වැඩි මිලට හාල් විකුණුවොත් දඩ

සහල් සඳහා පනවා තිබූ පාලන මිල ඉවත් කර නැති අතර, ගැසට් මඟින් පනවා ඇති උපරිම තොග සහ සිල්ලර මිල එලෙසම ක්‍රියාත්මක වන බවත්, වැඩි මිලට සහල් අලෙවි කරන වෙළෙඳුන් සොයා රට පුරා අඛණ්ඩව වැටලීම් සහ විමර්ශන ක්‍රියාත්මක කරන බවත් පාරිභෝගික කටයුතු පිළිබඳ අධිකාරිය පවසයි.

ඉකුත් මාර්තු 12 වැනිදා දක්වා විමර්ශනය කළ වෙළෙඳසල් 5,500කට අධික වැඩි සංඛ්‍යාවක් අතරින් වෙළෙඳුන් 4,070කට එරෙහිව නීතිමය පියවර ගෙන ඇති අතර, එයින් සහල් සම්බන්ධයෙන් වෙළෙඳුන් 1,555කට එරෙහිව නීතිමය පියවර ගෙන ඇත. මේ වසරේ මාර්තු 12 දින දක්වා වෙළෙඳුන් 4,122කට එරෙහිව පවරා ඇති නඩුවලින් අධිකරණ මඟින් නියම කර ඇති දඩ මුදල රුපියල් මිලියන 61කි.