‘බියන්කා’ පරිවර්තනය බ්‍රහස්පතින්දා පාඨක දෝතට
රුසියානු ලේඛක, රුසියානු ළමා අරමුදලේ සභාපති දිමීත්‍රි ලිහනෝව් සමඟ පැවැත්වෙන හමුවක් සහ ඔහුගේ ‘බියන්කා’ කෘතිය මහින්ද සෙනරත් ගමගේ සූරීන්ගේ පරිවර්තනයෙන් සිංහල භාෂාවෙන් දොරට වැඩීමේ උත්සවයක් සංස්කෘතික කටයුතු අමාත්‍ය මහාචාර්ය හිනිඳුම සුනිල් සෙනෙවි, රුසියානු තානාපති ලෙවාන් ජගරියාන් සහ රුසියානු මන්දිරයේ අධ්‍යක්ෂිකා මරියා පපෝවා මහත්ම මහත්මීන්ගේ සහභාගිත්වයෙන් බ්‍රහස්පතින්දා (20) ප.ව. 3.00ට කොළඹ 7, නිදහස් මාවතේ රුසියානු මන්දිර ශ්‍රවණාගාරයේදී පැවැත්වේ. බුද්ධශාසන, ආගමික හා සංස්කෘතික කටයුතු අමාත්‍යාංශය, කොළඹ රුසියානු මන්දිරය සහ රුසියානු සාහිත්‍ය කවය එක්ව මෙය සංවිධානය කරනු ලැබේ.
චාල්ස් දයානන්දගේ ‘මම අහස වෙමි’ 29 දා ජනගත වේ
ප්‍රවීණ චිත්‍ර ශිල්පි චාල්ස් දයානන්දයන් විසින් රචිත ‘මම අහස වෙමි’ කෘතිය මේ මස 29 සෙනසුරාදා පෙ.ව. 10. 00ට ආනන්ද කුමාරස්වාමි මාවතේ, මහවැලි කේන්ද්‍රයේදී ජනගත වේ. බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය සුනිල් සෙනෙවි, ප්‍රවීණ කිවියර රත්න ශ්‍රී විජේසිංහ, ප්‍රවීණ නාට්‍යවේදි පරාක්‍රම නිරිඇල්ල මහත්වරුන් මෙහිදී දෙසුම් පැවැත්වීමට නියමිතය.
සබුද්ධි කාව්‍ය සම්මාන සඳහා කෘති භාර ගැනේ
සබුද්ධි සංගමය මඟින් වාර්ෂිකව පවත්වනු ලබන ‘සබුද්ධි කාව්‍ය සම්මාන’ සඳහා කාව්‍ය කෘති භාර ගැනීම මාර්තු 30 දින දක්වා සිදු කෙරේ. ප්‍රකාශන ආයතනයක් මඟින් හෝ කර්තෘ ප්‍රකාශනයක් ලෙස හෝ 2024 වසර තුළ පළ කරන ලද කවි පොත් මේ සඳහා ඉදිරිපත් කළ හැකිය. ඒ සඳහා ඉදිරිපත් කරන කාව්‍ය සංග්‍රහ එකකින් පිටපත් 4 බැගින් වට්ස්ඇප් අංකයක්ද සඳහන් කර ‘තමීර මංජු, සභාපති, සබුද්ධි සංගමය, අංක 2E/F03/U03, ලේක් ක්‍රෙස්ට්, මණ්ඩවිල, අංගොඩ’ යන ලිපිනයට තැපෑලෙන් හෝ ගෙනැවිත් භාරදී ඒ බව +94710535566 යන අංකයට වට්ස්ඇප් මඟින් දැන්විය යුතුය.
ලෝගුවක් ඇඳි සරල මිනිසා
කර්තෘ – රොමේෂ් නෝනිස්
නුවන පොත් ප්‍රකාශනයකි
ලක් කිතු සසුනේ අභිවෘද්ධියට මහත් මෙහෙවරක් කළ ආචාර්ය ජයලත් බලගල්ල පියතුමන්ගේ දිවි පවත හා සසුන් සේවාව අලළා රචිත උපහාර ග්‍රන්ථයකි. අගරදගුරුතුමන් ප්‍රමුඛ කිතුනු පූජකවරුන් මතු නොව, මහානායක ස්වාමීන් වහන්සේ ඇතුළු සෙසු ආගමික පූජක පක්ෂයද මීට ලිපි සපයා තිබීමෙන් බලගල්ල පියතුමන් ආගමික හා වාර්ගික සුහදත්වය වෙනුවෙන්ද කැපව කටයුතු කළ සැටි ප්‍රකට වේ.
විමලරත්න කුමාරගම කාව්‍ය විමර්ශන
කර්තෘ – මල්දෙණියේ ජයතිස්ස
කර්තෘ ප්‍රකාශනයකි
කොළඹ යුගයේ දෙවැනි පරපුරේ ප්‍රවීණ කවියකු වූ විමලරත්න කුමාරගමයන් විසින් සිය ජීවිතයේ අවසාන භාගයේදී කොත්මලේ ප්‍රදේශයේ රාජකාරියේ නියුතුව සිටි සමයේ රචනා කරන ලද කවි පිළිබඳ විග්‍රහයකි. කුමාරගම කවියා සහ නිර්මාණ සඳහා පසුබිම් වූ කොත්මලේ ප්‍රදේශය ගැන මනා අවබෝධයක් ඇති කතුවරයාද ක්‍රියාකාරි කවියෙකි.
මහා වනයේ භීතිකාව
කර්තෘ – ඩබ්ලිව්.ඕ.ටී. ප්‍රනාන්දු
ගිහාන් පොත් ප්‍රකාශනයකි
අධ්‍යාපනික කෘති ඇතුළු ළමා හා යොවුන් පොත් රැසක් රචනා කර ඇති කතුවරයාගේ අලුත්ම යොවුන් නවකතාව මහා වනයේ භීතිකාව නමින් ප්‍රකාශයට පත් වී ඇත. දරුවන් සිව් දෙනකු මහ වනයක් මැදදී විඳ ගන්නා ත්‍රාසජනක අත්දැකීම් සමුදායක් කුතූහලය දනවන ලෙස පෙළගස්වන මේ පොත අපූරු සිතුවම් රැසකින්ද සමන්විතය.
කරුණාවතී සහ පුස්තකාලය
කර්තෘ – කංචනා කුමාරි
දොඩංගොඩ
ෆාස්ට් පබ්ලිෂින් ප්‍රකාශනයකි
කතුවරියගේ කුලුඳුල් කෙටිකතා සංග්‍රහයයි. හේමලයා, තවත් එක් දිනයක්, රියැලිටි, දෙවැනි විවාහය, සිතුවම්, හඳුනන නාඳුනන, කරුණාවතී සහ පුස්තකාලය යනුවෙන් කෙටිකතා 7ක් මෙහි සංගෘහීතය. මේ කතා රචනා කිරීමේදී කතුවරිය මනරම් බස් වහරක් භාවිතයට ගෙන ඇත.
නවග්‍රහ ශාන්ති යන්ත්‍ර නවග්‍රහ පූජාව, ධන්වන්තරී පුදපූජා ශිව ශාන්ති ස්වයංවර පූජාව
කර්තෘ – ජේ.ඒ.ඩී. පෙරේරා
උදය ප්‍රකාශනයකි
ජ්‍යොතීර්වේදි, කලාභූෂණ ජේ.ඒ.ඩී. පෙරේරා විසින් නවග්‍රහ ශාන්ති යන්ත්‍ර, නවග්‍රහ පූජාව, ධන්වන්තරී පුදපූජා, ශිව ශාන්ති ස්වයංවර පූජාව යනුවෙන් ජ්‍යොතිෂ පුස්තිකා හතරක් ප්‍රකාශයට පත් කර ඇත. එදිනෙදා ජීවිතයට අවශ්‍ය කරන ජ්‍යොතිෂ කරුණු රැසක් මේ එක් එක් කෘතියේදී සරල බසින් ඉදිරිපත් කර තිබේ.
