ශ්‍රී මහ බෝධීන් වහන්සේ හා සිංහල බෞද්ධ උරුමය
කර්තෘ – සිරිසමන් විජේතුංග
ප්‍රකාශක – බෞද්ධ සංස්කෘතික
මධ්‍යස්ථානයේ ප්‍රකාශනයකි
බෞද්ධ ඉතිහාසය මෙන්ම පුරා විද්‍යාව ආදි විෂයයන් ආශ්‍රිතව බොහෝ පොතපත ලියා පළකර ඇති සිරිසමන් විජේතුංගයන් ලියූ නවතම කෘතිය ‘ශ්‍රී මහ බෝධීන් වහන්සේ හා සිංහල බෞද්ධ උරුමය‘ හැදින්විය හැකිය.
මාතෘකා ගණනාවක් ඔස්සේ ලියැවී ඇති මෙම කෘතියෙන් අපේ රටේ බෞද්ධ කැටයම් කලාව ගැන ද ලෝකයේ වෙනත් බෞද්ධ උරුමයන් ශිල්ප ක්‍රම ගැනද කතාබහට ලක්කර ඇත.
දොස්තර නොවුණු දොස්තර පුතා
කර්තෘ – අභය වේරගොඩ
ප්‍රකාශක – ප්‍රභානි ප්‍රකාශනයකි
“දොස්තර නොවුණු දොස්තර පුතා” කෘතිය හරහා අපට මෙරට එක්තරා කාලපරිච්ජේදයක් කියාපාන්නක් බඳුය. මෙරට අධ්‍යාපනය, ආර්ථික රටාව, ගොවිතැන මෙන්ම සමාජ තත්වයන් පිළිබද කියාපාන්නකි. අභය වේරගොඩ ලේඛකයා තම උපන් ගම වූ බද්දේගම ගම පාදක කරගනිමින් තම ජීවිත අත්දැකීම් ද එවකට රටේ පැවති ආර්ථිකය ද ආදී වූ තොරතුරුත් තම ජීවන අත්දැකීම් අපූරුවට එක්කොට ‘දොස්තර නොවුණු දොස්තර පුතා‘ කෘතිය ලියා ඇත.
මෙය කතුවරයා විසින් ලියන ලද පළමු පොත වේ.
කන්ද උඩ මාළිගාව
කර්තෘ – ජගත් ජේ. එදිරිසිංහ
ප්‍රකාශක – සරසවි ප්‍රකාශනයකි
මවුබිමින් දුරු රටක කලක් තිස්සේ වාසය කළ ද ජගත් ජේ. එදිරිසිංහ ලේඛනය වෙනුවෙන් වැඩි කාලයක් වෙන්කරන්නෙක් යැයි කීමේ වරදක් නැතැයි හැඟේ. තමන් ජීවිතයේ ලැබූ එතෙර මෙතෙර විවිධ අත්දැකීම් ඔස්සේ ඔහු කන්ද උඩ මාළිගාව කෙටිකතා එකතු ලියා ඇත. දෙවන මුද්‍රණය ලෙස මෙම කෘතිය නිකුත්ව ඇත.
කෙටිකතා දහයක් මෙම කෘතියට ඇතුළත් අතර මෙම කෙටිකතා සඳහා සිතුවම් නිර්මාණය කර ඇත්තේ ප්‍රවීණ චිත්‍ර ශිල්පී ජගත් හේවාපන්නයන්ය.
චොකොහොලින් හීන
කර්තෘ – තාරකා අතාවුදහෙට්ටි
ප්‍රකාශක – සුරස ප්‍රකාශනයකි
තාරකා අතාවුදහෙට්ටි මේ ලියන්නේ තමන්ගේම කතාවක් යැයි පාඨකයාට සිතෙන තරමට පොත රසවත්ය . ඉන්දියාවේ විශ්වවිද්‍යාලයක ඉගෙනුම ලබන ශ්‍රී ලාංකේය තරුණියක් විසින් මේ කතාව එනම් එහිදි තමන් ජීවිතය සොයා ගත් අපුරු කියයි.
මෙහි භාෂාව වෙනස්ය. සිංහල ඉංග්‍රීසි භාෂා කලවමේ ලියැවුණු පොතකි. නමුදු එක දිගට පාඨකයාට ‘චොකොහොලින් හීන‘ කියවා රසවිදින්නට හැකිය.
චොකොහොලින් හීන, තාරකා විසින් ලියන ලද පළමු කෘතියයි
කාමය හා සමාජය
කර්තෘ – ගාමිණි පී. විජේරත්න
ප්‍රකාශක – කර්තෘ ප්‍රකාශනයකි
මෙම කෘතිය වර්තමාන සමාජ විග්‍රහයක් ලෙස හඳුන්වා දීමට පුළුවන. විවිධ සමාජ තල පිළිබඳවත්, මේ සමාජයේ ජීවත් වන ගැහැනුන්, මිනිසුන් ක්‍රියා කරන ආකාරයත් ඔවුන්ගේ ජීවිත ගැන සමාජමය විග්‍රහයක් ලෙස කාමය හා සමාජය කෘතිය දැක්විය හැකිය. එමෙන්ම ප්‍රකට සමාජ විද්‍යාඥයින්ගේ සමාජ විග්‍රහකිරීම් මෙන්ම ලේඛකයා ද මේ සමාජ තල පිළිබඳ කළ විවේචන, පරීක්ෂණ නිර්ක්ෂණ ඇසුරින් මෙම කෘතිය ලියා ඇත.
පොපී සහ සැන්ඩි
කර්තෘ – රෝසි ප්‍රනාන්දු
ප්‍රකාශක – ගිහාන් ප්‍රකාශනයකි
දරුවන් වෙනුවෙන්ම ලියන ලද ළමා කතාවකි. පුංචි දරුවන්ට හොඳ පුරුදු හුරු කිරීම සඳහා ලියන ලද ළමා කතන්දර පොතක් ලෙස මෙය දැක්වීය හැකිය. දරුවන්ගේ නෙත පිනවන අපූරු චිත්‍ර රැසක් අඩංගු මෙම පොත කුඩා දරුවන් සඳහා සුදුසුය.
