වයස අවුරුදු 40ට වැඩි සහ ග්ලූකෝමා රෝගය සහිත පවුලේ ඉතිහාසයක් ඇති, දියවැඩියාව, අධිරුධිර පීඩනය සහ ඇසට අනතුරු සිදු වී ඇති අය ආදි අවදානම් කාණ්ඩවලට අයත් පුද්ගලයන් වසරකට වරක්වත් ඇසේ පීඩනය මැනීමෙන් ග්ලූකෝමා රෝගයට ගොදුරු වීමෙන් කල්තියා වැළකිය හැකි බව ජාතික අක්ෂි රෝහලේ නියෝජ්‍ය අධ්‍යක්ෂ විශේෂඥ වෛද්‍ය ජයරුවන් බණ්ඩාර පවසයි.
ඇසේ පීඩනය නිසා දෘෂ්ටි විතානයට හානි වීමෙන් ඇති වන පෙනීමේ දුර්වලතාව වන ග්ලූකෝමා තත්ත්වය හේතුවෙන් ඇති වන අන්ධභාවය සුව කළ නොහැකි බැවින් කල්තියා හඳුනාගැනීම ඉතා වැදගත් බවද හෙතෙම පැවසීය.
ලෝක ග්ලූකෝමා සතිය වෙනුවෙන් ශ්‍රී ලංකා අක්ෂි ශල්‍ය වෛද්‍යවරුන්ගේ සංගමය විසින් මාර්තු 29 වැනිදා දින මහනුවර ජාතික රෝහලේදී විශේෂ ග්ලෝකෝමා අක්ෂි සායනයක් පවත්වන අතර, අක්ෂි සායන පැවැත්වෙන සෑම මූලික රෝහලකදීම ඕනෑම අයකුට පහසුවෙන් ග්ලූකෝමා පරීක්ෂණය සිදු කරගත හැකි බවද එම සංගමය පවසයි.අන්ධභාවයට හේතු වන දෙවැනි හේතුව ග්ලූකෝමා තත්ත්වය බවත්, ලොව පුරා මිලියන 79ක් පමණ මේ වන විට මේ තත්ත්වයට ගොදුරු වී ඇති බවත් දත්ත වාර්තාවලින් අනාවරණය වී ඇත.
