බටලන්ද කොමිෂන් සභා වාර්තාව පාර්ලිමේන්තුවට ඉදිරිපත් කිරීම ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක විසින් පසුගියදා සිදු කරන ලදි.
ඒ වාර්තාව සභානායකවරයා ලෙස පාර්ලිමේන්තුවට ඉදිරිපත් කරමින් ඇමැතිවරයා සඳහන් කළේ එය සිංහල, ඉංග්‍රීසි සහ දෙමළ භාෂා තුනෙන්ම මුද්‍රණය කිරීමටත්, එම කොමිෂන් සභා වාර්තාව නීතිපති වෙත යොමු කිරීමටත් යෝජනා කරන බවයි.
එමෙන්ම එම වාර්තාව පිළිබඳ දින දෙකක පාර්ලිමේන්තු විවාදයක් පැවැත්වීමටද සභානායක ඇමැති බිමල් රත්නායක විසින් යෝජනා කරනු ලැබිණි.
1980 දශකයේ අවසාන කාලයේදී එවකට පැවති එක්සත් ජාතික පක්ෂ රජය විසින් නීති විරෝධි මිනී මැරුම්, කෲර වධ හිංසාවට ලක් කිරීම්, අනීතිකව රඳවා තබාගැනීම් රැසක් සිදු කරන ලද බවට චෝදනා එල්ල විය.
1988-1990 කාලවකවානුවේදී කැලණිය සපුගස්කන්ද බටලන්ද නිවාස යෝජනා ක්‍රමය ආශ්‍රිතව අනීතිකව පොලිස් නිලධාරීන්ද මැදිහත්ව මෙලෙස විවිධ පුද්ගලයන් පැහැරගෙන ගොස් ඝාතනය කර ඇති බවටත්, වධ හිංසා පැමිණවූ බවටත් හිටපු ජනාධිපති චන්ද්‍රිකා බණ්ඩාරනායක විසින් පත් කරනු ලැබූ ජනාධිපති කොමිෂන් සභාවේදී හෙළිදරවු වී තිබේ.
