– ඔබේ ලග්නයට සුබ දවස දැනගෙන කටයුතු ආරම්භ කරන්න
– ලග්නයට හිමි සුබ වර්ණයෙන් ඔබට ජය සතුට සහ සැපත
2024 නව වසරේ සුබ බලාපොරොත්තු රැසක් සමඟ දහසක් පැතුම් පතන ඔබට ජීවිතය ජය ගැනීම අසීරු නැත. ඒ සඳහා ඔබ උපන් ලග්නයට අදාළ සුබ කාරණා දැනගෙන කටයුතු කළ යුතුය. ඔබේ ලග්නයට සුබ දවස, ජය අංක, සුබ වර්ණය, සුබ දිශාව සහ ඔබට අපල ආදිය ඇත්නම් පැලඳිය යුතු මැණික්, යන්ත්‍ර, පිහිට පැතිය යුතු දෙවියන් සහ මල් වර්ග ආදිය දැනගැනීමෙන් ලබන්නා වූ 2024 වර්ෂය ඔබගේ ජීවිතය ජය ගැනීමට හැකි වනු ඇත.
මැණික් සහ යන්ත්‍ර
ඔබ කොතරම් උත්සාහ කළද ඔබ කරන කියන කටයුතු සාර්ථක වන්නේ නැද්ද? දියුණුව අඩාළ වී බලාපොරොත්තු ඉටු නොවේද? එසේ නම් ඔබට ග්‍රහ අපලයක් තිබිය යුතුය. ඔබට ග්‍රහ අපල ඇති කරන්නේ රවි, චන්ද්‍ර, කුජ, බුධ, ගුරු, ශුක්‍ර, ශනි, රාහු, කේතු යන නවග්‍රහයන්ගෙනි. කුමන ග්‍රහයකුගේ අපලයක් ඔබට උදා වී ඇත්දැයි කේන්දරය පරීක්ෂා කරවා දැනගන්න. ඔබට අපල ගෙන දෙන ග්‍රහයාට නියමිත මැණිකක් අල්ලන ලද රන් මුදුවක් ඔබගේ දකුණු අතේ මැද ඇඟිල්ලේ පලඳින්න. එසේ නැත්නම් අපලය කරවන ග්‍රහයාට නියමිත යන්ත්‍රයක් සාදවා පලඳින්න. මෙමඟින් ඔබේ සියලු අපල දුරු කරගන්න. එවිට ඔබගේ කටයුතු මෙම වර්ෂයේ සාර්ථක වනු නොඅනුමානය.
සුබ දවස් හා ජය අංක
ඔබගේ ලග්නයට අනුව ඔබට සුබ දවස් ඇත. සතියේ සුබ දවස් දැනගෙන සුබ කටයුතු ආරම්භ කිරීමෙන්, ගමන් බිමන් යාමෙන්, කරන-කියන කටයුතුවලින් ඔබට සාර්ථක ප්‍රතිඵල සහ නොසිතූ අයුරින් ලාභ ප්‍රයෝජන ලැබිය හැකිය. ඔබේ ලග්නයට හිමි ජය අංක ද ඇත. මෙම ජය අංක හෝ ජය අංක දෙකක් තුනක් ඇති ලොතරැයිපත් මිල දී ගැනීම, නිවාස මිල දී ගැනීම හෝ කුලියට ගැනීම ආදි කටයුතුවලින් ඔබට යහපත් ප්‍රතිඵල උදාකර ගත හැකිය.
පිහිට පැතිය යුතු දෙවියන් සහ මල් වර්ග
ජ්‍යොතිෂයට අනුව ඒ ඒ රාශි, නැකැත්, තිථි, හෝරා, ග්‍රහයන් පිහිටීම අනුව නොයෙක් ලෙඩ දුක් කරදර ඇති විය හැකිය. ඒවායින් වැළකීමට පිහිට පැතිය යුතු දෙවියන් සහ ග්‍රහ අපලය සඳහා පූජා කළ යුතු මල් පිළිබඳ දැන සිටීමෙන් සහ එම මල් යොදා ගෙන පුද පූජා ඉටු කිරීමෙන් අපල-සපල කරගෙන යහපත උදාකර ගත හැකිය.
සුබ වර්ණ හා සුබ දිශාව
ඔබේ ලග්නයට හිමි සුබ වර්ණය ඔබට ජය සතුට සහ සැපත ගෙන එනු ඇත. ඔබේ ජය වර්ණය හැකි සෑම අවස්ථාවකදීම භාවිත කිරීම ශුභය. ගෙදරදොර ජනෙල් රෙදි ඔබේ සුබ වර්ණයෙන් දැමීමෙන්ද නිදන කාමරයේ ඇඳ ඇතිරිලි, කොට්ට උර ආදියට සුබ වර්ණ යොදා ගැනීමෙන්ද දියුණුව ඔබ කරා එනු ඇත. විශේෂයෙන් සුබ ගමනක් යන විට ඔබ සුබ වර්ණයෙන් යුතු ඇඳුමක් ඇඳීමෙන් ඔබ යන ගමන සර්වප්‍රකාරයෙන්ම සාර්ථක වේ. තනිකරම එම පාටින් ඇඳුමක් ඇඳීමට නොහැකි නම් එම පාට මිශ්‍ර ඇඳුමක් හෝ ඇඳගෙන යාම සුබ වේ. එසේම ඔබ සුබ ගමනක් යන විට මෙන්ම කිසියම් වැදගත් කාර්යයක් සඳහා යොමු වීමේදී බැලිය යුතු සුබ දිශාවක්ද ලග්නයට අනුව පවතී. එම දිශාව බලා ගමන ආරම්භ කිරීම හෝ ඔබ කළ යුතු කාර්යය ඉටු කිරීමෙන් ජය ලැබේ.
ප්‍රවීණ ජ්‍යොතිෂවේදී උපුල් ජයශ්‍රී ද සිල්වා
