පසුගිය සිකුරාදා (21) පෙරවරුවේ කුරුණෑගල, වාරියපොළ, පාදෙණිය ප්‍රදේශයේදී ගුවන්යානයක් කඩාවැටීමෙන් සිදු වූ අනතුර සම්බන්ධයෙන් සොයා බැලීමට 7 දෙනකුගෙන් සමන්විත විශේෂ පරීක්ෂණ කමිටුවක් ගුවන් හමුදාපති එයාර් මාර්ෂල් බන්දු එදිරිසිංහ විසින් පත් කරනු ලැබ ඇත. ශ්‍රී ලංකා ගුවන් හමුදා කටුනායක මූලික කඳවුරේ ගුවන් හමුදා අංක 5 ප්‍රහාරක බළගණයට අනුයුක්ත කර ඇති ගුවන් නියමුවන්ගේ උසස් පුහුණවීම් සඳහා යොදාගැනෙන කේ-8 ගුවන්යානයක් එදින පුහුණුවීමක් අතරතුර කුරුණෑගල වාරියපොළ, පාදෙණිය ප්‍රදේශයේදී කඩාවැටී ගිනි ගෙන විනාශ විය.
අනතුරට ලක් වූ යානයේ ගුවන් නියමු නිලධාරින් දෙදෙනා ගුවන්යානයෙන් ආරක්ෂිතව ඉවත් වී, පාදෙණිය, මිනුවන්ගැටේ විද්‍යාලය පරිශ්‍රයට පැරිෂුට් ආධාරයෙන් ගොඩබැස ඇත. මේ ගුවන්යානය ගුවන් හමුදා කටුනායක මූලික කඳවුරෙන් පෙරවරු 07.27ට පමණ ගුවන්ගත වී ඇති අතර, පෙරවරු 07.55ට පමණ මේ අනතුර සිදු වී තිබේ. යානයේ ප්‍රධාන පුහුණු උපදේශක ගුවන් නියමුවරයා හා පුහුණු ගුවන් නියමු නිලධාරිවරයා ගමන් කර ඇති අතර, එම නිලධාරීන් අනතුරින් පසු කුරුණෑගල ජාතික රෝහලට ඇතුළත් කර ඇත.
nතාරක වික්‍රමසේකර
