මෙරට කලාවේ දීප්තිමත් පරම්පරා දෙකක වර්තමාන පුරුකක නැඟී එන යොවුන් ගායන ශිල්පියෙක් ලෙසින් ශෂික රණතුංගව හඳුන්වා දෙන්න පුළුවන්. තවමත් විසිතුන් වන වියේ පසුවන ශශිකගේ හඬින් ජ්‍යෙෂ්ඨ ගායනවේදී සංගීත අධ්‍යක්ෂ ආචාර්ය දයාරත්න රණතුංගයන්ගේ ගීත දෙකක් අහන්නත් ලැබෙනවා. කලාවේ උරුමය පරම්පරාවෙන් පරම්පරාවට දායාද වෙමින් යන ගමනක යන ශෂික සමඟයි මේ කතාබහ.
*අපි ඔබටම කිවුවොත් මතක් කරන්න ඔබට හිමි කලා උරුමය ගැන කියලා?
මගේ සීයලා දෙන්නා සහ ආච්චි වගේම ඉන් පෙර යුගයකුත් මට තියෙනවා. මම මෙහෙම කියන්නම් මගේ අම්මා සංගීත් නිපුන් සධානා රණතුංග. අම්මාගේ අත්තම්මා වෙන්නේ ජනප්‍රිය ගායන ශිල්පිනි කලාශූරි වසන්තා සන්ධනායක. ඒ වගේම මගේ තාත්තා නන්දික රණතුංග. තාත්තගේ තාත්තා සහ අම්මා ජ්‍යෙෂ්ඨ ගායනවේදී සංගීත අධ්‍යක්ෂ ආචාර්ය දයාරත්න රණතුංග හා නැසී ගිය ගායනවේදීනී මහාචාර්ය අමරා රණතුංග. ඒ එක්කම මගේ අම්මාගේ තාත්තා සහ අම්මා වෙන්නේ ජ්‍යෙෂ්ඨ චිත්‍රපට රංගන ශිල්පියෙක් හා චිත්‍රපට නිෂ්පාදකවරයෙක්, අධ්‍යක්ෂවරයෙක් වන කලාශූරී ශාන්ති අබේසේකර සහ ජනප්‍රිය ගායන ශිල්පිනී දයා හේමන්තා අබේසේකර. තව ඉතින් පවුලේ බොහෝ දෙනෙක් මේ කලාවේ රැඳෙනවා.
*ශෂික මේ දවස්වල මොකද කරන්නේ?
මේ දවස්වල මම මගේ සීයා ගායනා කරපු සැන්දෑ අහසේ සහ දුරස් වන්නට කියන ගීත දෙකේ Mashup එකක් කරලා රිලීස් කරලා තියෙනවා.
*කොහොමද මේ වෙද්දී ලැබෙන ප්‍රතිචාර?
ඉතාම හොඳ ප්‍රතිචාර ලැබෙනවා. ඒ එක්කම ගීතය රසවිඳින අයගෙන් ප්‍රතිචාර බලාපොරොත්තුවෙන් ඉන්නවා.
*සීයා ගැයූ ගීතවලින් කැමතිම ගීත ඔබ මේ ගයන්නේ?
මගේ සීයා ගැයූ ගීත අතරින් මම කැමති ගීත ගොඩක් තියෙනවා. ඒ ගීත අතරින් මුලින්ම කරන්න හිතුවේ සැන්දෑ අහසේ සහ දුරස් වන්නට යන ගීත දෙක.
*ඉදිරියේදී තව ගීතයක් Mashup එකක් කරනවා නම් මොකක් ද කරන්න හිතන් ඉන්නේ?
සඳ මා හා සිනාසුනා ගීතයටත් කැමතියි.
*මුනුපුරා විදිහට මේ විදිහට ගීත අලුත් කරද්දී සීයාගෙන් ලැබුණු ප්‍රතිචාරය මොකක් ද?
සීයා ගීත අහලා සතුටු වුණා. අලුත් විදිහට මියුසික් දාලා කරලා තියෙන නිසා සීයාගෙනුත් ලැබුණේ හොඳ ප්‍රතිචාර.
*පරම්පරාවේ බොහෝ දෙනෙක් මේ සංගීත ලෝකයේ ඉන්න නිසාමද ශශිකටත් ආසාවක් ඇති වෙන්නේ කලාවට එන්න?
ඇත්තෙන්ම ඔව්. මම පොඩි කාලේ ඉඳන්ම ඇහුණේ සංගීතය. ඒ නිසාම මටත් ආසාවක් ආවා මේ සංගීත ක්ෂේත්‍රය තුළ හොඳ ගමනක් යන්න. මම පොඩි කාලේ සංගීත කණ්ඩායම්වල ඉඳලා තියෙනවා.
*ඔයාගෙම කියලා ගීතයක් නිර්මාණය කරලා තියෙනවාද?
තවම නැහැ. ඉස්සරහට මම මගේම කියලා ගීත කිහිපයක් නිර්මාණය කරන්න බලාපොරොත්තුවෙන් ඉන්නවා.
*කලාවට එද්දී සීයා ආච්චි මොන වගේ උපදෙසක් ද දුන්නේ?
තමන්ගේම කියලා නිර්මාණ කරලා තමන්ටම කියන අනන්‍යතාවක් හදා ගන්න කියන එක තමයි පොඩි කාලේ ඉඳන්ම ඔවුන් මට කිවුවේ.
*ශෂිකගේ පාසල මොකක් ද?
මම ඉගෙන ගත්තේ කොළඹ රාජකීය විද්‍යාලයෙන්.
*මේ කාලයේ සංගීතය පමණද කරන්නේ?
මම තොරතුරු තාක්ෂණ ඩිප්ලෝමාවක් කරලා තියෙනවා. මේ වෙද්දී සංගීතයට තමයි වැඩි ඉඩක් වෙන් කරලා තියෙන්නේ. ඒ එක්කම මගේම කියලා ක්ලෝතින් බ්‍රෑන්ඩ් එකක් පටන් ගත්තා. ඒක දියුණු කර ගන්නත් බලාපොරොත්තුවෙන් ඉන්නවා.
*ශශිකගේ අයියත් සින්දු කිවුවා නේද?
ඔව්. ඔහු ඔෂාද් රණතුංග. අයියා මේ දවස්වල විදෙස්ගතව ඉන්න නිසා පොඩ්ඩක් සංගීතයෙන් ඈත් වෙලා වගේ. හැබැයි ඉදිරියේදී එයත් සින්දු කියයි.
*කලා උරුමයක් එක්ක ඉපදෙන්න ලැබීම ගැන මොකද හිතෙන්නේ?
නිහතමානී සතුටක් තියෙනවා. ඒ එක්කම සින්දු කියන්න පුළුවන් වීම ගැනත් තියෙන්නේ සතුටක්.
*ශෂිකගේ අම්මාගේ තාත්තා එහෙම නැත්නම් ඔයාගේ සීයා තමයි ශාන්ති අබේසේකර. ඔහු දක්ෂ රංගන ශිල්පියෙක්. ඒ නිසා රංගනයට එන්න අදහසක් නැද්ද?
අවස්ථාවක් ලැබුණොත් උත්සාහ කරලා බලන්න කැමැත්තෙන් ඉන්නවා.
*ඔබේ මේ සංගීත ගමනට පෙම්වතියගෙන් ලැබෙන සහයෝගය කොහොමද?
එයාගෙන් ලොකු සහයෝගයක් ලැබෙනවා. එයා ඇත්තටම කැමතියි මම කලාවෙන් ඉදිරියට යනවා දකින්න.
