මෙරට ප්‍රවාහන සේවය කාර්යක්ෂම කිරීම උදෙසා නගර හා උපනගර 7ක් උපයෝගි කරගෙන බහුවිධ ප්‍රවාහන මධ්‍යස්ථාන ජාලයක් පිහිටුවීමට සැලසුම් කර ඇත.
ප්‍රවාහන, මහාමාර්ග, වරාය හා සිවිල් ගුවන්සේවා
අමාත්‍යාංශයේ මූලිකත්වයෙන් මේ කාර්යය සිදු කිරීමට පියවර ගෙන තිබේ.
ඒ අනුව මොරටුව, රාගම, කඩවත, ගම්පහ, මාලබේ, අතුරුගිරිය, කටුනායක යන නගර සහ උපනගර කේන්ද්‍ර කරගනිමින් මේ ජාලය පිහිටුවීමට අදාළ සැලසුම් සකස් කිරීමට කටයුතු යොදා ඇති අතර, ඊට අදාළ සැලසුම් වාර්තා මේ වන විටත් ඉදිරිපත් කර තිබේ. මේ බහුවිධ සංවර්ධන ව්‍යාපෘතිය මාර්ග සංවර්ධන අධිකාරිය සහ නාගරික සංවර්ධන අධිකාරිය ඒකාබද්ධව ක්‍රියාත්මක වේ. මීට පෙර රජයන් යටතේද මෙවන් බහුවිධ ප්‍රවාහන මධ්‍යස්ථාන යෝජනා වූ අතර, මාකුඹුර මධ්‍යස්ථානය හැර අනෙක් සියල්ල කතාබහට සීමා විය.
එමෙන්ම මහනුවර සඳහාද මේ ව්‍යාපෘතිය ක්‍රියාත්මක කෙරෙන අතර, ගාල්ල දෙවට ප්‍රදේශයටද නව බහුවිධ ප්‍රවාහන මධ්‍යස්ථානයන් යෝජනා වී ඇත.
එමෙන්ම දැනට ඉදිකිරීම් සිදු කෙරෙන අනුරාධපුර ප්‍රවාහන මධ්‍යස්ථානයේ ඉදිකිරීම් නිසි ශක්‍යතා අධ්‍යයනයකින් පසු විධිමත් සැලසුමකට අනුව සිදු කිරීමටද කටයුතු යොදා තිබේ. මධ්‍යම ගමනාගමන මණ්ඩලය, ජාතික ප්‍රවාහන කොමිසම, ශ්‍රී ලංකා දුම්රිය දෙපාර්තමේන්තුව ඇතුළු ආයතන ඒකාබද්ධ සම්බන්ධීකරණ ක්‍රියාවලියක් තුළ මේ ඉදිකිරීම් සිදු කිරීමට කටයුතු කෙරෙනු ඇත.
