– ග්‍රාම නිලධාරි – ප්‍රා/ලේ මඟින් පදිංචිය තහවුරු කිරීම ප්‍රමාණවත්.
– ජාතික නිවාස සංවර්ධන අධිකාරියෙන් ‘සැමට නිවහන’ නිවාස ණය වැඩසටහනක්.
– සියයට 12ක වාර්ෂික පොලියකට ලක්ෂ 15 දක්වා නිවාස ණය.
ඔප්පු නැති, එහෙත් පදිංචිය තහවුරු කළ හැකි ඉඩම් හිමි පුද්ගලයන්ට නිවාස ණය දීමට නාගරික සංවර්ධන හා නිවාස අමාත්‍යාංශය යටතේ ක්‍රියාත්මක ‘සැමට නිවහන’ 2025 නිවාස ණය වැඩසටහන මඟින් පහසුකම් සලසා ඇත.
ජාතික නිවාස සංවර්ධන අධිකාරිය මඟින් ක්‍රියාත්මක මේ ණය යෝජනා ක්‍රමය යටතේ ණය ඉල්ලුම්කරුට නීත්යානුකූල ඔප්පුවක් නැති නම් තමා දීර්ඝ කාලයක සිට අදාළ ස්ථානයේ පදිංචිව සිටින බව ග්‍රාම නිලධාරි විසින් සහතික කර, එය ප්‍රාදේශීය ලේකම් විසින් අනුමත කර තිබිය යුතුය. එමෙන්ම අදාළ ඉඩම රක්ෂිතයකට අයත් නොවන්නක් වීමද මෙහිලා වැදගත් වනු ඇත. එමෙන්ම ණයකරුට අවුරුදු 60 දක්වා ණය ඉල්ලුම් කළ හැකි අතර, වයස අවුරුදු 60 ඉක්මවන්නේ නම් හවුල් අයදුම්කරුවකු හා එක්ව ණය ඉල්ලුම් කළ හැකිය. සියයට 12ක වාර්ෂික පොලියක් මත රුපියල් ලක්ෂ 15 දක්වා නිවාස ණය මෙසේ ඉල්ලුම් කළ හැකි අතර, නව නිවෙසක් තනාගැනීමට මෙන්ම නිවෙසට කොටසක් එකතු කිරීමට හෝ නිවෙසේ ඉතිරි වැඩ කටයුතු සිදු කිරීමට හෝ ණය ඉල්ලුම් කළ හැකි අතර, ණය ආපසු ගෙවීම සඳහා වසර 10ක උපරිම කාලයක් හිමි වනු ඇත.
