– ගායනයේ මුල් අයිතිකරුවන්ට හානියක් කරන්නේ නැති නිසා වෙන්න ඇති තවම කවුරුත් මට චෝදනා නොකරන්නේ
– හදවතට දැනෙන හින්දි ගීතවල තනුව රිද්මය අනුව ඉංග්‍රීසි බසින් ලියූ ගීත තමයි මම ගයන්නේ
විවේක් අග්‍රවාල් මේ නම නුහුරු වුවත් මේ රූපය නොදන්නවා වුවත් ඔහුගේ කටහඬ සමාජ මාධ්‍ය භාවිත කරන අයට හුරු ඇති. ඔහු ඉන්දියානුවෙක්, ජීවත් වෙන්නේ ඇමරිකාවේ. ඔහු දක්ෂ තාක්ෂණවේදියෙක්. ඒ වගේම දක්ෂ සංගීතඥයෙක්. දකුණු ආසියාවේ ජනප්‍රිය ගීත ඉංග්‍රීසි බසින් ගායනා කරන නිසා ඔහු ඉන්ස්ටර්ග්‍රෑම් හා ටික්ටොක් තුළ ජනප්‍රිය චරිතයක් බවට පත් වෙලා. යොහානිගේ මැණිකේ මගේ හිතේ ගීතය ඉංග්‍රීසි බසින් ගායනා කර ලංකාවේ ඇතැමුන්ගේ හිත් ගත් ඔහු රසඳුන එක්ක මේ විදිහට කතා කළා.
ඔබ සමාජ මාධ්‍ය ඔස්සේ ඇතැමුන් දන්න ගායකයෙක් , නමුත් ඔබ ගැන නොදන්න අයට මුලින්ම ඔබ ගැන කියමු..?
මම විවේක්, Chicago, Illinois සිටින සංගීතඥයෙක් සහ තාක්ෂණවේදියෙක්. මම හැදී වැඩුණේ එක්සත් ජනපදයේ. නමුත් මම නිතරම ඉන්දියානු සංගීතයේ තනු සහ රිද්මයට ආදරය කළා. මම ඉගෙන ගත්තේ ස්ටැන්ෆර්ඩ්( Stanford) විශ්වවිද්‍යාලයෙන් . මට තාක්‍ෂණික ක්ෂේත්‍රයේ දීර්ඝ අත්දැකීමක් තියෙනව. ඒ වගේම මම Bose Frames ශ්‍රව්‍ය අව් කණ්ණාඩි නිර්මාණය කිරීමට සහාය වූ කෙනෙක්. ඔය අතරතුර සංගීතයට බෙහෙවින් ආදරය කළ නිසා මම 2020 සිට පූර්ණ කාලීව සංගීතය හැදෑරීමට හා ඊට සම්බන්ධ වීමට තීරණය කළා. ඔස්කාර් සම්මානලාභී සංගීතඥ A. R.Rahman එක්ක ගනුදෙනු කරන්න තරම් මම වාසනාවන්ත වුණා. මම ඔහු එක්ක වැඩ කරනවා. 2024 වසරේ මුලදී මම දකුණු ආසියාවේ ගීත ඉංග්‍රීසියෙන් රිමෙක් කර Instagram සහ TikTok හී මුදා හැරියා. එතැන් පටන් තමයි මගේ හඬට ආදරේ කරන පිරිසක් මා වටා ගොඩනැගුණේ. 
ලෝකය පුරා බොහෝ දෙනෙක් ආදරේ කළ ලංකාවේ ගීතයක් වන මැණිකේ මගේ හිතේ ගීතයේ තනුවටත් ඔබ ඉංග්‍රීසි ගීතයක් ගැයුවා. ඇයි ඒ ගීතය තෝරා ගත්තේ..?
මගේ හිත නිතරම ගීතයේ තනුවට හා රිද්මයට ඇදී යනවා. ‘මැණිකේ මගේ හිතේ‘ ගීතයේ මුල් ගීතය සතීෂාන් සහ දූලන්ගේ කටහඬින් මම ඇසුවා. ඊට පස්සේ යොහානිගේ කටහඬින් ‘මැණිකේ මගේ හිතේ‘ නිල කවරය මට අහන්න ලැබුණා. ඇයගේ හඬේ අමුතු ලස්සනක් මට ඇසුණේ. ඇගේ ගායනයෙන් ගීතයට එකතු කර තිබුණ වර්ණ වෙනස්. මුළු ගීතයට මම බැඳුණා. ඒ කැමැත්ත නිසාම ‘මැණිකේ මගේ හිතේ‘ ගීතය ඉංග්‍රීසි භාෂාවට ප්‍රතිනිර්මාණය කරන්න හිතුවා. ඒ ගීතය ගායනා කරලා මම විශාල ආස්වාදයක් ලැබුවා.
එහි අයිතිකරු ඔබට කතා කර ප්‍රතිචාර දැක්වුවාද..?
ඔව්. යොහානි මට කමෙන්ට් කරලා ප්‍රතිචාර දැක්වුවා. ඇය කිව්වේ මගේ හඬින් ගැයූ ඉංග්‍රීසි ගීතය ඇය කැමැත්තෙන් රස වින්දා කියලයි. ඒ වගේම ඉංග්‍රීසි ගීතයට කැමති බව කිව්වා. ඒ ප්‍රතිචාරය මාව සතුටට පත් කළා. ඇයට වගේම මගේ ගීතය රස විදින ලාංකිකයින් හැමෝටම මම ස්තූතියි කියලා කියනවා.
ඔබ ගයන ගීතවල මුල් අයිතිකරුවන්ගෙන් චෝදනා එල්ල වෙලා නැද්ද?
මගේ චේතනාව වෙනස්. හදවතට දැනෙන හින්දි ගීතවල තනුව රිද්මය අනුව ඉංග්‍රීසි බසින් ලියූ ගීත තමයි මම ගායනා කරන්නේ. ඒ තුළින් මම ටච් කරන්නේ වෙනම ඕඩියන්ස් එකක්. ඒ නිසා ගීතවලට හෝ ඒ ගායනයේ මුල් අයිතිකරුවන්ට හානියක් කරන්නේ නැහැ. ඒ නිසා වෙන්න ඇති තවම කවුරුත් මට චෝදනා කරේ නැත්තේ.
ඔබ ගායනා කරන බොහෝමයක් ගීත වෙනත් ගායකයින්ගේ ගීතවල තනුවලට ඉංග්‍රීසි බසින් ගැයූ ගීතයි. ඇයි ඒ වගේ වෙනසක් කරන්න හිතුවේ..?
බොහෝම අමාරුවෙන් හාඩ් වර්ක් කරලා ගීත ගයන නිර්මාණ කරන කලාකරුවන් බොහෝමයක් ඉන්නවා. මට හින්දි බසින් ගීත ගැයුවත් ප්‍රතිචාර ලැබෙනවා. නමුත් මට අවශ්‍ය වුණේ වෙනස් දෙයක් කරන්න. ඉන්දීය ජනතාවට සමීප තනුවලින් ඉංග්‍රීසි බසින් ගීත ගයන්න හිතුවේ ඒ නිසයි. ඒ තනු හා සංගීතය ජනතාවට සමීපයි. මම බලාපොරොත්තු වුණේ වෙනම ඕඩියන්ස් එකක් හදන්න. ඒ වෙනස සාර්ථක වුණ. මම හිතනවා මට ඒක කරන්න පුළුවන් වුණා කියලා.
විවේක් ඔබ සමාජ මාධ්‍ය පරිශීලකයෙක්. ඔබ නිතරම සමාජ මාධ්‍යට ඔබේ ගායන හැකියාව මුදා හරිනවා. ඉන්දියාව කියන්නේ කලාවට මුල් තැනක් දෙන රටක්. ඒත් ඔබේ හැකියාව සමාජ මාධ්‍ය ඔස්සේ මුදාහරින්නේ ඇයි..?
සමාජ මාධ්‍ය කියන්නේ හොඳ කියැවීමක් තියෙන තැනක්. දැන් බොහෝ දෙනෙක් සමාජ මාධ්‍ය පරිශීලනය කරනවා. මම හිතුවා මගේ හැකියාව වෙනස් විදිහට පෙන්නන එකක් නිසා ඒකට ගැළපෙන තැන සමාජ මාධ්‍ය කියලා. මම ඉන්ස්ටර්ග්‍රෑම් වගේම ටික් ටොක් සඳහා තමයි ගීත එළිදක්වන්නේ. බොහෝ දෙනෙක් අතරට මගේ හැකියාව ගෙනියන්න හොඳම ක්‍රමය මෙය තමයි. ඉන්දියාවේ හින්දි ඇතූළු භාෂා කිහිපයක් ජනප්‍රිය යි. ඒ නිසයි දකුණු ආසියාවේ ජනප්‍රිය ගීතවල තනු සඳහා ඉංග්‍රීසි ගීත මම ගයන්නේ. ඒ කියන්නේ මම ගීත රීමෙක් කරන්නේ එහෙම නැතුව ස්වයං ගීත නිර්මාණ නෙමෙයි කරන්නේ. ඒ නිසයි සමාජ මාධ්‍ය භාවිත කරන්නේ
ඔබට ඉන්ස්ටර්ග්‍රෑම් පරිශිලකයින් විශාල පිරිසක් ඉන්නවා. ඒ අයගෙන් ලැබෙන ප්‍රතිචාර කොහොමද..?
මම නිර්මාණය කරන ගීත බොහෝ දෙනෙක් රස විඳින්නේ ඉන්ස්ටර්ග්‍රෑම් හා ටික්ටොක් හරහා. ඒවාට බොහෝ දෙනෙක් මට ප්‍රතිචාර දක්වනවා. මගේ ගීත රසවිඳින බව කියනවා. එය මට ගීත නිර්මාණ කරන්න ශක්තියක්.
ඔබ ගයන ගීතවල පද නිර්මාණය කරන්නේ ඔබමද..?
තනුවට අනුව ඉංග්‍රීසි ගීතයේ පද රචනය කරන්නේ මමමයි. මම සංගීතය ඉගෙන ගෙන තියෙන නිසා මට නිර්මාණ කරන්න හරි පහසුයි. මම සතියකට එක ගීතයක් නිර්මාණය කරනවා. මම ඒ විදිහට ගායනා කරන ගීත මමමයි ලියන්නේ. ගීතයේ තනුව දැනෙන නිසා මට ලියන්න හැඟීමක්මක් දැනෙනවා.
හර්ෂණී වීරරත්න