පසුගිය කාලයේ ඖෂධ මිලෙහි ඉහළ යෑම ජනතාවට දරා ගැනීමට නොහැකි බව ද ඖෂධ මිල පාලනය හොඳ පියවරක් බව ද සමගි ජන බලවේගයේ (සජබ) පාර්ලිමේන්තු මන්ත්‍රී තිස්ස අත්තනායක සිළුමිණට කියා සිටියේය.
පසුගිය කාල සීමාව තුළ මෙම මිල ඉහළ යාමට හේතු රැසක් බලපෑ බව ද සෞඛ්‍ය ක්ෂේත්‍රෙය් මතුව තිබූ හොරකම සහ දුෂණය නිසා ඖෂධ මිල ඉහළ ගිය බව බොහෝ දෙනා පවසන බවත් අවධාරණය කළ පාර්ලිමේන්තු මන්ත්‍රී තිස්ස අත්තනායක පැවැසුවේ එහි වන්දිය ජනතාවට ගෙවීමට සිදු වූ බවය.
වැඩිදුරටත් අදහස් දක්වමින් සජබ පාර්ලිමේන්තු මන්ත්‍රිවරයා මෙසේද කියා සිටියේය. “පසුගිය කාල සීමාව තුළ බාල ඖෂධ නිසා විශාල පිරිසකගේ ජීවිත අහිමි වුණා.
සෞඛ්‍ය අමාත්‍යාශය තුළ මිලදී ගැනීම්වල ඇති වෙලා තිබුණු මහ දුෂණකාරි තත්ත්වය තුළ පාර්ලිමේන්තුවේ සෞඛ්‍ය ඇමැතිවරයාට විශ්වාස භංග යෝජනාවක් පවා ගෙනාවා. මිලදී ගැනීම් සහ ඖෂධ සම්බන්ධයෙන් කාරණා විශාල ලෙස කතා බහට ලක් වුණා. මේ දුෂණ වංචා නොමැති නම් මිට වඩා මිල අඩු කරන්න පුළුවන්.
සෞඛ්‍යයට වැය කරන මුදල දුෂණයට යට වෙලා කියලයි තමයි අපි හිතන්නේ. කෙසේ වෙතත් ඖෂධ යම් කිසි නියාමනයක් තියනවා නම් අඩු කිරීමක් වෙනවා නම් එය යහපත් පියවරක්“.
සුභද්‍රා දේශප්‍රිය