අනෙක් පක්ෂ හෝදාපාළු වෙලා

මේ වන විට නැවතත් හාල් හිඟයක් ඇති විය හැකි බවට විවිධ උදවිය ප්‍රකාශ නිකුත් කරමින් තිබෙනවා. ඇත්තටම ඉදිරියේදී එවැනි හාල් හිඟයක් ඇති වේවිද?

අපේ රටේ වී අස්වැන්නෙන් පහෙන් තුනක් ලබා දෙන්නේ මහ කන්නයෙන්. යල කන්නයේ ලැබෙන්නේ පහෙන් දෙකයි. අපේක්ෂා කරපු වී අස්වැන්න මෙට්‍රික්ටොන් මිලියන 2.9 යි. කෘෂිකර්ම දෙපාර්තමේන්තුව කියන්නේ එය 2.6 දක්වා අඩු වුණා කියලයි. ඒ අනුව බැලුවත් මේ කන්නයේ වී නිෂ්පාදනය මාස 6කට අඩු නැතිව අපේ රටේ මිනිස්සුන්ට පරිභෝජනයට ප්‍රමාණවත්ව තිබෙනවා. ඒත් මේ මහ කන්නය තවම ඉවර නැහැ. අනුරාධපුර, පොලොන්නරුව දිස්ත්‍රික්කවල අප්‍රේල් දහය පහළොව වෙනකල් ගොයම් කැපෙනවා. මෙහෙම තියෙද්දී සහල් හිඟයක් එන්නේ කොහොමද? එවැනි තත්ත්වයක් තියෙද්දි වී හිඟයක් මවල; සහල් හිඟයක් මවන්න කිහිප දෙනකුගෙන් සැදුම්ලත් කණ්ඩායමක් උත්සාහ කරමින් සිටින බව අපට දැනෙනවා. නමුත් සහල්වල හිඟයක් නැහැ. උත්සව සමය තුළ වෙළෙඳපොළේ සහල් හිඟයක් ඇති වෙන්න කිසිදු ආකාරයකින් ඉඩ තියන්නේ නැහැ. ඒ වෙනුවෙන් ආණ්ඩුව විදිහට අපි මැදිහත් වෙනවා.

ඒත් සහල් මිල වැඩි කිරීමට වෙළෙන්දන් උත්සාහ කරන බවක් පේනවා…

මේ වන විට කැකුළු සහල් සහ නාඩු සහල්වල අඩුවක් නෑ. කීරි සම්බා සහ සම්බාවල අඩුවක් තියෙන බව කියනවා. නමුත් ඒවා බොහෝම පොඩි ප්‍රමාණයයි පරිභෝජනය කරන්නේ. නමුත් ඒ පරිභෝජනය කරන පොඩි ප්‍රමාණයට හිඟයක් මවලා කීරි සම්බා රුපියල් 300ට විකිණීමට සැලසුම් කර තිබෙනවා. සමහර සහල් හිඟ බව පවසමින් අතිරික්ත ලාභ ලැබීමට සමහර ව්‍යාපාරිකයන්, මෝල් හිමියන් කටයුතු කරමින් තිබෙනවා. ඒ අයට විරුද්ධව මේ වන විට කටයුතු කරමින් තිබෙනවා.

ඒ සඳහා ක්‍රියාමාර්ග ගැනීමට බලාපොරොත්තු වන්නේ කුමන ආකාරයටද?

මේ මෝල් හිමියන්ට රුපියල් බිලියන 25ක් පමණ මේ වන විට ණය ලබා දී තිබෙනවා. ඊට අමතරව ගොවියන්ට පොහොර සහනාධාරය දෙන්න වසරකට රුපියල් බිලියන 60ක් පමණ අපි වෙන් කරනවා. පොහොර සහනාධාර දෙන්න එක කන්නයකට රුපියල් බිලියන 20-25 වෙන් කරනවා. අපේ රටේ ගොවිජනතාව වෙනුවෙන් රුපියල් 120ට අපි වී මිල තීරණය කළා. එතනින් උඩට සම්බා, කීරි සම්බා විකුණන්න පුළුවන්. ගොවියගෙ වී ටික ඉවර වුණාට පස්සේ සහල්වල හිඟයක් ඇති වෙන්න හේතුවක් නැහැ. අපට එහෙම හිඟයක් ඇති වුණොත් පිට රටින් හාල් ගේන්න බැරි නැහැ. හැබැයි අපි ගොවියා රකින්න තීරණයක් අරන්; පාරිභෝගිකයට සාධාරණ මිලකට හාල් ටික දෙන්න කිවුවාම; එහෙම නොකරන අය වෙනුවෙන් ආණ්ඩුවට තීරණයක් ගන්න වෙනවා. අපි මෝල් හිමියන්ට කියන්නේ අමාරුවේ වැටෙන්නේ නැති වෙන්න කටයුතු කරන්න කියලයි. එහෙම නොකර ඉදිරියේදී අපිට කියන්න එපා; පිටරටින් හාල් ගෙනත් තියෙනවා. ඒ නිසා හාල් මිල අඩුයි; අපට මේ ගාණට විකුණ ගන්න බැහැ කියලා. කලිනුත් එහෙම කරන්න ගිහින් රුපියල් 220ට තිබුණු හාල් රුපියල් 200ට විකුණන්න සිද්ධ වුණා. ඒ නිසා ඒ තත්ත්වය ඇති කරගන්න එපා කියල අපි මෝල් හිමියන්ට කියනවා. පාරිභෝගිකයත් රැකිල; ගොවියත් රැකිලා විකුණ ගන්න තියෙන මිලට හාල්ටික දෙන්න බැරි නම්; පාරිභෝගිකයා පීඩාවට පත් කරන්න රුපියල් 280ට සම්බා, 300ට කීරි සම්බා විකුණන්න යනව නම් අනිවාර්යයෙන්ම රජය ඊට මැදිහත්වෙලා කටයුතු කරනවා. පාරිභෝගික සේවා අධිකාරිය හැටියට නීතිමය ක්‍රියාමාර්ග ගන්නත් මැදිහත් වෙනවා. වැටලීම් පවා සිදු කරනවා.

ඉදිරියේදී සහල් ආනයනය කරන්නෙ නෑ කියලා ඔබට සහතිකයක් දෙන්න පුළුවන්ද?

සහල් ආනයනය කරන්නේ නැහැ කියලා සහතිකයක් දෙන්න පුළුවන් වෙන්නේ ගොවියන්ගෙන් මිල දී ගත්ත වී ටික සහල් කරලා නියමිත මිල ගණන් යටතේ හිඟයකින් තොරව පාරිභෝගිකයන්ට දෙනව නම් පමණයි. එහෙම නැති වුණොත්; වෙළෙඳපොළ තුළ පාරිභො­්ගිකයන්ට අවශ්‍ය සහල් සුලබ කරන්න ආණ්ඩුවක් විදිහට කටයුතු කරන්න අපට සිදු වෙනවා. මෝල් හිමියෝ කොටල හාල්ටික වෙළෙඳපොළට දාන්නේ නැති නම්; පිටරටින් හරි හාල් ගෙනත් දෙන්න වෙනවා. අපිට පිටරටින් ගෙන්න අවශ්‍ය නැහැ. නමුත් හාල් හිඟයක් මවලා පාරිභෝගිකයන් පීඩාවට පත් කරන්න ලෑස්ති වුණොත්; ආණ්ඩුව ඒකට මැදිහත් වෙනවා.

මේ සහල් ප්‍රශ්නය විසඳන්න රජය විසින් වී මිල දී ගැනීම සිදු කළා. දැන් එහි තත්ත්වය කුමක්ද?

නාඩු අපේ රටේ සියයට 65ක් නිෂ්පාදනය වෙනවා; ගොවියෝ ගොයම් කපද්දි අමුවෙන් ගොයම් කපනවා. නමුත් අප සතුව ඩයර් එක නැහැ. ඒ අනුව වී අලෙවි මණ්ඩලය මිලදී ගැනීමේ මිල තීරණය කර තිබුණා. ඒ අනුව 120ට ආවොත් අපි මිලදී ගන්නවා. ඊට උඩින් කවුරු හරි රුපියල් හතරක් පහක් වැඩියෙන් දීලා මිලදී ගන්නවා නම් ඒක ගොවියට හොඳයි. ඒ රුපියල් හතර පහ වැඩි වුණා කියලා හාල් රුපියල් 10න් වැඩි වෙන්න බෑ. ගොවි ජනතාව අපටත් වී ගෙනත් දෙනවා. මේ වන විට වී අලෙවි මණ්ඩලය යම් ප්‍රමාණයකට වී මිල දී ගෙන තිබෙනවා. තව ඉස්සරහට වී මිල දී ගැනීම සිදු වෙනවා. මේ අවුරුද්දේ වී මෙට්‍රික්ටොන් ලක්‍ෂ දෙකක් ගන්න සැලසුම් කර තිබෙනවා. සතොසත් වී මිලදී ගැනීමේ ක්‍රියාවලිය ආරම්භ කර තිබෙනවා. සතොසටත් මේ වන විට වී යම් ප්‍රමාණයක් ලැබිලා තියෙනවා. මේ ආකාරයට යම් වී තොගයක් රැස් කරගැනීමයි අපේ සැලසුම. ඒ සැලැස්ම අනුව අපි හිතනවා බාධාවක් නැතිව අපට ඉදිරියට යන්න පුළුවන් කියලා.

ජනතාවට සහන මල්ලක් දීමට රජය කටයුතු කරන බව පවසා තිබුණා. මේ ආණ්ඩුවත් සහන මල්ල දෙන්නේ ළඟ එන ඡන්දය බලාගෙනද?

අපි නිකන් සහන මල්ලක් දෙන්නේ නැහැ. සහන මිලට ලොකු වට්ටමක් සහිතව බඩු මල්ලක් අපි දෙන්නේ. අපි සහන දුන්නා. අපි රුපියල් 6000 ගාණේ පාසල් ළමුන් ලක්ෂ 17කට පාසල් උපකරණ ගන්න මුදල් දුන්නා. ඒ වගේම ළමයි ලක්ෂ 12කට රුපියල් 3000ක් දුන්නා සපත්තු ගන්න. රුපියල් 2500ක් වැඩි කරලා ලක්ෂ 20කට අස්වැසුම දුන්නා. ගිය දෙසැම්බර්වල ලක්ෂ හතරකට අස්වැසුම දුන්නා. මාර්තු 31 වෙද්දී තවත් ලක්ෂ හතරකට අස්වැසුම දෙනවා. ඒ වගේම අස්වැසුම නොලැබිච්ච අටලක්ෂ දොළොස්දාහක් ඇප්ලිකේෂන් දාල තියෙනවා. මේ ඇපිලිකේෂන් දාල තියෙන අස්වැසුම නොලැබිච්ච 81,2000ට යම් සහනයක් දෙන්න ඕන කියල ආණ්ඩුව තීරණයක් අරන් තියෙනවා. ඒ අනුව සතොස සහ සමුපාකාර ව්‍යාපාරය හරහා රුපියල් 5000ක් වටිනා බඩු මල්ලක් රුපියල් 2500කට අප්‍රේල් මාසේ පළමුවෙනිදා සිට 13 වැනිදා දක්වා ලබා දෙන්න අපි කටයුතු කරනවා. ඒ බඩු මල්ල කිලෝ 15කට වඩා වැඩි බඩු මල්ලක්.ඒ තුළ හාල්, ලූනු, සීනි, පිටි සෝයාමීට් ආදී අත්‍යවශ්‍ය භාණ්ඩ වගේ; ලෝකේ තිබෙන සෞඛ්‍යාරක්ෂිත හොඳම ඔයිල් එක; සහල් තෙල් මිලිලීටර් 500ක් ලබා දෙන්න අපි කටයුතු කරනවා. අපි ඡන්දය බලාගෙන නිකන් දෙන සහන මල්ලක් නෙමෙයි මේ. අස්වැසුම නොලැබිච්ච අයට සහනයක් දෙන්න ඕනැ නිසා දෙන වට්ටම් බඩු මල්ලක්. තෝරා ගැනීමේ ක්‍රියාවලිය අවසන් වෙනකම් රුපියල් 5000ක බඩු මල්ලක් රුපියල් 2500ට දෙනවා. එය මැතිවරණ නීති උල්ලංඝනය කිරීමේ කටයුත්තක් නෙමෙයි.

පොලිස්පතිවරයා සම්බන්ධයෙන් ගත් ක්‍රියාමාර්ගය සම්බන්ධයෙන් ඉදිරියේදී මොන වගේ තත්ත්වයක් ඇති වේවිද?

අපි හැංගුණු පොලිස්පතිට විරුද්ධව පාර්ලිමේන්තුවේ විශ්වාසභංගයක් ගෙනැවිත් තිබෙනවා. ඔහු ඉවත් කර නව පොලිස්පතිවරයෙක් පත් කරන්න ඕනැ. ඉදිරියේදී කරන්න තියෙන්නේ එයයි. ඒ කටයුත්ත සඳහා අවශ්‍ය ක්‍රියාවලිය ඉදිරියට යමින් තිබෙනවා. පොලිස්පතිවරයෙක් පත් කළාට ඉවත් කරන්න බැහැ. හිටපු පොලිස්පති දේශබන්දුට ධුරයේ කටයුතු කිරීම නවතා තිබෙනවා. ඔහු පොලිස්පතිවරයාව හිඳිමින් තමයි හැංගි හැංගි හිටියේ. ඒ අනුව අප ඔහුට විරුද්ධව නීත්‍යනුකූලව ගත හැකි ක්‍රියාමාර්ග මේ වන විට ගනිමින් තිබෙනවා.

පොලිස්පතිවරයාගේ සිද්ධිය උඩට ආපු නිසා බටලන්ද සිද්ධිය යට යමින් තිබෙන බව චෝදනා නැඟෙනවා…

ඉතිහාසයේ යට ගැසූ කිසිම දෙයක් වර්තමාන රජය යටතේ යට යන්න දෙන්නේ නැහැ. බටලන්ද කියන්නෙත් ඒ විදිහට යට ගහපු ඉතිහාසයක්. ඒ ඉතිහාසය වර්තමානය තුළ රනිල්ලාට යට යවන්න දෙන්නේ නැහැ. ඒ ඉතිහාසය වගේම මේ වර්තමානයත් අනාගතයේ දවසක අපේ රටේ ජනතාව කත බහ කරන්න ගනිවි. ඒ කැප වීම කරපු පරිත්‍යාග කරපු ජීවිත අහිමි වෙච්ච මිනිස්සුන්ට සාධාරණය ඉෂ්ට කරන්න ඕන මැදිහත් වීම කරන්න අපේ ආණ්ඩුව කටයුතු කරනවා.

රනිල් වික්‍රමසිංහ ප්‍රමුඛ ඇතැම් විපක්ෂයේ අය කියන්නේ බටලන්ද නිර්මාණය වුණේ ජනතා විමුක්ති පෙරමුණේ ක්‍රියාකලාපය නිසා කියල චෝදනා නැඟෙනවා.

ඒ අයට දැන් ඊට වඩා දෙයක් කියන්න ඉතුරු වෙලා නැහැ. ඒ අය පාලනය කළ ආණ්ඩු විසින් වැරදිකරුවන්ට නීත්‍යනුකූලව අධිකරණයේ නඩු පවරලා වැරදිකරුවන් කරල මරණ දඬුවම දීපු ඒවා නෙමෙයි මේ. රාජ්‍ය බලය අයථා ලෙස පාවිච්චි කරලා වධකාගාර පවත්වාගෙන යමින් කරපු සපරාධී මනුෂ්‍ය ඝාතන මේ. ඒකට නීතිය ඉෂ්ට වුණේ නැහැ. බටලන්ද කොමිෂන් වාර්තාවක් තියෙනවා. අවසානයේ කියන්නේ මොකක්ද? මෙවැනි ම්ලේච්ඡ තත්ත්වයක් නැවත මේ භූමියේ ඇති නොවිය යුතුයි කියලා. ඒනිසා එවැනි තත්ත්වයක් ඇති කළ අයට දඬුවම් දිය යුතුමයි.

ඔබලාගේ ප්‍රසාදය අඩු වෙන කාලේ මේ බටලන්ද වාර්තාව ඉදිරියට ගෙනත් තිබෙන බවට විපක්ෂය විසින් චෝදනා නඟනවා…

දැන් අපේ ආණ්ඩුවේ ප්‍රසාදය අඩු වෙනවා නම් අඩු වෙන්නේ මොකක් නිසාද? රජයේ සේවකයන්ගේ පඩි වැඩි කරපු නිසාද? රාජ්‍ය සේවයට 31,000ක් බඳවාගන්න නිසාද? රටේ ප්‍රාග්ධන වියදම් බිලියන 1,400ක් රටේ සංවර්ධන කටයුතුවලට වෙන් කරලා තියෙන නිසාද? පොහොර සහනාධාරය 10,000 හ 25,000 කරපු නිසාද? යල කන්නෙත් පොහොර සහනාධාරය දෙන නිසාද? පාසල් දරුවන් ලක්ෂ 17කට අත්‍යවශ්‍ය පාසල් උපකරණ ගන්න රුපියල් 6,000ක් දෙන නිසාද? අස්වැසුම රුපියල් 2,500න් වැඩි කළ නිසාද? නෑ. ඒ නිසා මේ ආණ්ඩුව ජනප්‍රිය වෙලා තියෙනවා මිසක් මේ ආණ්ඩුවේ ප්‍රසාදය පහළ ගිහින් නැහැ. පහුගිය දවස්වල තිබුණු ගුරු සමුපකාර ඡන්දයෙන් 384න් 370ක් මාලිමාව ජයග්‍රහණය කළා. ආණ්ඩුවේ ප්‍රසාදය අඩු වෙලා නම් එහෙම වෙයිද? අපේ ජනප්‍රියත්වය එහෙම්මම තියෙනවා අනික් අය හෝදාපාළු වෙලා තියෙන්නේ. ඒනිසා ළඟ එන පළාත් පාලන ඡන්දයත් ආණ්ඩුව ඉහළින්ම ජයග්‍රහණය කරනවා.