ඔබ උපන්නේ ඕනෑම මාසයක 3,12,21,30 යන දිනයක නම් ඔබගේ ජන්ම අංකය වන්නේ අංක 3 යි. මේ ලිපියෙන් බලාපොරොත්තු වන්නේ ජන්ම අංක 3 හිමි ඔබගේ උපන් දිනයට අදාල ජය සංකේත පිළිබඳව ඔබ දැනුම්වත් කිරීමටයි.
ඔබගේ උපන් දිනයට අදාළ ජය සංකේත භාවිතා කිරීම තුළ සාර්ථකත්වයත් ජයග්‍රහණයත් අත්පත් කර ගැනීමට පහසුවෙන්ම හැකියාවක් පවතිනවා.
ආදරය සහ ප්‍රේමය සම්බන්ධ කටයුතුවල දී අසාර්ථක තත්ත්වයක් පෙන්නුම් කළත් ජන්ම අංක 3 හිමි පුද්ගලයින් ආදරයේ ගැඹුරු අර්ථය තේරුම් ගැනීමට සමත්වෙයි. කෙසේ නමුත් ලස්සන කීකරු ආදරණීය සහකරුවෙක් හෝ සහකාරියක් ලැබීමට ඔවුන් වාසනාවන්ත වේ. ආදරණීය සුන්දර විවාහ ජීවිතයක් ගත කිරීමට සහ හොඳ සහකාර සම්බන්ධතාවයක් පවත්වා ගැනීමට ජන්ම අංක 3 න් උපන් ඔබට වඩාත් සුදුසු විවාහ සහකරු සහකාරියන් වන්නේ උපන්දින අංක 3, 6, 9 අය හෝ ඕනෑම මාසෙක 3,6,9,12,15,18,21,24,27,30 යන දිනයන්වල උපන් අයයි. ඔබ සහකරු සහ සහකාරිය සමග සම්බන්ධතාවයන් ගොඩනගා ගැනීමේදී මේ පිළිබඳව උනන්දුව දැක්වීම තුළ ඒ කටයුතු ගැටලුවලින් තොරව පවත්වාගෙන යෑමට හැකියාවක් ලැබෙනු ඇත.
සෑම වර්ෂයකම පෙබරවාරි 19 සිට මාර්තු 26 දක්වා සහ නොවැම්බර් 20 සිට දෙසැම්බර් 26 දක්වා කාලය ඔබට බලවත් කාලයක් බැවින් මේ කාල යහපත් ප්‍රතිඵල ඔබට ලබා ගත හැකියි. එම කාලයේ ඉපදුණු අයට ද මෙහි සඳහන් කළ කරුණුවල බලපෑම වැඩි වශයෙන් ලැබේ.
ජන්ම අංක 3 හිමි අයට තමාගේ පාලනය යටතේ පවත්වාගෙන යා හැකි රැකියා ව්‍යාපාර වඩාත් සාර්ථක වේ. සුවඳ විලවුන් විසිතුරු දේවල් හා සම්බන්ධ වෙ‌ෙළඳාම ඒ වගේම ඇඟලුම් ක්ෂේත්‍රය හා රෙදිපිළි ආදිය සම්බන්ධ ව්‍යාපාර ලේඛනය හා පොත් පත් ආශ්‍රිත රැකියා. ආයතනවල පාලන කටයුතු හෝ පරිපාලනයට අදාළ රැකියා. හෝටල් ක්ෂේත්‍රය, සංචාරක, පරිගණක, රජයේ ලිපිකාර හෝ ගුරු වෘත්තිය, ආදි රැකියා ව්‍යාපාර වඩාත් සාර්ථකවේ. එසේම කලා ක්ෂේත්‍රය හා සම්බන්ධ රැකියා ව්‍යාපාර ද වඩා පලදේ.
මිතුරන් වශයෙන් ඇසුරු කිරීමට හෝ ව්‍යාපාරික වශයෙන් සහයෝගය ලබා ගැනීමේදී ජන්ම අංක 3, 6, 9 හිමියන් වඩාත් ගැළපෙන අතර හොඳ සහයෝගයක් ලබා ගැනීමට එමඟින් හැකියාව ලැබේ.
ඔබට ඕනෑම මාසයක 3, 12, 21, 30 වාසනාවන්ත දවස් වන අතර ඔබේ ජීවිතයේ අමතක නොවන සිදුවීම් මේ දවස්වල සිදු වේ. එමෙන්ම පෙබරවාරි 20 සිට මාර්තු 27 දක්වා දක්වාත් නොවැම්බර් 20 සිට දෙසැම්බර් 27 දක්වා කාලය යහපත් වැදගත් කටයුතුවලට යොදාගැනීම සාර්ථක ප්‍රතිඵල ලැබීමට හේතු වේ.
ඔබට සතියේ වාසනාවන්ත දවස වෙනුයේ බ්‍රහස්පතින්දා දිනයයි. සිකුරාදා සහ සෙනසුරාදා දින ඔබටජයග්‍රාහී දිනයන් වේ. ඉරිදා සහ අඟහරුවාදා හැකිතරම් සුභ වැඩවලට යොදා ගැනීමෙන් වළකින්න ඒ කරදර, පාඩු හා අලාභ හානි මානසික පීඩා ඇති කළ හැකි බැවිනි. එමෙන්ම ජනවාරි මාසය සහ ජූලි මාසය ද අයහපත් ඵල ලැබෙන මාස බැවින් වඩාත් ප්‍රවේශම් විය යුතු කාලයකි. විශේෂයෙන් මුදල් සම්බන්ධ කරදර හා පාඩු සිදුවිය හැකිය. ඕනෑම මාසයක 1, 7 16, 25 යන දිනයන් ඔබට අවාසිදායක දිනයන් වන අතර ජීවිතේ හිත කම්පා කරන සිදුවීම් මෙම දිනයන් තුළ සිදුවීම බොහෝවිට දක්නට ඇත.
ඔබට වාසනාව සහ ජය ගෙනදෙන වාසනාවන්ත වර්ණ වනුයේ කහ පාට, සහ ළා නිල් වර්ණයයි. එමෙන්ම රන් ආභරණ පැලදීම ද තඹ වළල්ලක් හෝ කහපාට කෘත්‍රිම ආභරණ පැළඳීම ද ඔබට සුබපල ඇති කරයි. පුෂ්පරාග මැණික් ඔබට සුබ පල දෙන ජයග්‍රාහි මැණික් වර්ගය වුවත් ජ්‍යොතිර්වේදියෙක්ගේ නිසි උපදෙස් අනුව එය පැළඳීම වඩා යහපත් වේ.
ඔබට වයස අවුරුදු 12, 21, 39, 48, 57, 66 යන වර්ෂ ජීවිතේ සුවිශේෂී සිදුවීම් සිදුවිය හැකි වර්ෂ වන අතර වැදගත් සැලසුම් මෙම වර්ෂ වල ක්‍රියාත්මක කිරීමෙන් බොහෝ සාර්ථක වේ.
ඔබ වාහනයක් මිලදී ගන්නේනම් වාහනයේ අංකය තනි අංකයක් වන ලෙස එකතු කළ පසු 3, 6, 9 වේ නම් එය ඉතාමත් සුබ පල දෙන අතර, ආරක්ෂාව ද සලසා ගැනීමට හැකියාව ලැබේ.එමෙන්ම ඔබගේ සුබ වර්ණයක් ද වහනයේ වර්ණය සඳහා යොදා ගැනීම යහපත් වෙයි.
ඕනෑම මාසයක 4, 13, 22, 31 දිනවල උපන් ඔබගේ ජය සංකේත ලබන කලාපයෙන් බලාපොරොත්තු වන්න.
ප්‍රවීණ ජ්‍යොතිර්වේදී ඒ.ජේ. දීපාලෝක
