2026 වසරේ සිට රජයේ සියලු විභාග වසර 6කට පෙර පැවති කාලසටහන යටතේ නැවතත් ක්‍රියාත්මක කරන බව විභාග කොමසාරිස් ජනරාල් අමිත ජයසුන්දර සිළුමිණට ප්‍රකාශ කළේය.
ඒ අනුව, 5 ශ්‍රේණිය ශිෂ්‍යත්වය හා උසස් පෙළ විභාග අගෝස්තු මසදීත්, සාමාන්‍ය පෙළ විභාගය දෙසැම්බර් මසදීත් පවත්වන අතර, රජයේ සෙසු විභාගද නියමිත කාලසටහනට අනුව පැවැත්වෙන බව ඔහු පෙන්වා දුන්නේය.
කොවිඩ් වසංගතය ව්‍යාප්ත වීම හේතුවෙන් රට අගුළු ලෑමත් සමඟ 2020 වසරේ පටන් විභාග කාලසටහන අක්‍රමවත් වූ අතර, මේ වන විටත් ප්‍රධාන පාසල් විභාග දෙකක් වන සාමාන්‍ය පෙළ හා උසස් පෙළ විභාග පැවැත්වෙන්නේ මාස කිහිපයක් ප්‍රමාද වෙමිනි. කෙසේ වෙතත් විභාග දෙපාර්තමේන්තුව විසින් මේ වන විට කෙමෙන් සුපුරුදු විභාග සැලැස්මට අනුගත වෙමින් පවතින අතර, ඒ අනුව ශිෂ්‍යත්ව විභාගය නිසි කාලසීමාවට ආසන්නව පැවැත්වේ.
පසුගිය කාලයේ විභාග කල්යෑම හේතුවෙන් සිසුන්ගේ ජීවිතවලට විශාල වශයෙන් බලපෑම් එල්ල වී ඇති අතර, අනෙකුත් විභාගද ඒ අනුව කල් යෑමෙන් උසස්වීම් සහ බඳවා ගැනීම්ද පමා වී ඇත.
