පසුගිය රජයෙන් ‘සමෘද්ධි’ලාභීන් වන අපට රුපියල් 5000.00 දීමනාවක් ලැබිණ. ‘අස්වැසුම’ දීමනාව ආවාට පසු එම රුපියල් 5000.00 දීමනාව රුපියල් 2500.00 දක්වා අඩු කෙරිණ. එම මුදල අපට බෙහෙත් ටිකක්වත් ගැනීමට ප්‍රමාණවත් නැත. පසුගිය දිනවල ‘අස්වැසුම’ මුදල වැඩි කර දුන්නත් 2500ක දීමනාව ලබන අපට කිසිම මුදලක් වැඩි වූයේ නැත. මෙම රුපියල් 2500ක දීමනාව ලැබෙන්නේ අන්ත, දුගී, අසරණ පවුල්වලට බව විශේෂයෙන් මතක් කළ යුතුය.
ගරු ජනාධිපතිතුමාගෙනුත් සමාජ සේවා ඇමති තුමාගෙනුත් අප කරුණාවෙන් ඉල්ලා සිටින්නේ ‘අස්වැසුම’ රුපියල් 2500ක දීමනාව ලබන දුප්පත් අපටත් යම්කිසි මුදලකින් වැඩි කර දෙන ලෙසයි.
ජනතාවට අප්‍රේල් මාසයේදී සහන ලබා දෙනවා නම් (සියලු දීමනා දෙනවානම්) රුපියල් 2500ක දීමනාව ලබන සියලුම දුප්පත් ජනතාවටත් යම්කිසි මුදලක් හෝ සහනයක් ලබා දීමට කටයුතු කරන මෙන් ගරු ජනාධිපතිතුමන් ඇතුළු රජයෙන් කරුණිකව ඉල්ලා සිටිමු.
චන්ද්‍රසීලි හේවා පතිරණ – දිවුලපිටිය
ණයෙන් රට මුදවාගතහොත් එය දිනූ යුද්ධයට නොදෙවෙනි වික්‍රමයක්
බුරුතු පිටින් මිනිස් ඝාතන සිදු වෙමින් තිස් වසරක් පුරාවට පැවැති යුද්ධය නිසා රට තුළ ආර්ථික අර්බුදයක් ද පැවැති මුත් මහින්ද රාජපක්ෂ මේ රටේ ජනාධිපති වන තෙක්ම පැවැති ආණ්ඩු යුද්ධයට අත ගැසීමක් කළේ නැත. කෙසේ හෝ රටේ ජනතාවගේ වාසනාවට යුද්ධයේ නිමාවක් දුටහ.
මෙය මහින්ද රාජපක්ෂ ජනාධිපතිවරයාගේ ‘වික්‍රමයක්’ හැටියට ඇතැම්හු සඳහන් කරතත් දැන් රටේ ජනතාව මැරි මැරී ජීවත්වෙනවා යැයි කියන්නේ ඒ තරමටම ජනතාව ණය බරින් මිරිකී සිටින නිසාය. ඒ මදිවට කලින් කලට පැටවෙන බදු බරද ඒ අනුව ඉහළ යන අත්‍යාවශ්‍ය ආහාර හා භාණ්ඩ මිල කෙසේවත් ජනතාවට දැරිය නොහැකිය. මේ සියල්ලටම මූලික හේතුව වී ඇත්තේ ජාත්‍යන්තර මූල්‍ය අරමුදලෙන් පවා රජයත්, රටත්, ජනතාවත් දෙස් විදෙස් ණයකරයකට මුහුණ දී ඇති නිසයි.
ජනතාව “මාලිමා” රජය බලයට පත් කර ගත්තේ රටත් ජනතාවත් මුහුණපා ඇති මේ ණය බරින් මුදවා ගැනීමට. එය “මාලිමා” රජයට නොහැකි වුවහොත් වෙන කුමන රජයක් බලයට පත් වුණත් ඒ කාර්ය කිසි විටෙකත් සිදු වන්නේ නැති බව ජනතා විශ්වාසයයි.
එබැවින් මේ රටත් ජනතාවත් පත් කර ඇති දෙස් විදෙස් ණයෙන් මුදවා ගතහොත් තිස් වසරක යුද්ධය දිනු ‘වික්‍රමය’ ට නොදෙවෙනි වික්‍රමයක් වනවාට කිසිදු සැකයක් නැත. මේ අභියෝගය වත්මන් රජය ජයග්‍රහණය කළොත් ඉදිරි මැතිවරණවලදී ජනතාව කිසිවිටෙකත් ‘මාලිමාව’ අත නොහරින බවද කිව යුතුය.
ආර්.එම්. රත්නායක – හිඳගල
රාජ්‍ය තොරතුරු කේන්ද්‍රයේ 1919 අංකය නමට විතරයි
– කාර්යබහුල බව දැන ගැනීම මිස වෙනත් තොරතුරක් ගන්න බෑ
රාජ්‍ය තොරතුරු කේන්ද්‍රයේ 1919 ඇමතුවද බොහෝ අවස්ථාවල රාජ්‍ය ආයතනයක දුරකතන අංකයක් ලබා ගැනීමට නොහැකි වීමෙන් දුරකතන ඇමැතුම් අංක බලාපොරොත්තු වන පාරිභෝගික ජනතාව විශාල ගැටලුවකට මුහුණ පා සිටිති. විශේෂයෙන් මාධ්‍ය ආයතනවල මාධ්‍යවේදීන්ටද මෙම දුරකතන අංක අත්‍යවශ්‍ය වුවද බොහෝ විට දිවා කාලවලදී මෙම තොරතුරු මධ්‍යස්ථනය ඇමැතීමට නොහැකිය.
බොහෝ අවස්ථාවල පටිගත කළ හඬ පටයක් මඟින් එම නොහැකියාව දැනුම් දෙන බවද මාධ්‍යවේදීන් ඇතුළු පාරිභෝගිකයෝ චෝදනා කරති. “කනගාටුයි ඔබගේ ඇමැතුම් නියෝජිතයන් කාර්යබහුල බැවින් කරුණාකර වෙනත් නියෝජිතයකු සම්බන්ධ වන තෙක් මඳක් රැඳී සිටින්නැයි” කියනු හැරුණු විට පාරිභෝගික අවශ්‍යතාවන් ඉටු නොකරන බවටද ඔවුහු චෝදනා කරති.
‘රාජ්‍ය තොරතුරු කේන්ද්‍රය’ තොරතුරු තාක්ෂණ ආයතනය යටතේ පවතින ආයතනයකි. මෙම අකාර්යක්ෂමතාව වඩාත් ප්‍රකට වන්නේ දිවා කාලයේදී බව බොහෝදෙනා පවසති. ඕනෑම වෙලාවක ‘1919’ අමතන සැණින් පටිගත කළ හඬ පටයක් මඟින් සම්බන්ධවීම නම් අපූරුවට සිදුවන බව ඔවුහු කියා සිටිති.
දමිත් ශ්‍රියන්ත – පිළිමතලාව
රිටිපන්න ධීවරයන් බලන්න ආ විදෙස් සංචාරකයන්ට බාධා
කොග්ගල හරිත වෙරළ උද්‍යානයේ ප්‍රදර්ශනාත්මක රිටිපන්න වෘත්තියේ නියැළෙන ඇතැම් පුද්ගලයන් නිසා වෙරළ කලාපයේ ස්වභාව සෞන්දර්ය විඳිමින් ඒවා ඡායාරූපගත කිරීමට පැමිණෙන විදේශිකයන්ට බාධා එල්ල වෙමින් තිබීම මෙරට සංචාරක ක්ෂේත්‍රයට කළු පැල්ලමක් එක්කරමින් තිබේ.
මෙහි සිටින ඇතැම් තැරැව්කරුවන් විසින් විදේශීය සංචාරකයන්ගෙන් අසාධාරණ ලෙස මුදල් ලබා ගැනීමට උත්සාහ කරන අතර අපේක්ෂිත මුදල ලබා නොදෙන විදේශිකයන් හට ඡායාරූප ගැනීමට බාධා කිරීමට කටයුතු කරන බව අප සියැසින් දුටුවෙමු.
මෙම අසාධාරණයට ඇතැම් විදේශිකයන් තදබල ලෙස තම විරෝධය දක්වමින් තමන්ට වන මෙම සිදුවීම් වීඩියෝගත කරමින් සමාජ මාධ්‍ය වෙත මුදාහැරීමටද කටයුතු කර ඇත.
මෙය සංචාරක ව්‍යාපාරය කෙරෙහි දැඩි ලෙස බලපෑමක් ඇති කරන තත්ත්වයක් බව වටහාගත් අප මේ පිළිබඳව හබරාදුව ප්‍රදේශීය සභාව දැනුවත් කළ අතර, එහිදී මේ පිළිබඳව ගන්නා ක්‍රියාමාර්ගය කවරේදැයි අප කළ විමසීමේදී ඔවුන් පවසා සිටියේ “කොග්ගල අහංගම වෙරළ ආශ්‍රිතව රිටිපන්න ධීවර කර්මාන්තය මේ වන විට ඒ ආශ්‍රිත ධිවරයින්ගේ ජීවනෝපාය වී ඇති බවත්, ධීවරයන් සහ නැරඹීමට පැමිණෙන විදේශිකයන්ට අසාධාරණයක් නොවන පරිද්දෙන් විදේශිකයන්ගෙන් මුදල් අය කිරීම සඳහා සාධාරණ මිල නියාමනයක් කිරීමට පියවර ගන්නා බවත්ය. ඒ අනුව ඉදිරියේදී අදාළ ස්ථානයන්හි දැන්වීම් පුවරු ප්‍රදර්ශනය කිරීමට පියවර ගන්නා බව ඔවුන් පැවසූහ.” නමුත් එය යථාර්ථයක් වේද යන්න තවමත් අවිනිශ්චිතය. මේ වන විටත් එම සිදු වීම ඒ ආකාරයෙන්ම සිදුවෙමින් තිබේ. සංචාරක ව්‍යාපාරය වර්ධනය වෙමින් ඇති තත්ත්වයක් තුළ මෙවැනි දේ පිළිබඳ කඩිනමින් පියවර ගැනීමට අදාළ බලධාරීන් දැනුවත් කිරීමට වගකිව යුතු බලධාරීන් වහා පියවර ගත යුතුය.
කේ.බී. විදානගම – අහංගම
