හෙටින් (17) ආරම්භ වන අපොස සාමාන්‍ය පෙළ විභාගයේදී විභාග වංචා අනාවරණය කිරීමට විශේෂ සැලැස්මක් ක්‍රියාත්මක කර ඇතැයි විභාග කොමසාරිස් ජනරාල් අමිත ජයසුන්දර සිළුමිණට පවසයි.
මෙවර අ.පො.ස සාමාන්‍ය පෙළ විභාගයට අපේක්ෂකයන් 474,147 දෙනකු විභාගයට ඉල්ලුම් කර ඇති අතර, ඉන් 398,182ක් පාසල් අයදුම්කරුවෝද 75,965ක් පෞද්ගලික අයදුම්කරුවෝද වෙති. මාර්තු 17 වැනිදා සිට 26 වැනිදා දක්වා දිවයින පුරා මධ්‍යස්ථාන 3,663කදී පැවැත්වෙන විභාගයේ සම්බන්ධීකරණ කටයුතු මධ්‍යස්ථාන 534කදී සිදු කෙරේ.
විභාග කොමසාරිස් ජනරාල්වරයා පැවැසූයේ සියලු සිසුන් කල් ඇතිව නිසි සූදානමකින් යුතුව කල් ඇතිව විභාගයට පැමිණිය යුතු බවත්, සෑම සිසුවකුම විභාගයට පැය බාගයකට පෙර විභාග ශාලාවට ඇතුළු කරන බවත්ය. විභාග ප්‍රවේශ පත්‍රය, ජාතික හැඳුනුම්පත මෙන්ම ලිවීමට අවශ්‍ය පැන් පැන්සල් පමණක් විභාග ශාලාවට රැගෙන යා හැකි අතර තහනම් උපාංග කිසිවක් විභාග ශාලාවට රැගෙන යෑම දැඩි දඬුවම් දිය හැකි වරදක් බවයි. විභාග කොමසරිස් ජනරාල්වරයා පැවැසූයේ එවැනි දේ භාවිත නොකළද ළඟ තබා ගැනීම වුව වසර 5ක් දක්වා විභාග තහනමකට ලක් විය හැකි වරදක් බවයි.
මේ අතර, බාහිර පාසල්වලින් විභාග මධ්‍යස්ථානයට පැමිණෙන සිසුන්ට හිරිහැර නොකළ යුතු බවත්, ඒ පිළිබඳ සොයා බැලීමට හා එවැනි දෙයක් වාර්තා වුව හොත් අදාළ නීතිමය ක්‍රියාමාර්ග ගැනීමට පොලීසියෙන් ඉල්ලීමක් කර ඇති බවත් ඊට විභාග දෙපාර්තමේන්තුවෙන්ද නිසි විමර්ශනයක් සිදු කරන බවත් විභාග කොමසාරිස් ජනරාල්වරයා ප්‍රකාශ කළේය.
