ඔබගේ උපන්දිනට අදාළ ජය සංකේත භාවිත කිරීමෙන් ඔබට බොහෝ ප්‍රයෝජන උදාකර ගත හැකි බව ඔබ දන්නවාද? ඔබගේ කායික මානසික අාධ්‍යාත්මික සුවය මෙන්ම කරන කියන කටයුතු ජයග්‍රහණයෙන් සාර්ථකව නිමාවට පත් කර ගැනීම පහසු කිරීම සඳහා මෙම ජය සංකේත ඔබට උපකාරී වෙයි.
ජන්ම අංක එක හිමිවන්නේ ඕනෑම මාසයක
1, 10, 19, 28 යන දවස්වල උපන් අයටයි. ඔබත් මෙම දිනයන්වලින් එකක උපන් අයෙක් නම් ඔබගේ ජන්ම අංකය වන්නේ අංක එකයි.
ජන්ම අංක එකෙන් උපන් ඔබට සුභ කාලවකවානු ලෙස ඕනෑම වර්ෂයක ජූලි 15 සිට අගෝස්තු 20 දක්වා බොහෝ යහපත් කටයුතු සිදු කළ හැකි සාර්ථකත්වය ඇති කරන කාලයක් වෙයි. එමෙන්ම ඔබට වයස අවුරුදු 19, 28, 37, 46, 55, 64, 73 ජයග්‍රාහී දියුණුව ඇති කරන වර්ෂ වෙන අතර ඕනෑම මාසයක 1, 4, 10, 13, 19, 22, 28, 31 යන දින සුබ කටයුතුවලට යොදා ගැනීමෙන් සාර්ථක පල ලැබිය හැකිය. එම අංක සහිත ලොතරැයි පත් මිලදී ගැනීමද ජයග්‍රහණ සම්භාවිතාවය ඉහළ දැමීමට හේතු වේ.
ඔබට වඩාත් සුබදායක සතියේ දවස් වන්නේ ඉරිදා සහ සඳුදා දිනයන් ය. ඉහත සුභ දිනයකට සුභ දවසකුත් යෙදේ නම් වඩාත් සාර්ථකත්වය හා සුබපල ලබාගත හැකිය. ඕනෑම මාසයක 4, 16, 25 දින අයහපත් දින වන අතර 7, 16, 25, 34, 43, 52, 61, 70 යන වර්ෂ අයහපත් ඵල දෙන වර්ෂ වෙයි. එවැනි දින කාලවකවානු තුළ සුබ කටයුතු සඳහා යොදාගැනීම හැකිතරම් මගහැරීම වඩාත් සුදුසු වෙයි.
ජන්ම අංක එකෙන් උපන් ඔබට ශුභදායක වර්ණ ලෙස රන්වන් පාට සහ එම පාටට හුරු ඕනෑම වර්ණයක් යහපත් ඵල දෙයි. කහ සහ තඹ වර්ණය ද ඉතා සුබ පල දෙයි. මේ අනුව ලේන්සුව, දොර ජනෙල් තිර, බෙඩ්ෂීට්, කොට්ට උර, කාර්යාල හෝ ව්‍යාපාර මේස රෙදි ආදී හැකි සෑම අවස්ථාවකදීම ගැළපෙන ලෙස එම වර්ණ යොදා ගැනීමෙන් සුබ ඵල ලබා ගත හැකිය. ජන්මාංක එකෙන් උපන් ඔබට නිල් සහ කළු වර්ණය අයහපත් ඵල ඇති කරන හෙයින් හැකි තරම් භාවිතය අවම කරන්න. සුභ කටයුතු සඳහා සුභ දවස්; දින වර්ණ හැකි සෑම විටම යොදා ගැනීමෙන් එහි සාර්ථකත්වය ඔබට ම අත්විඳ ගතහැකිය. ජන්මාංක එකෙන් උපන් ඔබට සුභදායක ඛණිජය වන්නේ රූබිය.
වාහනයක් මිලදී ගැනීමේදී වාහනයේ අංකවල එකතුව තනි අංකයක් ලෙස ගත් විට 1, 4, වේ නම් එම වහනය ඔබට වඩාත් සුබ පල දෙන අතර ගමන් බිමන්වලදී පාඩු අලාභ හානි සහ අනතුරු ආදියෙන් ආරක්ෂාව ද සැලසෙයි. එමෙන්ම හැකි නම් රත්තරන් මාලයක් හෝ වළල්ලක් නිතර පැලඳීම ද සුබපල ඇති කරන අතර තඹ වළල්ලක් වුවද යහපත් වෙයි. ඔබ ව්‍යාපාරයක් කරන කෙනෙක් නම් ඔබගේ ව්‍යාපාරයට ජන්ම අංක හෝ දෛව අංක 2, 3, 5, 6, 8 යන අංක හිමි අයගෙන් වඩාත් හොඳ සහයෝගයක් ලබාගත හැකි අතර ජන්ම අංක 1, 4, අය ද යහපත් වෙයි.
ඕනෑම මාසයක 2, 11, 20, 29 දිනවල උපන් අයට අදාළ ජය සංකේත මීළඟ කලාපයෙන් බලාපොරොත්තු වන්න.
ප්‍රවීණ ජ්‍යොතිර්වේදී ඒ.ජේ. දීපාලෝක
