ශ්‍රීලංකා ජාතික ටෙස්ට් ක්‍රිකට් කණ්ඩායමේ දොරට තට්ටු කරමින් පෝලිමේ රැඳී සිටින ක්‍රීඩකයන්ට මඟ විවෘත කිරීමේ අරමු‍ණින් පැවැත්වෙන ජාතික සුපිරි ලීග් ක්‍රිකට් තරගාවලිය (National Super League 4-day Tournament) ශ්‍රී ලංකා ක්‍රිකට් ආයතනය විසින් පසුගිය සති අන්තයේ ආරම්භ කරන ලද අතර, මෙවර තරගාවලිය අමුතුම නීති රීති රැසක් ඇතුළත් කොට වෙනස්ම ආකෘතියකින් පැවැත්වීමද විශේෂත්වයකි.
එනම්: සිවුවැනි වරටත් පවත්වනු ලබන මෙම ලීග් ක්‍රිකට් තරගාවලියේදී වේග පන්දු යවන්නන්ට වඩාත් උචිත තණතීරු යොදා ගැනීමත්, සෑම ඉනිමක්ම ආරම්භයේදීම පන්දු යවන්නන් හතර දෙනකු නම් කළ යුතු වීමත්, මෙන්ම කණ්ඩායමක් ඉනිමකදී ලකුණු රැස් කරන ආකාරය හා දවාගන්නා ආකාරය අනුව ප්‍රසාද ලකුණු පිරිනැමීමත් වැනි විශේෂාංග මෙවර ඇතුළත් කර ඇත.
ශ්‍රී ලංකා ක්‍රිකට් ආයතනය විසින් සංවිධානය කරනු ලබන තරගාවලි අතර ඉහළම දේශීය ක්‍රිකට් තරගාවලිය ලෙස සැලකෙන මේ සිවුදින ලීග් ක්‍රිකට් තරගාවලිය සඳහා මෙවරත් කොළඹ, ගාල්ල, මහනුවර, දඹුල්ල හා යාපනය යන කණ්ඩායම් පහක් තරග වදින අතර, මෙරට දේශීය ක්‍රිකට් තරග ආකෘතිය තුළ ක්‍රියාකාරිව සිටින පළමු පෙළ ක්‍රිකට් සමාජ 26ක් නියෝජනය කරමින් ක්‍රීඩකයන් 100ක් තරග බිමට පිවිසී ඇත.
මෙහිදී රවුන්ඩ්-රොබින් ක්‍රමය යටතේ මූලික වටයේ තරග පැවැත්වෙන අතර, කණ්ඩායම් පහ අතුරින් ඉහළම ලකුණු රැස් කරන කණ්ඩායම් දෙක අවසන් මහා තරගයට සුදුසුකම් ලබනු ඇත. හම්බන්තොට, ගාල්ල, දඹුල්ල, පල්ලෙකැලේ හා කොළඹ ආර්. ප්‍රේමදාස යන ක්‍රීඩාංගණවලදී ලීග් වටයේ තරග පැවැත්වෙන අතර, අවසන් මහා තරගය පැවැත්වීමට නියමිතව ඇත්තේ අප්‍රේල් 27-30 දිනවල කොළඹ එස්.එස්.සී. ක්‍රීඩාංගණයේදීය.
තවද, මෙවර සුපර් ලීග් තරගාවලියට අදාළව හඳුන්වා දී ඇති නීති රීති පිළිබඳ තරගාවලිය ආරම්භයට පෙර ශ්‍රී ලංකා ක්‍රිකට් ඉහළ කාර්යසාධන මධ්‍යස්ථානයේ (High Performance Centre) කළමනාකරු රුවන් කල්පගේ මහතා කියා සිටියේ ශ්‍රී ලංකාවේ පැවැත්වෙන ඉහළම ක්‍රිකට් තරගාවලිය වන මෙමඟින් බලාපොරොත්තු වන්නේ ජාතික ක්‍රිකට් කණ්ඩායමට ඇතුළත් වීමේ ඉලක්කය ජයග්‍රහණය කිරීමට හැකි ක්‍රීඩකයන් නිර්මාණය කිරීම බවයි. ශ්‍රී ලංකා ක්‍රිකට් මාධ්‍ය ඒකකය විසින් නිකුත් කරන ලද වීඩියෝ පටයක් මඟින් මේ සම්බන්ධව තවදුරටත් අදහස් දැක්වූ රුවන් කල්පගේ:
“තරගාවලියේ ඉනිමක් ආරම්භ කරන හැම වෙලාවකම පන්දු රකින කණ්ඩායම විසින් තම පන්දු යවන්නන් හතර දෙනකු පළමුව ප්‍රකාශයට පත් කළ යුතුයි. එසේ නම් කරන හතරදෙනා දිනකට අවම වශයෙන් පන්දු වාර 15ක් වත් යැවිය යුතුයි. ඒ කණ්ඩායමේ නායකයාට අවශ්‍ය නම් එකී නම් කරන ලද පන්දු යවන්නන් හතර දෙනා දෙවැනි ඉනිමේදී වෙනස් කරන්න පුළුවන්. යම් කණ්ඩායමක් ඉනිමකදී ලකුණු 400කට වඩා ලබාගෙන දළ ලකුණු වේගය 3.5කට වඩා රඳවා ගත්තොත්, ඒ කණ්ඩායමට අමතර ප්‍රසාද ලකුණක් එකතු වෙනවා. ඒ වගේම, පන්දු යවන කණ්ඩායම විසින් ප්‍රතිවාදීන් එසේ ලකුණු 400ක් ලබා ගැනීමට පෙර එකී දළ ලකුණු වේගයක් පවත්වා ගැනීමට නොදී දවාගත හොත් ඔවුන්ටද එවන් ප්‍රසාද ලකුණක් ලැබෙනවා,” යනුවෙන් අලුත් වෙනස්කම් පිළිබඳ විස්තර කළේය.
මෙවර තරගාවලිය සඳහා ජාතික ක්‍රිකට් ක්‍රීඩකයන් සියලු දෙනාම සහභාගි වන බවත්, ජාතික මට්ටමෙන් තරග වැදී ඇති ක්‍රීඩකයන් 7ක් හෝ 8ක් බැගින් අදාළ සෑම කණ්ඩායමකටම ඇතුළත් කර ඇති බවත් පැවැසූ ඉහළ කාර්යසාධන මධ්‍යස්ථානයේ කළමනාකාරවරයා:
“ ශ්‍රී ලංකාවේ තිබෙන අන්තර්ජාතික ක්‍රීඩාංගණවලයි මෙම සුපිරි ලීග් ක්‍රිකට් තරගාවලිය පවත්වන්නෙ. ඒ වගේම අන්තර්ජාතික වශයෙන් අපට ලැබෙන තණතිලිවලට සමාන තණතිලි සකස් කරලා තරගවලට යොදා ගන්නවා. ඒ කියන්නෙ දේශීයව පවත්වන අන්තර් සමාජ තරගවලට සකස් කරන තණතීරුවලට වඩා වැඩිපුර තණකොළ සහිත තණතීරුයි මේ තරගාවලියට යොදාගන්නෙ. ඒත් ඉතින් ගාල්ල වගේ තණතීරුවල එතරම් වෙනසක් නැති වෙයි. එහෙම තණකොළ වැඩි කළේ තරගය පුරාම වේග පන්දුයවන්නන් පාවිච්චි කරන්නයි. පළමු දිනයේ සිටම දඟ පන්දු යවන්නන් යොදාගන්නෙ නැතිව, 2 වැනි 3 වැනි දිනවල සිට ඔවුන් යොදාගන්න අවස්ථාව ලැබෙනවා. එහෙම වුණාම අන්තර්ජාතික මට්ටමෙන් හොඳ වේග පන්දු යවන්නන්, හොඳ පිතිකරුවන් බිහි කරගන්න පුළුවන් වගේම ඉපිලීමක් සහිත දඟකැවීමක් අඩු අමාරු තණතීරුවල පන්දු යවලා කඩුලු ගන්න පුරුදු වෙන්නත් අපේ දඟ පන්දු යවන්නන්ට අවස්ථාව උදා වෙනවා. මේ හැම එකකින්ම අපි බලාපොරොත්තු වෙන්නෙ උණුසුම් තරගකාරිත්වයක් ඇති කරලා රටට හොඳ ක්‍රීඩක පිරිසක් බිහිකර
ගැනීමයි,” යනුවෙන්ද පැවසීය.
කෙසේ වෙතත් මෙවර තරගාවලියේ පළමු ජයග්‍රහණය වාර්තා කරන්නට යාපනය කණ්ඩායම ලකුණු 87කින් පරාජයට පත් කළ කොළඹ කණ්ඩායම සමත් වූ අතර, තරගාවලිය ආරම්භ කරමින් පසුගිය සති අන්තයේ පැවති ගාල්ල-මහනුවර අතර අනෙක් තරගය ජය-පරාජයෙන් තොරව අවසන් විය.
තවද තරගාවලිය ආරම්භක සතියේදීම ගාල්ල කණ්ඩායමේ නිපුන් ධනංජය (137), රමේෂ් මෙන්ඩිස් (121) හා පසිඳු සූරියබණ්ඩාර (102*) මෙන්ම මහනුවර කමිල් මිෂාර (158), කොළඹ අව්ශ්ක ප්‍රනාන්දු (144) හා යාපනය කණ්ඩායමේ රවිඳු රසන්ත (107) යන පිතිකරුවෝ ශතක වාර්තා කිරීමට සමත් වූහ.
මෙවර තරගාවලියට සහභාගි වන කණ්ඩායම් පහේ සංයුතීන් මෙසේය:
කොළඹ කණ්ඩායම – චරිත් අසලංක (නායක), අවිශ්ක ප්‍රනාන්දු (උප නායක), කුසල් ජනිත්, නවෝද් පරණවිතාන, කුසල් මෙන්ඩිස්, කෙවින් පෙරේරා, ෂෙහාන් ප්‍රනාන්දු, සනෝජ් දර්ශිකා, කවීන් බණ්ඩාර, ධනංජය ලක්ෂාන්, ළහිරු මධුශංක, කසුන් රාජිත, අක්මාල් ෆස්ලි, නිපුන් රන්ශික, සම්පත් නිශ්ශංක, ප්‍රභාත් ජයසූරිය, නිශාන් පීරිස්, දුෂාන් හේමන්ත, මුදිත ලක්ෂාන්, මොවින් සුබසිංහ.
යාපනය කණ්ඩායම – ජනිත් ලියනගේ (නායක), අහන් වික්‍රමසිංහ (උප නායක), ෂෙවෝන් ඩැනියෙල්, රවිඳු රසන්ත, තනුක දාබරේ, ඇන්ජලෝ මැතිව්ස්, නිරෝෂන් දික්වැල්ල, ශාලිත් ප්‍රනාන්දු, සසිඳු මල්ෂාන්, සඳුන් වීරක්කොඩි, චාමික කරුණාරත්න, කවිශ්ක අංජුල, ඉසිත විජේසුන්දර, අසංක මනෝජ්, සිතුම් දිසානායක, ජෙෆ්රි වැන්ඩර්සේ, නිමේෂ් විමුක්ති, තරිඳු රත්නායක, මර්වින් අභිනාෂ්.
ගාල්ල කණ්ඩායම – පසිඳු සූරියබණ්ඩාර (නායක), රමේෂ් මෙන්ඩිස් (උප නායක), ඕෂද ප්‍රනාන්දු, නිපුන් ධනංජය, අවිශ්ක පෙරේරා, තුලින දිල්ෂාන්, දිනේෂ් චන්දිමාල්, සධීර සමරවික්‍රම, ක්‍රිෂාන් සංජුල, විනුර දුල්සර, දුනිත් වෙල්ලාලගේ, මිලාන් රත්නායක, ඩිල්ෂාන් මධුශංක, නිසල තාරකා, උදිත් මධුෂාන්, නිම්සර අතරගල්ල, දිලුම් සුධීර, විජයකාන්ත් වියස්කාන්ත්, ශෂික දුල්ෂාන්, ලක්ෂාන් සඳකැන්.
මහනුවර කණ්ඩායම – සහන් ආරච්චිගේ (නායක), නුවනිඳු ප්‍රනාන්දු (උප නායක), ළහිරු උදාර, පැතුම් නිශ්ශංක, ජනිෂ්ක පෙරේරා, කමිල් මිෂාර, සොහාන් ද ලිවේරා, අශේන් බණ්ඩාර, පවන්තා වීරසිංහ, කසුන් අබේරත්න, චමිඳු වික්‍රමසිංහ, රවිඳු ප්‍රනාන්දු, ළහිරු කුමාර, චාමික ගුණසේකර, ශිරාන් ප්‍රනාන්දු, මොහොමඩ් දිල්ෂාඩ්, ඒෂියන් ඩැනියෙල්, වනුජ සහන්, සහන් නානායක්කාර, විශ්ව ළහිරු.
දඹුල්ල කණ්ඩායම – ධනංජය ද සිල්වා (නායක), නිශාන් මධුෂ්ක (උප නායක), ලසිත් කෲස්පුල්ලේ, රොන් චන්ද්‍රගුප්ත, පවන් රත්නායක, විශාද් රන්දික, ප්‍රියමාල් පෙරේරා, සහන් කෝසල, සම්මු අශාන්, සොනාල් දිනූෂ, දසුන් ශානක, දිනුර කළුපහන, අසිත ප්‍රනාන්දු, විශ්ව ප්‍රනාන්දු, මොහොමඩ් ශිරාස්, චමිඳු විජේසිංහ, ලසිත් ඇඹුල්දෙණිය, අකිල ධනංජය, දුවිඳු තිලකරත්න, විහස් තෙව්මික.
lසිරිනාම රාජපක්ෂ
