආණ්ඩුවේ අය වැය ගැන මොකද කියන්නේ?
මේ ආණ්ඩුව 2026 සහ 2027 මූල්‍ය වර්ෂයට වැටුප් වැඩි කළා කියනවා. ඒත් ඉදිරි වර්ෂවලදී රට මොන වගේ ආර්ථික වෙනස්වීම්වලට භාජනය වෙයිද කියලා දන්නෙ නැහැ. රාජ්‍ය සේවකයන්ට වැටුප් වැඩි කිරීම රුපියල් 970ක් පමණයි; පෞද්ගලික අංශයේ වැටුප් වැඩි කිරීම් සම්බන්ධයෙන් හැමදාම ආණ්ඩුව යෝජනා කරනවා. ඒත් ඒ යෝජනා හාම්පුතුන් ක්‍රියාත්මක කරන්නේ නැහැ. ඇඟලුම් ක්ෂේත්‍රයේ සේවිකාවන්ට වැටුපට අමතරව බොහෝ දිරිදීමනා ලැබෙනවා. ඒ දේවල් මූලික වැටුපට එකතු කිරීමයි අවශ්‍ය වෙන්නේ. මේ වැටුප් වැඩි කිරීම සම්බන්ධ යෝජනා දෙකම දේශපාලනික තීන්දුවක් මිස, විද්‍යාත්මකව සලකා බලා විද්‍යාත්මක සාධක මත සිදු නොවුණ දෙයක් කියලා අපි දන්නවා.
අය වැය විවාදයේදී සජබ අසමත් වුණා නේද? එහෙම වුණේ ඇයි?
මෙය සජබ අසමත්භාවයක් කියලා කියන්න බැහැ. අප ඉදිරි කාලසීමාවෙදී මේ රටේ ජනතාව වෙනුවෙන් කරන්නේ මොනවද කියලා දැනගන්න පුළුවන්. අය වැය විවාදයේදී සජබ ලෙස සාධනීය දේට රට වෙනුවෙන් ආණ්ඩුවට සහාය දෙන්න අවශ්‍ය තැනදි සහාය දෙනවා. මේ රටේ අනාගතය සහ මේ රට හොඳ තැනකට ගෙන යන්න වත්මන් ආණ්ඩුව කටයුතු කරනවා නම්; අපි උපරිමයෙන් ඒ සඳහා සහාය දෙනවා. එයට බාධා කරන්න උත්සාහ කරන්නෙ නැහැ. අනුර කුමාර ජනාධිපතිවරයා කිවුවා මේ රටේ සියලු ප්‍රශ්න විසඳලා රටේ ජනතාවට වටිනාකමක් එකතු කරන්න මාස හයක කාලයක් ගත වනවා කියලා. එතුමාගේ ඒ කාලය ගෙවී යන්න තවත් මාස එකහමාරක් තියෙනවා. ඒ කාලයත් මේ ආණ්ඩුවට දීලා තියෙනවා. ඉන් පසුව මේ ආණ්ඩුව ජනතාව බොරු කියලා රවටපු ආණ්ඩුවක් කියලා ඔප්පු කරන්න සූදානම්. ඒ නිසා මේ වෙලාවේ නිහඬව ඉන්නවා. ආණ්ඩුවකට යම් කිසි කාලසීමාවක් අවශ්‍යයි. ජනතාවට බොරු කියලා ඡන්දය උදුරගත්ත මේ ආණ්ඩුවට කිසිම වැඩපිළිවෙළක් නැහැ. අවශ්‍ය අවස්ථාවේ රට වෙනුවෙන් සිටගන්නවා.
පසුගිය කාලයේ ආණ්ඩුවට ඉඩ දීලාද හේෂා මන්ත්‍රීවරයා නිහඬ වෙලා හිටියේ?
මේ දිනවල මම නීති විද්‍යාලයේ අවසන් විභාගය සඳහා සූදානම් වෙමින් ඉන්නවා. ඒ කටයුතු අවසන් වූ පසුව පෙර සේම පක්ෂයේ කාර්යභාරය වෙනුවෙන් පාර්ලිමේන්තුව තුළදීත් ඉන් පිටතටදීත් කැප වීමෙන් ක්‍රියාකාරිව ඉන්නවා.
සජබට තනියම ඉදිරි මැතිවරණවලදි නැඟී සිටින්න ශක්තිමත් වැඩපිළිවෙළක් නැහැ නේද? ඒ නිසා එජාප සමඟ සාකච්ඡා කළා එයත් මේ වන විට අසාර්ථක වුණා නේද?
සජබට තනියම නැඟී සිටින්න බැරි වැඩසටහනක් නැහැ කියන එක වැරදියි. සජබ කියන්නේ මේ රටේ විපක්ෂය. විපක්ෂයේ කාර්යභාරය අනෙකුත් පක්ෂ සමඟ එකතු වෙලා ආණ්ඩු විරෝධි කඳවුරක් ලෙස නැඟී සිටීමයි. අප එය කරනවා. සජබෙට පණ නැතිකම නොවෙයි; අපේ කඳවුර වටා එකතු විය හැකි, අපට ගැළපෙන කඳවුරු සමඟ එකතු වී විපක්ෂයේ කාර්යභාරය කරනවා. එතනයි අප ඉන්නේ.
සජබ සහ එජාප පක්ෂ දෙක එකතු නොවන බව කල් ඇතිවම දැනගෙනද තිස්ස අත්තනායක මහතා මේ සාකච්ඡාවලින් ඉවත් වුණේ?
කෘත්‍යාධිකාරී මණ්ඩලය යම්කිසි සීමාවක් තුළ මේ සාකච්ඡා පවත්වාගෙන යනවා කියන තැනයි හිටියේ. එයින් එහාට ගිහින් කොන්දේසී විරහිතව එකතු වීමට උත්සාහ කරන පිරිස් හිටියා. කොන්දේසි විරහිතව අපට එජාපයට එකතු වෙන්න පුළුවන් කමක් තිබුණා නම්, අප එදා එජාපය හැර එන්නේ නෑ. අප එජාපය දාලා ආවේ යම් කොන්දේසි ප්‍රමාණයක් කඩ වුණ නිසා බව හැමොම දන්නවා. ඒ නිසා කොන්දේසි විරහිතව අප එකඟ වෙන්නේ නෑ. මේ සඳහා රනිල් වික්‍රමසිංහ නායකතුමාට සැබෑ වුවමනාවක් නෑ කියලා ඉතා පැහැදිලියි. ඒ වගේම ඇතැමුන්ට තියෙන්නේ පෞද්ගලික අරමුණු.
ඔබ පෞද්ගලිකවම මේ සන්ධානගත වීමට කැමැති නැහැ වගේ නේද?
මම කැමැති සද්භාවයෙන් එය වෙනවා නම්. මේ සන්ධානගත වීම් හරහා වුණේ රනිල් වික්‍රමසිංහ මහත්තයා මේ රටේ දේශපාලන පක්ෂ විනාශ කරදැමීමයි. ඒ විනාශ කරදැම්මා වගේ සජිත් ප්‍රේමදාස මහත්තයාගේ දේශපාලනය අවසන් කරන්න රනිල් වික්‍රමසිංහගේ අදහස ක්‍රියාත්මක කිරීමටයි මේ උත්සාහ කළේ. මම හිතනවා එයට සජබ හිටපු සාතිශය බහුතරයක් කැමැති නැහැ. සැබැවින්ම එකතු වීමක් අපේක්ෂා කරනවා නම්; සජබ නායක සජිත් ප්‍රේමදාස එජප නායකයා ලෙසත් රනිල් වික්‍රමසිංහ ෙජ්‍යෂ්ඨ නායකයා ලෙසත් පත් කරගන්නයි අප යෝජනා කළේ. එතැනට එන්නේ නැතුව මේ අයගේ දේශපාලන ගමන හදාගන්නයි උත්සාහ කරන්නේ. ඒ නිසා සද්භාවයෙන් මේ රටේ ජනතාව වෙනුවෙන් කැප වෙලා කටයුතු කරන්න එකතු වෙනවා නම්, හේෂා විතානගේ පමණක් නොවෙයි, සියලු දෙනා එකඟයි. එසේ නැතිව, පලක් නැති සාකච්ඡාවලට අපි විරුද්ධයි.
ජාජබ ආණ්ඩුවට තවමත් ගෙවී ඇත්තේ කෙටි කාලයයි. විපක්ෂය විසින් ආණ්ඩුවේ සුළු ගැටලු අල්ලාගෙන ජනතාව අතර වෙනම මතයක් හදන්න හදනවා. හිතනවාද මේ ආණ්ඩුව පෙරළන්න ඒ අයට පුළුවන් කියලා?
මේ ආණ්ඩුව මේ රටේ ජනතාවත් සමඟ යම්කිසි ගනුදෙනුවක් ඇති කර ගත්තා. යම් පොරොන්දු මාලාවකට ආණ්ඩුව එකඟ වුණා. ඒ පොරොන්දු මාලාව ඉටු කළ යුතුයි. අපත් ඒ නිසා ජනතාවගේ පැත්තේ හිට ගන්නවා. රැකියා විරහිත උපාධිධාරීන්, රජයේ සේවකයන්, හෙදියන් සහ වෛද්‍යවරුන් මේ ආණ්ඩුවේ දේශපාලන වුවමනාවන් වෙනුවෙන් පාවිච්චි වුණා. මේ වන විට අතෘප්තියට පත් වෙලා තියෙන රාජ්‍ය සේවකයන් සියල්ලම ජාජබට සහාය වුණ අය. ගොවි ජනතාවට, වෘත්තිකයන්ට දුන් පොරොන්දු ආපස්සට හරවමින් තිබෙනවා. සමාජයේ වෙනස්කම් කරන්න මේ අය කතා කරපු දේවල් දැන් පට්ටපල් බොරු බවට පත් වෙලා. ජනතාවට දුන් පොරොන්දු අනුව පරිවර්තනයක් ඇති කරයි කියලා ඔවුන් හිතුවා.
විපක්ෂ නායකවරයා වෛද්‍යවරුන්ගේ වැඩවර්ජනයක් දියත් කරන්න හැදුවත් වෛද්‍යවරුන් වැඩවර්ජනය කල් දැම්මා නේද?
විපක්ෂ නායකතුමා වැඩ වර්ජන අල්ලගන්න හැදුවේ නැහැ. එහෙත් අපි එතනට එනවා. අනුර කුමාර ජනාධිපතිවරයා කිවුව මාස හයෙන් පස්සෙ මේ රටේ සියලු වෘත්තීය සමිතිත් සමඟ අපි දේශපාලනය කරන්න පටන් ගන්නවා. වෛද්‍යවරුන්ගේ සංගමය විපක්ෂය ලෙස අප සමඟ සාකච්ඡා කළා. තාවකාලිකව ඒ අය මේක නතර කළා. මේ රටේ සෞඛ්‍ය ක්ෂේත්‍රයේ සංවේදිම ක්ෂේත්‍රයක්. ඒ නිසා ගත් තීරණය වැදගත් කියලා අපිත් විශ්වාස කරනවා. එහෙත් මේ ආණ්ඩුව ඒ අයගේ ප්‍රශ්න විසඳන්න අවශ්‍යයි. ආණ්ඩුවට වෛද්‍යවරුන්ව අන්දලා මේ ගමන යන්න බෑ. එහෙම වුණොත් අපි පාරට බස්සන්න ඉස්සර වෙලා, ඒ අය පාරට බහීවි.
ජනතාවගේ පැත්තේ ඉන්නවා කිවුවාට ඉන්ධන පිරවුම්හල් ගැටලුවේදී නම් විපක්ෂය ගත්තේ පිරවුම්හල් හිමියන්ගේ පැත්ත නේද? මෙහෙමද විපක්ෂය ඉදිරියේදී කටයුතු කරන්න ඉන්නේ?
ඉන්ධන පිරවුම්හල් ප්‍රශ්නයේදී ඉන්ධන පිරවුම්හල් හිමිකරුවන්ට තියෙන හැබෑ ප්‍රශ්නය පිළිබඳ ආමන්ත්‍රණය කිරීම විපක්ෂයේ වගකීමක්. ඒ හරහා ජනතාවට ඇති වන පීඩාව විසඳීම ආණ්ඩුවෙ වගකීමක්. විපක්ෂයට බැහැනේ තෙල් බෙදන්න. ජනතාවට ප්‍රශ්නයක් නොවෙන්න තෙල් බෙදන්න කියලා අපි ඉල්ලීම කළා පාර්ලිමේන්තුවේදී. ඒ ප්‍රශ්නයට උත්තර හොයන්න ඇමැතිවරයාට අවශ්‍ය නැහැ. අපි කිවුවාම ඒ ගැන ගනන් ගත්තේ නැහැ. ආණ්ඩුව මන්දගාමි විදිහට ක්‍රියා කළා. ඉන්ධන පිරවුම්හල් හිමියන් කියන්නේ මේ රටේ තවත් ව්‍යාපාරිකයෝ කොට්ඨාසයක්. ඒ අයටත් සාධාරණයක් අවශ්‍යයි. මන්දගාමි විදියට ආණ්ඩුව වැඩ කරලා වැඩක් නැහැ. ආණ්ඩුව කිසිදු පෙර දැනුම් දීමක් නැතුව ක්‍රියා කළ විදිහට වැරදි කියලා අපි කිවුවා. ඒ අනුව කියන්න බෑ අපි ජනතාවගේ පැත්තේ හිටගන්නේ නෑ කියලා.
මෙහෙම ගියොත් පළාත් පාලන මැතිවරණයේදී සජබ හේදිලාම යයි වගේ නේද?
ආණ්ඩුවට මෙහෙම ගියොත් වැඩිදුරක් යන්න බැරි වෙයි. ආණ්ඩුව පොරොන්දු වූ කිසිදු දෙයක් කළේ නැහැ. බඩු මිල ඉහළ ගිහින්. රජයේ සේවකයන්ට කිසිදු සහනයක් නැහැ. ජනතාව බලන් ඉන්නවා. ඉදිරියේදී අලුත් ආණ්ඩුවක් නිර්මාණය කිරීමේ පළමු ප්‍රවේශය පළාත් සභා මැතිවරණයේදි ජනතාව ගනී කියලා හිතනවා. විපක්ෂ කිසිදු පැකිළීමෙන් තොරව බලාගෙන ඉන්නවා. අපි විපක්ෂය ලෙස සංවිධානය වෙලා බලන් ඉන්නවා. මේ ආණ්ඩුව විසින් ආණ්ඩු බලය ලබා ගන්න කලින් කළේ බොරුවක් කියලා ඔප්පු කරලා පෙන්නන්න හිතුවා. මේ වන විට ජනතාව ඉච්චාභංගත්වයට පත් වෙලා. ජනතාව ජාජබට ඉදිරි මැතිවරණවලදී දෙන ප්‍රතිචාරය අපට ඉදිරියට බලාගන්න පුළුවන්.
සජබ ගොඩනැඟීම කෙසේ වුවත්, පොජපෙ ගොඩනඟනවා කියලා නාමල් රාජපක්ෂ මන්ත්‍රීවරයා කියනවා…
පොදු ජන පෙරමුණේ නාමල් මහත්තයා කල්පනා කරලා බලන්න අවශ්‍යයි ආර්ථික අර්බුදය ආවේ කොහොමද කියලා. ඒ එතුමාගේ බාප්පා වන ගෝඨාභය රාජපක්ෂ මහත්තයා ජනාධිපති ලෙස ඉන්න කාලයේදී සිදු වුණේ. මේ රටේ අනුර කුමාර ජනාධිපති වෙන්නත්, රට බංකොලොත්භාවයට පත් වෙන්නත් සියලු කරුණුවලට වගකිව යුත්තා වන පොජපෙ කණ්ඩායම තමන්ගේ බාප්පා තාත්තා දේශපාලනය කරපු හැටි අමතක කරලා පුතා ඇවිල්ලා කිවුවට මේ සියල්ල ඉවරයි මමයි දැන් ඉන්නේ කියලා. ඒක මේ රටේ මිනිසුන් පිළිගන්නේ නැහැ. 69 ලක්ෂය ලක්ෂ දෙක තුනකට අඩු වුණා. එතුමා ඒක හිතන්න අවශ්‍යයි. මේ මොහොතේ ජනතාව විඳින පීඩාවෙනුවෙන් ජාජබ ආණ්ඩුවට වඩා වගඋත්තරකරුවන් වෙන්නේ පොදුජන පෙරමුණේ අයයි.
