අවස්ථා කිහිපයකදී විදුලි ගාස්තු සහ ඉන්ධන මිල ගණන් අඩු කිරීම හේතුවෙන් දැනට ඍණ මට්ටමක පවතින උද්ධමනය මේ වසර මැද වන විට ධන අගයක් ගනු ඇති බවත්, ඒ අනුව වසර අවසන් වන විට උද්ධමනය ඉලක්කගත මට්ටම් කරා ළඟා වනු ඇති බවත් ශ්‍රී ලංකා මහ බැංකුව පුරෝකථනය කරයි.
උද්ධමනය සහ ආර්ථික වර්ධන ඉදිරි දැක්ම කෙරෙහි බලපාන අවදානම් තත්ත්ව බොහෝ දුරට තුලිතව පැවතියද ගෝලීය වෙළෙඳ ක්‍රියාකාරකම් සහ භූ දේශපාලනික අවිනිශ්චිතතා ඇතුළු ගෝලීය ආර්ථික ප්‍රවණතා හේතුවෙන් ශ්‍රී ලංකා ආර්ථිකයට ඇති විය හැකි බලපෑම පිළිබඳ නිරන්තර අවධානයෙන් පසු වන බව මුදල් ප්‍රතිපත්ති මණ්ඩලය පවසයි.
එමෙන්ම වසර දෙකක් සංකෝචන වාර්තා කළ දේශීය ආර්ථිකය 2024 වසරේදී ශක්තිමත් ලෙස යථා තත්ත්වයට පත් වී ඇතැයිද ශ්‍රී ලංකා මහ බැංකුවේ නවතම වාර්ෂික ඇස්තමේන්තු පෙන්වා දෙයි. ආර්ථිකයේ මෑතකාලීන ප්‍රවණතා සහ ප්‍රධාන ආර්ථික දර්ශක මඟින් මේ වර්ධන ප්‍රවණතාව අඛණ්ඩව පවතිනු ඇතැයි අපේක්ෂා කෙරේ.
මහ බැංකුව විදේශ විනිමය ශුද්ධ පදනම මත මිල දී ගැනීම ඉහළ යෑම, අන්තර්ජාතික මූල්‍ය අරමුදලේ විස්තීර්ණ ණය පහසුකම් වැඩසටහනෙහි සිවුවැනි වාරිකය ලැබීම දළ නිල සංචිත ප්‍රමාණය ඉහළ නැංවීමට උපකාරි වී ඇති අතර, එමඟින් විදේශීය අංශයේ ඔරොත්තු දීමේ හැකියාව වැඩිදියුණු වී ඇති බවද ඉකුත් 26 වැනිදා ශ්‍රී ලංකා මහ බැංකුව නිකුත් කළ මුදල් ප්‍රතිපත්ති නිවේදනයේ සඳහන් වේ.
