කොළඹ කොටුව සහ බදුල්ල අතර දුම්රිය සේවය ආරම්භ කර වසර 100ක් සපිරීම නිමිත්තෙන් උඩරට මාර්ගයේ ධාවනයට නව සංචාරක සුඛෝපභෝගී දුම්රිය සේවා හතරක් ලබන මස සිට යොදවන බව ප්‍රවාහන මහාමාර්ග හා ජනමාධ්‍ය ඇමැති ආචාර්ය බන්දුල ගුණවර්ධන සිළුමිණට පැවසුවේය.
ඒ අනුව දුම්රිය ගමනේ සියවස යෙදෙන අප්‍රේල් 5 වෙනිදා කොළඹ කොටුව සහ බදුල්ල අතර ‘දුන්හිඳ ඔඩිසි‘ නව දුම්රියයන් දෙක කොළඹ කොටුව සිට බදුල්ල සහ බදුල්ල සිට කොළඹ කොටුව දක්වා ධාවනයට එක් කරන අතර අප්‍රේල් මාසයේම සුවිශේෂී නැරඹුම් මැදිරි සහිත ‘කැලිප්සෝ‘ දුම්රිය මහනුවර සිට බදුල්ල දක්වාත් බදුල්ල සිට මහනුවර දක්වාත් ධාවනයට එක් කරනු ඇත. මීට පෙර මෙරට
මගී ජනතාවට හා සංචාරකයන්ට ගමන් කළ නොහැකි වූ සුවිශේෂී නැරඹුම් මැදිරිවලින්ම සමන්විත කැලිප්සෝ දුම්රියේ සියලු මඟීන්ට හැරවුම් උඩරට දර්ශන පැහැදිලිව බලාගත හැකි ලෙසින් ආසන දුම්රිය ජනේල දෙසට මුහුණ ලා සකස් කර ඇත. පැරැණි දුම්රිය මැදිරි යොදාගෙන රත්මලාන දුම්රිය කර්මාන්තශාලාවේ නිෂ්පාදනය කර ඇති නව නැරැඹුම් මැදිරි සඳහා සංචාරකයන්ගේ විශාල ඉල්ලුමක් පවතිනු ඇතැයි දැනගන්නට ඇත.
එමෙන්ම මඟීන්ට විවෘත ලෙසින් පරිසරය නැරැඹීමට හැකි වන පරිදි විශේෂිත මැදිරි මේ වන විට රත්මලාන කර්මාන්තශාලාවේ නිෂ්පාදනය කෙරෙමින් පවතී.
තාරක වික්‍රමසේකර