ලොව දෙවැනි විශාලතම ආර්ථිකය ලෙස, චීන ආර්ථික වෘද්ධියේ ගමන් පථය ලොව පුරා ආර්ථික විද්‍යාඥයන්ගේ සහ ප්‍රතිපත්ති සම්පාදකයන්ගේ සමීපව නිරීක්ෂණයට ලක්ව තිබේ. වෙළෙඳ ආතතීන් සහ පශ්චාත් වසංගත ප්‍රකෘතිකරණයේ සිට දේශීය ආර්ථික ප්‍රතිව්‍යූහගත කිරීම දක්වා අභියෝග රැසක එකතුවක් මධ්‍යයේ, චීනය 2025 වසර සඳහා 5%ක මධ්‍යස්ථ නමුත් සැලකිය යුතු වර්ධන ඉලක්කයක් තබා ඇත.
චීන ව්‍යවස්ථාදායකයේ වාර්ෂික රැස්වීම වන ජාතික මහජන කොංග්‍රසයේ ආරම්භක සැසිවාරය හමුවේ අගමැති ලී කියෑං විසින් ඉකුත් බදාදා ඉදිරිපත් කරන ලද වාර්තාවක් මඟින් දළ දේශීය නිෂ්පාදිත වර්ධනය සඳහා වන ඉලක්කය 5%ක් ලෙස ප්‍රකාශයට පත් කර ඇත. දේශපාලන සහ ආර්ථික අභියෝගවලින් ගහන වූ අවදියක පවා තම ආර්ථික වර්ධනය ස්ථාවර මට්ටමක රඳවා ගැනීමට චීන රජයට ඇති අභිලාෂය එමඟින් පිළිබිඹු වෙයි.
කොවිඩ් වසංගතයෙන් අනතුරුව, චීන ආර්ථිකය සැලකිය යුතු උච්චාවචනයන්ට මුහුණ පා ඇත. ආරම්භක ප්‍රතිසාධන අවදිය අපේක්ෂා ජනිත කළ නමුදු, මෑතකදී නිකුත් වූ දත්ත මඟින් පාරිභෝගික විශ්වාසය පහත වැටීම, දේපොළ වෙළෙඳපොළ අස්ථාවරත්වය සහ අඩු අපනයන යනාදිය මඟින් වඩාත් සංකීර්ණ යථාර්ථයක් පෙන්නුම් කරයි. අන්තර්ජාතික මූල්‍ය අරමුදල ගෝලීය භූ දේශපාලනික ආතති සහ චීන ආර්ථිකය තුළ ව්‍යූහාත්මක අකාර්යක්ෂමතා මඟින් උද්ගත කරන ලද වර්ධනයේ පහත වැටීමක් පුරෝකථනය කර ඇත. එවැනි පසුබිමක 5%ක වර්ධන ඉලක්කය සපුරාගැනීමෙහිලා චීනය ගන්නා ක්‍රියාමාර්ග කවරේදැයි විමසා බැලීම ශ්‍රී ලංකාවේ අපටද බෙහෙවින් වැදගත්ය.
දේශීය පරිභෝජනය සහ පාරිභෝගික විශ්වාසය
බිලියන 1.4ක ජනගහනයක් සිටින චීනයට සුපිරි වෙළෙඳපොළක් සහ විශාල දේශීය ඉල්ලුමක් පවතී. ඒ අනුව, වර්ධන ඉලක්කය සපුරාගැනීම, රටේ ආර්ථිකයේ තීරණාත්මක අංගයක් වන දේශීය පරිභෝජනය ශක්තිමත් කිරීම මත දැඩි ලෙස රඳා පවතිනු ඇත. මෑත කාලීන රජයේ ප්‍රතිපත්ති මඟින් මූල්‍ය උත්තේජනය, බදු අඩු කිරීම් සහ සමාජ සුභසාධන වැඩිදියුණු කිරීම් හරහා පාරිභෝගිකයාගේ ක්‍රය ශක්ති බලය වැඩි දියුණු කිරීම අරමුණු කර ගෙන ඇත. දේශීය සහ අන්තර්ජාතික වෙළෙඳපොළ දෙකම අවධාරණය කරන ‘ද්විත්ව සංසරණ’ උපාය මාර්ගය, එනම් අපනයන මත යැපීම අඩු කිරීමට සහ දේශීය පරිභෝජනය වර්ධනයේ ප්‍රධාන ධාවකයක් ලෙස යොදාගැනීමට උත්සාහ කරයි.
සියයට 5ක ඉලක්කය සපුරා ගැනීම සඳහා, රජය පාරිභෝගික විශ්වාසය වැඩිදියුණු කිරීමට ප්‍රමුඛත්වය දී තිබේ. රැකියා සුරක්ෂිතභාවය සහ ආදායම් ස්ථාවරත්වයට අදාළ ප්‍රධාන පාරිභෝගික ගැටලු විසඳීම මෙයට ඇතුළත් වේ. රැකියා විරහිත රක්ෂණය සහ සේවකයන් රඳවා ගැනීම සඳහා ව්‍යාපාරවලට දිරිගැන්වීම් පිරිනැමීම වැනි ප්‍රතිපත්ති ක්‍රියාත්මක කිරීමෙන් රැකියා අහිමි වීම් පිළිබඳ බිය අවම කර, වියදම් උත්තේජනය කළ හැකිය. එපමණක් නොව, සෞඛ්‍ය සේවා සඳහා ප්‍රවේශය සහ අධ්‍යාපනය වැඩිදියුණු කිරීම වැනි මධ්‍යම පන්තියට සහාය වන මුලපිරීම් අමතර වියදම් දිරිමත් කරනු ඇති අතර, එමඟින් සමස්ත ආර්ථිකයට ශක්තියක් ලැබෙනු ඇත. 
අපනයන ගතිකතා සහ ගෝලීය වෙළෙඳ සබඳතා
කලාපීය විස්තීර්ණ ආර්ථික හවුල්කාරිත්වය (RCEP) වැනි මුලපිරීම් මඟින් ආසියා-ශාන්තිකර කලාපයේ ශක්තිමත් වෙළෙඳ සබඳතා වර්ධනය කරගනිමින්, ආර්ථික ඔරොත්තු දීමේ හැකියාව පෝෂණය කිරීමට සහ අපනයන කාර්යසාධනය ශක්තිමත් කිරීමට චීනයට ඇති අභිප්‍රාය පිළිබිඹු වෙයි. 2022 වසරේදී ක්‍රියාවට නැංවූ මේ නිදහස් වෙළෙඳ එකඟතාව කලාපීය රටවල් 15ක් එකට එක් කරමින්, ලොව විශාලතම වෙළෙඳ එකමුතුව බවට පත්ව ඇති අතර, එය ලොව සමස්ත දළ දේශීය නිෂ්පාදිතයෙන් 30%කට දායකත්වය දක්වයි.
ආසියාන් සංවිධානය යුරෝපා සංගමය සහ එක්සත් ජනපදය ද අබිබවමින් චීනයේ විශාලතම වෙළෙඳ හවුල්කරු බවට පත්ව සිටී. ඒ අනුව, චීනයේ මේ ආර්ථික රාජ්‍යතාන්ත්‍රිකභාවය ගෝලීය සහයෝගිතාවේ නිම් වළලු තවදුරටත් පුළුල් කරමින් සිටී.
කෙසේ වෙතත්, පවතින එක්සත් ජනපද-චීන වෙළෙඳ ආතති චීන ආර්ථිකයේ ඉදිරි ගමනට සැලකිය යුතු අභියෝගක් එල්ල කරයි. තීරුබදු සහ සීමා කිරීම් චීන අපනයනවලට බලපාන අතර, රජයට ඒ පිළිබඳ උපායමාර්ග නැවත සිතා බැලීමට බල කරයි. නවෝත්පාදන සහ තාක්ෂණික වැඩිදියුණු කිරීම් හරහා ගෝලීය වෙළෙඳපොළේ තරගකාරිත්වය වැඩිදියුණු කිරීමෙන් වෙළෙඳ බාධක පියවා ගැනීම චීනයේ අරමුණ වී තිබේ.
ඊට අමතරව, හරිත තාක්‍ෂණය සහ ඩිජිටල් භාණ්ඩ වැනි ඉහළ වර්ධන විභවයක් සහිත කර්මාන්ත ප්‍රවර්ධනය කිරීම, තිරසරභාවය කරා ගෝලීය සංක්‍රාන්තිය සමඟ පෙළගැසීම, වර්ධනය කඩිනම් කිරීමට හේතු වනු ඇත.
යටිතල පහසුකම් සංවර්ධනය සහ ආයෝජන
යටිතල පහසුකම් සඳහා රජයේ ආයෝජනය සාම්ප්‍රදායිකව චීනයේ ආර්ථික උපායමාර්ගයේ ප්‍රධානතම කුලුනක් බවට පත්ව ඇත. ඩිජිටල් යටිතල පහසුකම්, හරිත බලශක්තිය සහ ප්‍රවාහන ජාල කෙරෙහි අවධානය යොමු කරන රජයේ ‘නව යටිතල පහසුකම්’ වැඩපිළිවෙළ, තිරසර වර්ධනයක් කරා යොමු වීමට ඇති අභිලාෂය පිළිබිඹු කරයි.
තාක්ෂණික නවෝත්පාදන සහ කාර්මික වැඩිදියුණු කිරීම්
චීනයේ ආර්ථික උපායමාර්ගය තාක්ෂණික සහ හරිත බලශක්තිය කෙරෙහි දැඩි අවධානයක් යොමු කරයි. මේ වන විටත්, චීනය කෘත්‍රිම බුද්ධිය, විද්‍යුත් වාහන සහ පුනර්ජනනීය බලශක්තිය යන ක්ෂේත්‍රවල ගෝලීය ප්‍රමුඛයා ලෙස ස්ථානගත වී ඇත. ඉකුත් වසරේ පමණක් චීනය සූර්ය පැනල ගිගාවොට් 120ක් සහ සුළං ටර්බයින ගිගාවොට් 80ක් අපනයනය කළ අතර එය හරිත සංක්‍රාන්තිය සඳහා එහි කැප වීම අවධාරණය කරයි. තවද, චීන චීන සමාගම් ගෝලීය විද්‍යුත් වෙළෙඳපොළේ ආධිපත්‍යය අඛණ්ඩවම පවත්වාගෙන යන අතර, BYD වැනි දේශීය නිෂ්පාදකයෝ ඒ කර්මාන්තයෙන් 34.1%ක කොටස් ප්‍රමාණයකට හිමිකම් කියති.
නිගමනය
2025 වසර සඳහා චීනයේ 5%ක වර්ධන ඉලක්කය සපුරා ගැනීම සඳහා බහුවිධ රජය බහුවිධ ප්‍රවේශයක් ක්‍රියාත්මක කොට ඇති අතර, අනාගත අභියෝග ජය ගැනීම සඳහා ආර්ථිකය උපායමාර්ගිකව ස්ථානගත කරමින් සිටී. දේශීය පරිභෝජනය පෝෂණය කිරීම, තිරසර යටිතල පහසුකම් සඳහා ආයෝජනය, වෙළෙඳ සබඳතා විවිධාංගීකරණය, දේපොළ වෙළෙඳාම් ක්ෂේත්‍රය ප්‍රතිසංස්කරණය සහ තාක්ෂණික නවෝත්පාදන ප්‍රවර්ධනය කිරීම එහිලා බෙහෙවින් කැපීපෙනේ. කෙසේ වෙතත්, බෙයිජිං පාලනයට මේ වසරේ තම වර්ධන ඉලක්ක සපුරාගත හැකිද යන්න රඳා පවතිනුයේ දේශීය ආර්ථික බාධක සහ වඩාත් සංකීර්ණ භූ දේශපාලනික භූ දර්ශනය යන දෙකෙහිම සැරිසැරීමට ඇති හැකියාව මතය.
විජය දිසානායක
