අලුත් අවුරුදු නිවාඩුව වෙනුවෙන් අප්‍රේල් මස 11 වැනිදා සිට විශේෂ දුම්රිය සේවා ආරම්භ කිරීමට කටයුතු කර ඇතැයි දුම්රිය නියෝජ්‍ය සාමාන්‍යාධිකාරි (ගමනාගමන) එන්.ජේ. ඉඳිපොලගේ සිළුමිණට කීය. ඔහු පැවසුවේ අප්‍රේල් මස 11, 12, 19, 20 දිනවල කොළඹ කොටුවෙන් රාත්‍රී 7.30ට බදුල්ල බලා විශේෂ දුම්රියයන් ධාවනය වන බවත්, ඒ දිනවල පස්වරු 5.50ට බදුල්ලේ සිට කොළඹ බලාද දුම්රියයන් ධාවනය කරන බවත්ය. එමෙන්ම මරදානේ සිට ගාල්ල දක්වා විශේෂ දුම්රිය 12 හා 13 දෙදින පස්වරු 1.30ට ධාවනයට යොදා ඇති බවද 11 හා 12 දෙදින රාත්‍රී 7.20ට විශේෂ දුම්රියන් ගාල්ල බලා ධාවනයට යොදවනු ලබන බවද ඔහු පෙන්වා දුන්නේය. මරදානේ සිට බෙලිඅත්ත දක්වා දුම්රිය 12, 13, 18, 19 හා 20 දිනවල පස්වරු 4.40ට ධාවනයට යොදා ඇත. 12, 13, 18, 19, 20 දිනවල පෙරවරු 8.25ට බෙලිඅත්ත සිට මරදානට දුම්රියයන් ධාවනයට යොදා තිබේ.
එසේම 12, 13 දෙදින ගාල්ලේ සිට අනුරාධපුරය දක්වා විශේෂ දුම්රියන් (කොළඹ කොටුවෙන් පෙරවරු 6.35ට) ධාවනයට යොදා ඇත. අනුරාධපුරයෙන් පස්වරු 3.00ට ගාල්ල බලා දුම්රියයන් ධාවනයට යොදා ඇත. 11 සහ 18 දෙදින කොළඹ කොටුව හා කන්කසන්තුරය අතර නගරාන්තර ශීඝ්‍රගාමී දුම්රියයන් 2ක් ධාවනය කෙරේ.
