– මගේ ගාස්තුව සාධාරණ එකක් ඒ නිසා අඩු ගණන්වලට මම රඟපාන්න යන්නෙ නැහැ
– එයාල මාත් එක්ක තරහක් නැහැ අපි සතුටින් ජීවත් වෙනවා
මේධා ජයරත්න කාලයක් විවිධ චරිත එක්ක පුංචි තිරයේ ගනුදෙනු කළ චරිතයක් වුණත් ඇයව දැන් දකින්න ලැබෙන්නේ අඩුවෙන්. ඒත් සමාජ මාධ්‍ය වැඩිපුර භාවිත කරන නිසා ඇයට ආදරය කරන පිරිසට ඇයව අමතක වෙන්නේ නැහැ. මෙවර රසඳුන කතාබහකට එක්කරගත්තේ ඇයවයි.
මේධාව ඉස්සර තරම් දැන් වැඩිය දකින්න ලැබෙන්නේ නැහැ නේද ..?
දෙවැනි ඉනිම දෙක ටෙලි නාට්‍යයට සම්බන්ධ වුණා. මම ඒ නාට්‍යයේ ගීතානි කියලා නපුරු චරිතයක් රඟපාන්නේ. මේ දවස්වල ඒ නාට්‍යයේ වැඩ විතරයි කරන්නේ.
ඒකට හේතුව ආරාධනා නොලැබීම ද, එහෙම නැත්තම් ඔබේ වටිනාකමට සරිලන මුදලක් නොලැබීම ද..?
මට ටෙලි නාට්‍ය බොහෝමයකට ආරාධනා කළා. චරිත ගැන කතා කළාම ඒ චරිත තුළ මට යමක් කරන්න පුළුවන් නිසා කැමැති වූ නිර්මාණත් තිබුණා. කැමැති වුණාට පස්සේ ගාස්තු කතා කරද්දී මගේ ගණන් මම කියනවා. ඒත් එක්ක ඒ නිර්මාණකරුවන් ඊට පස්සේ කතා කරන්නේ නැහැ. මොකද මගේ ගාස්තුව සාධාරණ එකක්. ඒක එයාට ගෙවන්න බැරිව වෙන්න ඇති ආයේ කතා නොකරන්නේ. එහෙම කියලා අඩු ගණන්වලට මම රඟපාන්න යන්නෙ නැහැ. ඔය ගැටලු තමයි දැන් තියෙන්නේ
මේධා ජයරත්න කියන්නේ කලාත්මක නිර්මාණ බොහෝමයකට සම්බන්ධ වුණු කෙනෙක්. දැන් අඩුවෙන් වැඩ කරන්න ලැබෙන එකට දුකක් නැද්ද ..? 
එහෙම ප්‍රශ්නයක් නැහැ. මම හොඳ චරිත කරලා තියෙනවා. ඒ නිසා දුකක් නැහැ. මට රඟපාන්න ලැබෙන්නෙත් එකිනෙකට වෙනස් චරිත, හොඳ චරිත., ඒත් මොන හේතුවක් නිසා ඒවා වෙන්නෙ නැද්ද කියන්න මම දන්නෙ නැහැ.
ඔබේ කලින් සැමියා සුරංග ලක්මාල් සෙනෙවිරත්න දක්ෂ අධ්‍යක්ෂවරයෙක්. කලාකාරිනියක් හැටියට ඔහුගේ නිර්මාණවලට සම්බන්ධ වෙන්න ආරාධනා ලැබුණොත් සම්බන්ධ වෙනවද..?
සුරංග හොඳ නිර්මාණ කරන අධ්‍යක්ෂවරයෙක්. මේ දවස්වල ඔහුගේ අනිච්චාවත සංඛාරා විකාශය වෙනවා. නමුත් ඔහුගෙන් වෙන්වුණාට පස්සේ එකට වැඩ කරන්න ආරාධනා කළේ නැහැ. ආරාධනා කරයි ද දන්නෙත් නැහැ. ආරාධනා කළොත් මට නම් කිසි ප්‍රශ්නයක් නැහැ. ඔහුගේ නිර්මාණවලට සම්බන්ධ වෙන්න පුළුවන්. එහෙම මට අපහසුතාවයක් නැහැ. දරුවන්ගේ වැඩවලට වුණත් කතා කරන්න අපිට සිදු වෙනවා. එහෙම දෙන්නා අතර තරහකුත් නැහැ. මට නම් ප්‍රශ්නයක් නැහැ
සතුටින් හිටපු පවුල විසිරිලා ගිය එක ගැන දරුවෝ ඔබත් එක්ක අමනාපයක් නැද්ද ..?
දරුවෝ දෙන්නම එයාගේ අප්පච්චිට වගේම මටත් කිට්ටුයි. පුතා විදෙස්ගත වෙලා ඉන්නේ, නිවාඩුවකට ලංකාවට ආවා. ඇවිත් මාත් එක්කත් කාලය ගත කරලා ගියා. දුව සති අන්තයේ ඉන්නෙ මාත් එක්ක. නිවාඩුවක් ලැබුණම එයා මම ළඟටත් එනවා. දරුවෝ තේරුම් තියෙන වයසේ ඉන්නේ. එයාල මාත් එක්ක තරහක් නැහැ . අපි සතුටින් ජීවත් වෙනවා. නිතරම කතාබහ කරනවා.
ජනප්‍රිය කාන්තාවක් දික්කසාද වෙද්දී ඒ චරිතය සමාජය විසින් හංවඩු ගහන්න බලන්නෙ ..?
මට නම් සමාජය කියන කතා කිසිම වැඩක් නැහැ. මොකද විවිධ සමාජ මට්ටම්, අධ්‍යාපන මට්ටම්වල පිරිස් ඉන්නේ. සමාජ මාධ්‍ය ඔස්සේ තමයි ඔය මඩ තියෙන්නේ. අපිට කාවවත් සතුටු කරන්න අවශ්‍ය නැහැ එකඑක්කෙනා තමන්ගේ මැට්ටම් තම්මැට්ටම් කියලා හිතාගෙන හිටපු දෙන්. එකට ඉන්න බැරි නම් වෙන් වෙලා ජීවත් වෙන එක හොඳයි. සතුටින් කියලා පේන්නන මම දන්න අයගෙන් සියයට අනූවක්ම විඳවන අය ඉන්නේ, ඉතිං ඇයි විඳවන්නේ, එකට ඉන්න බැරි වුණා, දික්කසාද වුණා . කවුරු මොනවා කිව්වත් මම ජීවිතේ විඳිනවා.
පවුල කියන සංස්කෘතිය බිඳගෙන ගිය එක ගැන අද දුකක් නැද්ද ..?
මම දුකට, අපහසුතාවට පත් වෙන්න ඕන මට නරකක් වුණොත් තමයි. මගේ ජීවිතේට නරකක් වෙලා නැහැ. ඒ නිසා මට දුකක් නැහැ.
වගකීම්වලින් ඉවත් වුණු අම්මා කෙනෙක් ද.?
කොහෙත්ම නැහැ. පුතාව විදේශීය රටක ඉගෙන ගන්න මූලිකත්වය ගත්තේ මම. වියදම් දැරුවේ මම. දැන් පුතාගේ සියලු වියදම් කරන්නේ එයාගේ අප්පච්චි. මම දුව ගැනත් බලනවා. මම වගකීම්වලින් ඈත් වෙලා නැහැ , එයාලගේ අප්පච්චිට තනියම දේවල් කරන්න බැහැ. අපි දෙන්නා දරුවන් වෙනුවෙන් ඉන්නවා
