45
අලුත් අවුරුද්ද වෙනුවෙන් රෙදිපිළි සහ භාණ්ඩ මිල දී ගැනීම සඳහා නගරවලට පැමිණෙන ජනතාවගේ ආරක්ෂාව වෙනුවෙන් පොලිස් නිලධරයන් 35,000ක් පමණ රාජකාරිවල යොදවා ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග සිළුමිණට පැවසීය.
බස්නාහිර පළාතේ නගරවල පමණක් අමතර පොලිස් නිලධාරීන් 6,000ක් පමණ ආරක්ෂක රාජකාරිවල යොදවා ඇති බවද ජ්‍යෙෂ්ඨ පොලිස් අධිකාරිවරයා සඳහන් කළේය.
මීට අමතරව රථවාහන අනතුරු වැළැක්වීම සඳහා පොලිස් රථවාහන අංශ නිලධාරීන්ද අමතරව යොදවා තිබේ. අලුත් අවුරුද්දට භාණ්ඩ මිල දී ගැනීම සඳහා ජනතාව ගම් දනවුවල සිට නගරවලට පැමිණෙන අවස්ථාවේදී සොර සතුරන්ගෙන් නිවාස ආරක්ෂා කිරීමටද පොලීසිය වැඩපිළිවෙළක් සකස් කර ඇති අතර පොලිස් ස්ථාන මඟින් දිනපතා සිදු කරන ජංගම මුර සංචාර මේ දිනවල වැඩි කර ඇති බවද ජ්‍යෙෂ්ඨ පොලිස් අධිකාරිවරයා අවධාරණය කළේය.
