ඔබ උපන්නේ ඕනෑම මාසයක 2,11,20,29 යන දිනයක නම් ඔබගේ ජන්ම අංකය වන්නේ අංක දෙකයි. මේ ලිපියෙන් බලාපොරොත්තු වන්නේ ජන්ම අංක 2 හිමි ඔබගේ උපන් දිනයට අදාළ ‘ජය සංකේත’ පිළිබඳව ඔබ දැනුම්වත් කිරීමටයි.
ඔබගේ උපන් දිනයට අදාළ ‘ජය සංකේත’ භාවිතා කිරීම තුළ සාර්ථකත්වයත් ජයග්‍රහණයත් අත්පත් කර ගැනීමට පහසුවෙන්ම හැකියාවක් පවතිනවා. මේ පිළිබඳව ඔබ උනන්දු වන කෙනෙක් නම් ඔබට මෙය ඉතා වැදගත් වේවි. මෙම කාරණා අනුගමනය කිරීමෙන් ඔබේ සාර්ථකත්වය මෙන්ම මෙහි සත්‍යතාවය ද වටහා ගන්නට ඔබටම හැකියාව ලැබේවි.
ඔබ ව්‍යාපාර කරන කෙනෙක් නම් ඔබගේ ව්‍යාපාරයට අන් අය සම්බන්ධ කර ගැනීමේදී මේ පිළිබඳව අවධානය යොමු කරන්න. ඔබට ඒ තුළින් ඔවුන්ගේ සහයෝගය විශ්වාසනීයව වඩාත් හොඳින් ලබා ගැනීමේ හැකියාව පවතිනවා. ඔබගේ ව්‍යාපාරය සඳහා අනිත් අය සම්බන්ධ කර ගැනීමේදී ජන්ම අංක 2, 3, 4, 6, 7, 9 අංක හිමියන් සම්බන්ධ කර ගැනීමෙන් වඩාත් හොඳින් සහයෝගය ලබාගෙන සාර්ථකත්වය ඇති කර ඇති කරගැනීමට පුළුවන්. ජන්ම අංකය යනු ඔවුන්ගේ උපන්දිනයේ එකතුවයි. එනම් යම් කෙනෙක් 27 දිනක ඉපදුණා නම් ඔහුගේ ජන්ම අංකය වන්නේ අංක නවයයි.
ආදරය සහ ප්‍රේමය සම්බන්ධ කටයුතුවලට ඔබ ඉක්මන් නොවිය යුතු අතර ඒ පිළිබඳ හොඳින් දුර දිග සිතා බලා තීරණ ගැනීමට වගබලා ගන්න. ඔබේ පෙම්වතා පෙම්වතිය හෝ විවාහ සහකරු සහකාරිය ලෙස තෝරා ගැනීමට ඔබට වඩාත් සුදුසු වන්නේ ජන්ම අංක 1, 2, 7, හිමියන් වේ.
කොහොම වුණත් ඉතාමත් යහපත් ගතිගුණ ඇති බුද්ධිමත් ප්‍රියමනාප සංවේදී සිතක් හිමි සහකරුවෙකු හෝ සහකාරියක් ඔබට හිමිවීමේ වාසනාව පවතී.
ඔබගේ ජීවිතයේ සුවිශේෂී සිදුවීම් සිදුවිය හැකි ජයග්‍රාහි වාසනාවන්ත දිනයන් වන්නේ ඕනෑම මාසයක 1, 2, 7, 10, 11, 13, 16, 19, 20, 22, 25, 28, 29 යන දිනයන්ය. ඔබ කිරීමට සිතා සිටින කටයුතු මෙම දිනයක යොදා ගැනීම තුළ ඔබට වඩාත් හොඳ ප්‍රතිඵල ලබා ගැනීමේ හැකියාව පවතී. එමෙන්ම ජූනි මාසයේ 15 සිට ජූලි මාසය අවසානය දක්වා කාලය තුළ කරන කටයුතු තුළින් ද සාර්ථක ප්‍රතිඵල ලැබීමේ හැකියාව තිබේ.
එමෙන්ම ජනවාරි පෙබරවාරි සහ දෙසැම්බර් මාස ඔබගේ විශේෂ සුබ කටයුතු සඳහා යොදා ගැනීමට සුදුසු නොවන අතර පල හීන කරයි.
ඔබට වාසනාවන්ත ජයග්‍රාහී දිනය වන්නේ සඳුදා දිනයයි.ඉරිදා සහ සිකුරාදා දිනයන්ද සුබ ඵල ලබා ගත හැකි දිනයන් වේ.
මෙම සුබ දවස් සහ ඉහත සඳහන් කරන ලද සුබ දිනයක් යන දෙකම එක දවසක යෙදේ නම් වඩාත් සුබපල ලබාගත හැකිය. ඔබේ සුවිශේෂී කටයුතු සඳහා හැකි තරම් එවැනි දින යොදා ගැනීමට උනන්දුවන්න.
ඔබට වාසනාව ගෙනදෙන ගැළපෙන වර්ණ වන්නේ සුදු පාට වර්ණය, ලා නිල්පාට වර්ණය සහ ළා කොළපාට වර්ණයන්ය.
මෙම වර්ණ හැකි සෑම අවස්ථාවකම වැඩි වශයෙන් භාවිතයට ගැනීමෙන් තමන්ගේ කායික මානසික සෞඛ්‍යය සතුට ප්‍රබෝධය නිරන්තරයෙන් රඳවා ගැනීමේ හැකියාව ඇති කරන අතර අඳුරු සෘණාත්මක සිතුවිලි පාලනය කර ගැනීමට හැකිය.විශේෂයෙන්ම දොර, ජනෙල් රෙදි, කොට්ට උර, ලේන්සු, කාර්යාල මේස රෙදි ආදිය සඳහා ඔබට මේ වර්ණ භාවිත කළ හැකිය.
එමෙන්ම තද කළු වර්ණය තද දම්, රතු සහ කොළ වර්ණ සහිත ඇඳුම් ඔබට අයහපත් පල දීමට හේතු වේ. ජීවිතයේ වැදගත් සුබ අවස්ථාවලදී එම වර්ණ භාවිත කිරීම හැකි තරම් අවම කරන්න.
ඔබට ජීවිතයේ වඩාත් සුවිශේෂී සිදුවීම් සිදුවිය හැකි සහ සාර්ථකත්වය ලබා ගත හැකි වර්ෂ වන්නේ අවුරුදු 1, 10,19, 28, 37, 46, 55, 64, 71. යන වයස්වලදීය.
එමෙන්ම ඔබට වයස 5, 14, 23, 32, 41, 50, 59, 68, 77 යන අවුරුදු අයහපත් ලෙස හඳුන්වා දිය හැකි අතර මෙම කාලවල සුබ කටයුතු යොදා ගැනීම හැකි තරම් අවම කර ගැනීම කළ යුතු අතර ප්‍රවේශම් වීමද වැදගත්.
ඔබට සුබපල ගෙන එන වාසනාවන්ත ලෝහය වන්නේ රිදී ලෝහයයි. රත්තරන් ද ඔබට සුබපල උදාකරයි. එම ලෝහවලින් සාදන ලද ආභරණ පැළදීම හිතකර වේ.
ඔබ වාහනයක් මිලදී ගන්නවානම් වාහනයේ අංකය තනි අංකයක් ලෙස එකතු කළ පසු අංක 2 යෙදේ නම් ඉතාමත් සුබ පල උදාකරන අතර ඔබට ආරක්ෂාවක් සැලසේ. කරදර අඩු වේ. එමෙන්ම වාහනයේ වර්ණය ද ඔබට සුභ වර්ණයකින් තෝරාගන්න එවිට සුබ පල තවත් වැඩි කරගත හැකිය.
ඕනෑම මාසයක 3, 12, 21, 30 උපන් ඔබගේ ජය සංකේත පිළිබඳ විස්තර ලබන කලාපයෙන් බලාපොරොත්තු වන්න.
ප්‍රවීණ ජ්‍යොතිර්වේදී ඒ.ජේ. දීපාලෝක
