‘ක්ලීන් ශ්‍රී ලංකා’ වැඩසටහනට සමගාමිව ඉදිරියේදී මාසයකට මාර්ගයේ ධාවනය වන වාහන 1,000ක් භෞතිකව පරීක්ෂා කරන බව වායු විමෝචන භාරකාර අරමුදලේ අධ්‍යක්ෂ දසුන් ගමගේ පැවසීය.
දැනටමත් මාසයකට වාහන 500ක් භෞතිකව පරීක්ෂාවට ලක් කරන අතර, රජය ගෙනයන වැඩ සටහනට සමගාමිව මේ ක්‍රියාවලිය වැඩිදියුණු කිරීමට පියවර ගන්නා බවද පැවසුවේය.
මීට අමතරව පාසල් දරුවන් හා පොලිස් නිලධාරීන්ද මේ සඳහා දැනුවත් කිරීමට නියමිතය. විශේෂයෙන් රථවාහන රාජකාරියේ නිරත පොලිස් නිලධාරීන් රාජකාරි කිරීමේදී මුව ආවරණයක් පැලඳීමට පියවර ගත යුතුය. 1995 වසරේදී රථවාහන රාජකාරියේ නිරත නිලධාරීන්ගේ රුධිර සාම්පල පරීක්ෂාවකදී ලේවල ඊයම් අඩංගු බව තහවුරු වී තිබීම ඊට හේතුවයි. එහි ප්‍රතිඵලයක් ලෙස මෙරටට ඊයම් රහිත ඉන්ධන ගෙන්වීමට ප්‍රතිපත්තිමය තීරණයක්ද ගැනිණි.
ප්‍රවාහන ඇමැතිවරයාගේ යෝජනාවකට අනුව, රුපියල් මිලියන 55ක මුදලක් ප්‍රමාණයක් යොදවා වර්ණ සංඥා පද්ධති (ට්‍රැෆික් ලයිට්) 200ක් අලුත්වැඩියා කිරීමට නියමිත බවත්, එම කටයුතුවලින් පසු මංසන්ධිවලදී වර්ණ සංඥා ක්‍රියාත්මක වන තුරු තම වාහනවල එංජිම ක්‍රියාවිරහිත කර තබන ලෙස රියැදුරන්ගෙන් ඉල්ලා සිටින බවත් පැවසූ වායු විමෝචන භාරකාර අරමුදලේ අධ්‍යක්ෂවරයා මෙමඟින් වායු විමෝචනය හේතුවෙන් පරිසරයට සිදු වන හානිය අවම කර ගත හැකි අතර අනතුරු සිදුවීම්ද අඩු වන බවද අවධාරණය කළේය.
