බටලන්ද පිළිබඳ සාධාරණ පරීක්ෂණයක් කරනවා නම් ඒ කාලසීමාවෙම සිදු වූ සියලු මරණ ගැන කළ යුතුයි. ජවිපෙ කළු පැල්ලම, අඳුරු අතීතය මකන්නයි මේ බටලන්ද පරී ෂණ කියලා එකක් හැදුවේ. එයාලගේ අඳුරු අතීතය වහගන්න තමයි මාලිමාව හැදුවේ. ඒ අතීතය මැකුවේ නැති නම් කවදාවත් ජවිපෙට බලය ගන්න බැහැ. ජවිපෙ කිවුව ගමන් මතක් වෙන්නේ 88–89 වර්ෂවල කරපු විනාශය.
සජබ සභාපති ධුරයෙන් ඉම්තියාස් බාකීර් මාකාර් මහත්තයා ඉවත් වුණා. රාජිත ඇතුළු පිරිස් වරින් වර ඉවත් වෙනවා. මොකද මේකට හේතුව?
ඉම්තියාස් බාකීර් මාකාර් මහතා ගෞරවනීය විදිහට දේශපාලනය කරන කෙනෙක්. ඔහු පක්ෂය වෙනුවෙන් කැපවෙලා වැඩ කරපු නායකයෙක්. ඔහුට මේ ඉවත් වීමට බලපෑ පෞද්ගලික හේතුවක් ඇති. සභාපති ධුරයෙන් ඉවත් වුණත් ඔහු පක්ෂයේ වැඩකටයුතුවලට ශක්තියක් වෙයි කියලා අප විශ්වාස කරනවා. කෙසේ වෙතත්, ඔහු අනෙක් අය වගේ පටු අරමුණු වෙනුවෙන් පක්ෂය දාලා ගියේ නැහැනේ. ඔහු පක්ෂයේ සියලු දෙනා බොහොම ආදරය කරන කෙනෙක්.
පළාත් පාලන මැතිවරණයේදී සජබ, එජාප සහ පොහොට්ටුව තනි පක්ෂ ලෙස මැතිවරණයට ඉදිරිපත් වී, පසුව එකට එකතු වෙන්න නේද සැලසුම් කරන්නේ. එහෙම එකතු වුණා කියලා සභාපති තනතුර ගන්න පුළුවන් වෙයි කියලා හිතනවද?
අපි මැතිවරණයෙන් පසු ප්‍රතිඵල අනුව සුහදව කටයුතු කරන්න අවශ්‍ය වන විට විපක්ෂය නියෝජනය කරන පක්ෂත් සමඟ වැඩ කරන්න සූදානම්. තනතුරු ලබා ගැනීමේදී ද මොන අවස්ථාවේදීද කියලා අපට හරියට කියන්න බැහැ. අපි ඒක ඡන්දයෙන් පසුව බලමුකො. අප සියලු පක්ෂ සමඟ සාකච්ඡා කරනවා. දැන් මැතිවරණය ආසන්නයි. ඒ නිසා ඒක ගැන අපි ඉන් පසුව කතා කරමු.
සජබ මැතිවරණ වේදිකාවේ වත්මන් ආණ්ඩුවට විරුද්ධව දමාගැසූ සියල්ල මේ වන විට නිෂේධ වෙලා… විශේෂයෙන් ආගම සම්බන්ධයෙන් කියපු දේවල් බොරු වෙලා නේද?
ආණ්ඩුව ළඟදීම දළදා වහන්සේ ජනතාවට ප්‍රදර්ශනය කරනවා කියනවා. ඒ වගේ තැන් ගිනි තියන්න ප්‍රමුඛ වුණ උදවිය මේ විදිහට ජනතාව දිනාගැනීමට හෝ මේවා කරන එක හොඳයි. මේ අය කියන තරමක් කිව්වේ බොරු. ජනතාවට අද ඒ දේවල් පැහැදිලි වෙමින් තියෙනවා. මේ අය ගැන රටේ ජනතාවට ලොකු විශ්වාසයකින් ඡන්දය ලබා දුන්නේ. ඒ විශ්වාස රැකගන්න විදිහක් අපට දැකගන්න නෑ. සිල්ලර දේවල් ගැන කතා කර කර ඉන්නවා හැර, දැවෙන ප්‍රශ්න ගැන කතා කරන්නේ නැහැ. මේ ආණ්ඩුව රට භාර ගත්තේ වැඩපිළිවෙළක් සැලසුම් කරලා නොවෙයි. මේ ආණ්ඩුව නියම දිශානතියට රටක් ගෙනයන පාටක් අපට පේන්න නැහැ.
කොහොම වුණත් විපක්ෂය ඉන්නේ අර්බුදයක නේද? සජබයටත් නගරාධිපති අපේක්ෂකයකු තෝරාගන්න බැරිව නේද තාමත් ඉන්නේ?
අපි හැමදාම කණ්ඩායමක් ලෙස කටයුතු කරන පක්ෂයක්. නගරාධිපති අපේක්ෂක ධුරය ගැනත් අප සාමූහික තීරණයක් ගන්නවා. අප ළඟ හිටපු නගරාධිපතිවරුන් ඇතුළු උගත් බුද්ධිමත් පිරිසක් ඉන්නවා. කෘත්‍යධිකාරී මණ්ඩලය, පාර්ලිමේන්තු කණ්ඩායම සහ අපේ පක්ෂයේ කළමනාකරණ කමිටුව මේ ගැන සාකච්ඡා කරලා තීන්දු කරයි. ඒකට අපි දැන්ම කලබල වෙන්නේ නැහැ.
බටලන්ද වධකාගාරය සම්බන්ධ වාර්තා ගැන කතා කරන කොට සජබ ටිකක් කලබල වෙලා නේද? වින්දිතයන්ට යුක්තිය ඉටු වෙනවට කැමැති නැද්ද?
අපි මොකටද කලබල වෙන්නේ. මම සතුටු වෙනවා බටලන්ද සම්බන්ධයෙන් විවාදයක් පාර්ලිමේන්තුවේ ඇති වෙනවාටත්. ඒ අය කියන්නේ දින දෙකක් කියලනේ. ඊට වැඩියෙන් වුණත් අපි කැමැතියි. බටලන්දට පමණක් නොවෙයි; සියලු අපරාධ සම්බන්ධයෙන් සාධාරණය ඉටු වීම ඉතා හොඳයි; ඒ වගේම පරීක්ෂණයක් ඇති විය යුතුයි. රනිල් වික්‍රමසිංහ හෝ වෙනත් අය වරදකරුවන් විය හැකියි. අපට ඒවා කිසිසේත් අදාළ නැහැ. වැරදිකරුවන්ට නීතිය ක්‍රියාත්මක කරන්න කියලා අපි කියනවා. අපට විශ්වාසයක් නැහැ ඒක කරයි කියලා. ඒකයි අපි කියන්නේ මෙය ජවිපෙ අත හෝදගන්න සුද්ද වෙන්න කරන්න එපා. අපි හිතන්නේ සුද්ද වෙන්න කරපු වැඩක් කියලයි. ජවිපෙ කරපු දේවල් ගැන අපට ඕනෑ තරම් කියන්න පුළුවන්. අපි රටට කියන්න අවශ්‍යයි. ජවිපෙ බටලන්ද මුවාවෙන් සුද්ද කරගන්න හදන්න එපා, බටලන්ද පමණක් නොවෙයි. ජවිපෙ කරපු ප්‍රචණ්ඩත්වය නිසා මේ රටේ හැම තැනම හමුදා කඳවුරු ඇති වුණා. ජවිපෙ මේ රටේ ජනතාවට විරුද්ධව ආයුධ අරගෙන කරපු විනාශය සුළුපටු නෑ. සාධාරණ පරීක්ෂණයක් කරනවා නම් ඒ කාලසීමාවෙම සිදු වූ සියලු මරණ ගැන කළ යුතුයි. ජවිපෙ කළු පැල්ලම, අඳුරු අතීතය මකන්නයි මේ බටලන්ද පරීක්ෂණ කියලා එකක් හැදුවේ. එයාලගේ අඳුරු අතීතය වහගන්න තමයි මාලිමාව හැදුවේ. ඒ අතීතය මැකුවේ නැති නම් කවදාවත් ජවිපෙට බලය ගන්න බැහැ. ජවිපෙ කිවුව ගමන් මතක් වෙන්නේ 88–89 වර්ෂවල කරපු විනාශය. කීදෙනෙක් එකපාර පෝලිමේ තියලා වෙඩි තියලා තියෙනවාද? හැන්දෑවට ගෙවල්වල ඉන්න බැරිව කැලෑවල හිටපු මිනිසුන්ට සාධාරණයක් ඉටු වෙන්න කියලා අපි කියනවා. බෙලි කපලා, තාප්පවල දාලා යන්නේ. මිනීමරලා මිනිය ගෞරවාන්විතව අවසන් කටයුතු කරන්න දුන්නේ නැහැ. ස්වාමීන් වහන්සේ ඝාතනය කළා. මේවත් හොයන්න කියලා අපි කියන්නේ.
දැන් ඔබ මේ විදිහට කිවුවාට, පසුගිය කාලයේ ඔබත් නියෝජනය කරන ආණ්ඩු තිබුණා නේ. ඇයි මේ ගැන පරීක්ෂණ කළේ නැත්තේ?
පසුගිය ආණ්ඩුවල සිදු නොකිරීම වරදක් නම්, ඒ වරද නිවැරැදි කරන්නයි මේ අය ආවේ. දැන් ඒ කාලයේ නොකරපු දේවල් කියලා වැඩක් නැහැ නේ. අපි කියන්නේ දැන් කරන්න කියලා නේ. අපේ ආණ්ඩු 1994 දී ජවිපෙ අය ඇමැතිකම් ගත්තා. ඒ ආණ්ඩු කාලයේ බටලන්දක් ගෙනාවේ නැහැ නේ. හිටපු ජනාධිපති චන්ද්‍රිකා බණ්ඩාරනායක මහත්මියගේ ආණ්ඩු කාලයේ 2005දී මහින්ද රාජපක්ෂ මහත්තයා පත් කරන්න සහයෝගය දුන්නා. බටලන්ද ගේන්න ඒ කාලයේ තිබුණානේ. බස් ගිනි තියලා, කර්මාන්ත ගිනි තියලා, අපි කියන්නේ විජය කුමාරතුංග ඝාතනය ගැන කොමිසමක් පත් කරන්න කියලා. ඒ වගේම, ස්ටැන්ලි විජේසුන්දර ඝාතනය කළේ කවුද? ඒ ගැන අපි කියන්නේ කොමිෂන් පත් කරන්න කියලා. මේ ජවිපෙත් 88–89 කළේ සුන්දර දේවල් නොවෙයි. හමුදාවේ පවුල් පිටින් ඝාතනය කළා හමුදාවේ පොලීසියේ. අධිකරණවලට ගිනි තිබ්බා. ප්‍රාදේශීය සභාවලට ඉදිරිපත් කළ හොත් අපේක්ෂකයන්ට මරණ දඬුවම දෙනවා. ඡන්දය දැම්මොත් මරණවා. එහෙම තත්ත්වයක් තිබුණේ. ජාතික හැඳුනුම්පත් ගෙදර තියාගන්න දුන්නේ නැහැ. ඒවා එකතු කරන් ගියා. ඒ වගේ යුගයක් තමයි අපට ජවිපෙ සමඟ තියෙන්නේ. ඒක අතීතයේ අඳුරුම යුගයක්. ඒ අඳුරු යුගය කවදාවත් අමතක කරන්න බෑ.
බටලන්දෙන් වැරැද්දක් වෙලා තියනවා නම්, විමර්ශනය කරනවා සේම ඒ කාලයේ වුණ වෙනත් ඝාතන ගැනත් සැලකිලිමත් වෙලා පරීක්ෂණ කරන්න කියලා මම කියන්නේ. එක් පැත්තකට විතරක් විමර්ශනය කිරීම ප්‍රමාණවත් නැහැ. මේ ජනතා විමුක්ති පෙරමුණින් වෙච්ච දේවල් අමතක කරලා බැහැ නේ. එතන අනීතික දෙයක් වෙලා තියෙනවා කියලා අපි කියනවා. ඒකට නැහැ කියලා ඒ අයට කියන්න බැහැ. ඒ ජවිපෙ අයම ප්‍රසිද්ධියේ කියනවා; මේ නායකයෝ මේ දේවල්වලට සම්බන්ධ වෙලා තියනවා කියලා. අපි කියන්නේ සාධාරණ විමර්ශනයක් කරලා ඒවා හෙළි කරන්න කියලා. පසුගිය ආණ්ඩුවලින් වුණ වැරදි නිවැරදි කරලා මේ දේවල් හොයන්න කියලා. බටලන්ද බටලන්ද ගගා ඉන්නේ නැතිව වරදක් කරලා තියෙන අයට නීතිය ක්‍රියාත්මක කරන්න. මේ අයට සාධාරණය ඉටු වෙන්න අවශ්‍යයි. ඒ අයට වගේම අනික් අයටත් නීතිය ඉටු කරන්න කියලා අපි කියන්නේ. පසුගිය කාලයේ එවැනි අතීතයක් තියනවා කියලා ඒ අය පිළිගත යුතුයි.
ඔබට බලය තිබිලත් මේ දේවල් කළේ නැති කාරණයයි මම මතු කළේ. මේතාක් ජවිපෙට දේශපාලන බලයක් තිබුණේ නැහැ නේද මේ ඝාතන සම්බන්ධයෙන් විධිමත් පරීක්ෂණ කරන්න?
මේ ආණ්ඩුව මහින්ද රාජපක්ෂ මහත්තයාටත් උදවු කළා; සරත් ෆොන්සේකා මහත්තයාටත් උදවු කළා. චන්ද්‍රිකා මහත්මියගේ කාලයේ මේ අය කාලයක් ඇමැතිකම් පවා දැරුවා. මේ අය කොහොමත් බලය තිබුණත්, නැති වුණත් මේ දේවල් කරයි කියා අප විශ්වාස කරන්නේ නෑ. මේ අද මේ රටේ ජනතාව පත් වෙලා තිබෙන තත්ත්වය ගැන අපට කනගාටුයි. ඔවුන් අයගේ බොරුවලට රැවටුණා.
උපාධිධාරීන්ට රැකියා දෙනවා කිවුවා. මොනවද වෙලා තියෙන්නේ? රැකියා අවශ්‍ය අයට රැකියා දෙන්න අවශ්‍යයි. උපාධිධාරීන්ට රැකියා දුන්නේ නැහැ. අද මේ අයට කිවුව දේවල් කරගන්න බැරි වෙලා තියෙනවා. ජාත්‍යන්තර මූල්‍ය අරමුදලේ කොන්දේසි වෙනස් කරමින් ජනතාවට සහන දෙනවා කිවුවා. මොනවද කළේ? අපි කිවුවේ නෑ එකපාර කරන්න කියලා. අත්‍යවශ්‍ය භාණ්ඩවල බදු ඉවත් කරනවා කිවුවා, කළේ නැහැ. අධ්‍යාපන ක්ෂේත්‍රයේ බදු ඉවත් කරනවා කිවුවා, කළේ නැහැ. කෘෂිකර්ම ක්ෂේත්‍රයේ බදු අඩු කරනවා කිවුවා, කළේ නැහැ. මොවුන් මේවා එක පෑන් පහරින් කරනවා කිවුවට කළේ නැහැ. මේ ආණ්ඩුව වෙච්ච පොරොන්දු ඉටු කරගන්න බැරිව කෙඳිරිගානවා.
මේ වැඩවර්ජන පසුපස ඉන්නේ සමගි ජන බලවේගයද?
අපි මේ වැඩවර්ජන පසුපසවත් ඉදිරියෙන්වත් නැහැ. මේ වැඩවර්ජන ජනතාවගේ බලාපොරොත්තු සුන් වීම නිසා සිදු වන දෙයක් මිස, අපි නිර්මාණය කරපු දෙයක් නොවෙයි. මේ ආණ්ඩුව බලයට එන්න පෙර දුන් පොරොන්දු ගැන ජනතාව විශ්වාසයෙන් හිටියා. ඒ දේවල් සිදු නොවන තැන ජනතාව දැන් පාරට බහිනවා. ඒක කාටවත් වළකන්න බැහැ. අපි මේ ආණ්ඩුවට කාලයක් දීලා තියෙනවා. ඒක නිසා අපි ඒ කාලයේ මේ ආණ්ඩුවට වැඩ කරලා පෙන්වන්න ඉඩ දීලා තියෙනවා. අපි කිසිම වැඩවර්ජනයකට නායකත්ව දීලා නැහැ. අපි සම්පූර්ණ අවස්ථාව දීලා තියෙනවා ඒ අයට කැමැති විදිහට මේ රට මෙහෙයවන්න. ජනතාවගේ විරෝධයෙන් පේනවා මේ අය රට කරන විදිහ ගැන ජනතාව ඉන්න ආකල්පය ගැන.
ඔබ මොන දේවල් කිවුවත්, ජාතික ජන බලවේගය තවත් අවුරුදු දහයක් බලයේ ඉන්නවා කියලා පාක්ෂිකයන් කියනවා…
ඕනැ කෙනකුට ඕනැ දෙයක් කියන්න පුළුවන්. ගෝඨාභය මහත්තයා එනකොටත් මේ දේවල් කිවුවා. මහින්ද රාජපක්ෂ මහත්තයාට කිවුවෙත් එහෙමයි. තුන්වැනි වතාවටත් ජනාධිපති වෙන්න එතුමා කල්පනා කළා. එහෙත් එවර ජයග්‍රණය කළේ කවුද කියලා බැලුවොත් මෛත්‍රීපාල සිරිසේන මහත්තයයි. එ සියල්ල යථාර්ථයක් වෙන්නේ නැහැ. ජනතාවගේ බලාපොරොත්තු ඉටු නොවන තැන ඒ අය පාලකයන් ප්‍රතික්ෂේප කරනවා. යථාර්ථය එයයි. ජනතාවගේ අපේක්ෂා සුන් වුණාම හැමෝටම ගෙදර යන්න වෙනවා. ඡන්දය කියන්නේ එහෙම හිතන විදිහට ගන්න පුළුවන් දෙයක් නොවෙයි. මේ ආණ්ඩුවටත් වැඩි ආයුෂ ඇති බවක් පේන්න නෑ.
lසුභද්‍රා දේශප්‍රිය
