හොඳම අධ්‍යක්ෂ, හොඳම නළුවා සහ නිළිය ඇතුළු OCIC සම්මාන 9ක් දිනාගත් සිසිල ගිනිගනී ඔහුගේ කුලුඳුල් සිනමා අධ්‍යක්ෂණයයි. ඉන් ලද පන්නරයෙන් නිම වූ අනන්ත රාත්‍රිය ඔහු අන්තර්ජාතික ඇගයීම දක්වා රැගෙන ගියේය. එය ඔහුගේම තිර පිටපතක් වීම ද විශේෂත්වයකි. 1998 වසරේ සිංගප්පූරු ජාත්‍යන්තර සිනමා සම්මාන උලෙළේ නීටා ප්‍රනාන්දු හොඳම නිළිය බවට පත්කරමින් පවුරු වළලු නිර්මාණය වන්නේ ඔහුගේ තෙවැනි සිනමා නිර්මාණය ලෙසිනි. පුරහඳ කළුවර, ඉර මැදියම, මචන්, ආකාස කුසුම්, ගාඩි වැනි නිර්මාණ දිගින් දිගටම ඔහු ජාත්‍යන්තර සම්මාන, ඇගැයීම් දක්වා තල්ලු කළේය. පසුගියදා ඉන්දීය විචාරක සම්මාන උලෙළේ හොඳම චිත්‍රපට නිර්දේශ නාමයන් අතරට එක්වූ පැරඩයිස් සිනමාපටය ප්‍රසන්න විතානගේ නම් වූ සිංහල සිනමාකරුවා ඉන්දියානූ සිනමාකරුවෙක් බවට පත් කළේය.
“පැරඩයිස්“ සිනමාපටය නිර්දේශ වීම ගැන මොකද හිතෙන්නේ?
පැරඩයිස් සිනමාපටය ඉන්දීය චිත්‍රපට විචාරකයින් විසින් පිරිනමනු ලබන විචාරක සම්මාන උලෙළේ හොඳම චිත්‍රපටය සඳහා නිර්දේශ වීම ලොකු සතුටක්. ඊට අමතරව හොඳම නිළිය දර්ශනා රාජේන්ද්‍රන්, හොඳම සහාය නළුවා මහේන්ද්‍ර පෙරේරා, හොඳම සංස්කරණය ඒ. ශ්‍රීකර් ප්‍රසාද් නිර්දේශ නාමයන් අතරට එකතු වීමත් සතුටක්. මේ චිත්‍රපටයට දායක වුණු හැමෝම මෙම ජයග්‍රහණයේ පංගුකාරයින් වනවා.
මෙවර සම්මාන උලෙළේ පළමු වතාවට සිදුවන විශේෂ සිදුවීම් කිහිපයක්ම තියෙනවා. ඒ ගැන මොකද හිතෙන්නේ?
පැරඩයිස් මලයාලම් බසැති චිත්‍රපටයක් වුණත් හින්දි, දමිළ, ඉංග්‍රීසි වගේම සිංහල භාෂාවත් ඇතුළුව බහුභාෂීය චිත්‍රපටයක් ලෙස නිර්මාණය වීම වගේම අධ්‍යක්ෂවරයා ඉන්දියානූ ජාතිකයෙක් නොවීමත් විශේෂත්වයක්. මං දන්න තරමින් ඉන්දියානූ ජාතිකයෙක් නොවන අධ්‍යක්ෂවරයකුගේ චිත්‍රපටයක් හොඳම චිත්‍රපටය සඳහා නිර්දේශ වුණු පළමු අවස්ථාව මේක. ඒ වගේම ඉන්දීය ජාතික චිත්‍රපට උලෙළක අපේ රංගන ශිල්පියෙක් නිර්දේශ වුණු පළමු අවස්ථාවත් මේක. මේ දේවල් සිදුවෙන්නේ පළමු වතාවට කියමින් උදම් අනනවාට වඩා මං විශ්වාස කරන්නේ මේ හරහා තවත් අයට කිසියම් මාවතක් එළිපෙහෙළි වුණා කියන එක. සාමාන්‍යයෙන් ඉන්දියානූ චිත්‍රපට ලංකාව වෙළෙඳපොළක් කරගත්තා මිසක් ලංකාවේ අධ්‍යක්ෂවරුන්ට, රංගන ශිල්පීන්ට එහේ අවස්ථාවක් ලැබෙනවා අඩුයි. අපිත් ඔවුන්ගේ වෙළෙඳපොළට ඇතුළු වෙලා අපේ ප්‍රකාශනයන්ට තවත් ප්‍රේක්ෂකයින් පිරිසක් එකතු කරගැනීම තමයි අපිත් කළ යුත්තේ කියන තැනයි මං ඉන්නේ.
පැරඩයිස් සඳහා සම්බන්ධ වුණු ශිල්පීන් ගැන සඳහන් කළොත්?
ප්‍රධාන චරිත දෙක හැරුණු කොට මහේන්ද්‍ර පෙරේරා, ශ්‍යාම් ප්‍රනාන්දු ඇතුළු අනෙක් සියල්ලන්ම ලාංකික ශිල්පීන්. චිත්‍රපටය නිෂ්පාදනය කළේ කේරළය පදනම් කරගත් නිවුටන් සිනමා සමාගම. තිර රචනයට මාත් සමඟින් අනුෂ්කා සේනානායක දායක වුණා. අධ්‍යක්ෂණය මගේ. රූගත කිරීම් සියයට සීයක්ම සිදුවුණේ ලංකාවේ.
පැරඩයිස් චිත්‍රපටයට මින් පෙරත් අන්තර්ජාතික වශයෙන් සම්මාන හිමිවෙලා තියෙනවද?
2023 දකුණු කොරියාවේ පැවැති ආසියාවේ ප්‍රමුඛතම සිනමා උලෙළ වන බූසාන් සිනමා උලෙළේ දී හොඳම චිත්‍රපටයට සම්මාන හිමිවුණා. ප්‍රංශයේ පැවැති වෙසූල් අන්තර්ජාතික ආසියානූ සිනමා උලෙළේ දී තරුණ ජූරියේ සම්මානය හිමි වුණා. ඊට අමතරව ස්පාඤ්ඤයේ ලක්ස්පල්මාර්ක් උලෙළේ දී ප්‍රේක්ෂක සම්මානය දිනා ගත්තා. තවත් නිර්දේශයන් ගණනාවකට ලක්වුණා.
ලංකාවෙන් පිටත ප්‍රතිචාර ගැන කතා කළොත්?
මම හැමවෙලේම විශ්වාස කරන දෙයක් තමයි ශ්‍රී ලාංකික සිනමාකරුවකුට දේශීය වෙළෙඳපොළෙන් පමණක් සෑහීමකට පත්වෙන්න බැහැ කියන එක. සිනමාවේ මාධ්‍ය වෙන්නේ රූපය. ඒක එක් ජාතියකට, වර්ගයකට අයිති එකක් නෙවෙයි. සිනමා භාෂාව ජාත්‍යන්තරයි. ජාත්‍යන්තර භාෂාවකින් කරන නිර්මාණයක් ජාත්‍යන්තරවත් ජය ගත යුතුයි කියන එක මං මුල ඉඳන්ම විශ්වාස කළා. අන්තර්ජාතික චිත්‍රපට උලෙළවලට පමණක් සීමා නොවී දැන් මගේ චිත්‍රපටවලට ලොව පුරා වාණිජ ප්‍රදර්ශනයටත්, ධාරාගත ප්‍රදර්ශනයටත් අවස්ථාව ලැබිලා තියෙනවා.
පැරඩයිස් නිර්මාණය වෙන්නේ ලංකාවේ සිදුවීමක් පදනම් කරගෙන නේද?
පැරඩයිස් කතාවස්තුවට පදනම් වන්නේ 2022 වසරේ මෙරට පැවැති ආර්ථික අර්බුදය හමුවේ මෙරටට පැමිණෙන ඉන්දීය සංචාරක යුවළක් මුහුණ දෙන අත්දැකීමක්. ආදරය වැනි මානව සම්බන්ධතා ඇතුළුව පොදු මනුෂ්‍ය ස්වභාවය ගැනම කතා කරන නිර්මාණයක් නිසා ලංකාවෙන් ඔබ්බට යමින් එය ලෝකයේම පිළිගැනීමට ලක්වුණා කිව්වත් හරි.
ඉන්දීය නළු නිළියන් සමඟ වැඩ කරන්න ලැබීම ගැන මොකද හිතෙන්නේ?
මෙහි ප්‍රධාන චරිත මවන රෝෂන් මැතිදිව් සහ දර්ශනා රාජේන්ද්‍රන් සමඟ වැඩ කරන එක හරිම පහසුවක් වුණා. ඔවුන් එක්ක වැඩකරන්න ලැබීමත් සතුටක්. ඒ වගේම චිත්‍රපටයේ කැමරා අධ්‍යක්ෂ රාජීව් රවී මාත් එක්ක ගාඩි චිත්‍රපටයේ වැඩ කරල තිබුණා. සංස්කරණය කළේ ඉන්දියාවේ ප්‍රමුඛතම සංස්කරණ ශිල්පියෙක් වන ශ්‍රීකර් ප්‍රසාද්. ලංකාවේ කාර්මික ශිල්පීන්ගේ කැපවීමත් අගය කළ යුතුමයි.
ඉන්දීය විචාරක සම්මාන උලෙළේ හොඳම චිත්‍රපටයට හිමි සම්මානය ලැබේවි කියන බලාපොරොත්තුව තියෙනවද?
මං චිත්‍රපට හදන්නේ සම්මාන බලාගෙන නෙවෙයි. නමුත් අන්තර්ජාතික අවධානයට ලක්වීම පුළුල් ප්‍රේක්ෂක පිරිසක් අතරට යන්න මට හේතුවක් වුණා කිව්ව නම් හරි. මේ නිර්දේශ වීමම ලොකු ජයග්‍රහණයක් විදිහටයි මං දකින්නේ.
ඉදිරියේ දී අපට මොනවගේ නිර්මාණවලින් ද දකින්න ලැබෙන්නේ.?
මේ මොහොතෙත් තිර රචනා කිහිපයකම මං වැඩකරමින් ඉන්නවා. ඉක්මනින්ම ඊළඟ චිත්‍රපටයේ වැඩකටයුතු ආරම්භ කරන්න බලාපොරොත්තු වෙනවා. ඒත් එක්කම මාලිනී ෆොන්සේකා මහත්මිය රජත මයුරා සම්මානය දිනූ ආකාස කුසුම් චිත්‍රපටය නැවත ප්‍රදර්ශනය කිරීමට බලාපොරොත්තු වෙනවා. පසුගිය කාලය තුළ එය ඉහළ ප්‍රමිතියකින් ඉන්දියාවේ දී ඩිජිටල් මාධ්‍යයට පරිවර්තනය කළා. ඇයගේ 78 වැනි උපන් දිනයදා එය ප්‍රේක්ෂකයින් සඳහා තිරගත කිරීමට බලාපොරොත්තු වෙනවා.
